Garvita Odia
ଭୁବନେଶ୍ୱର : ସାରା ଦେଶରେ ନିଟ୍-ୟୁଜି ପରୀକ୍ଷା ଅନୁଷ୍ଠିତ ହୋଇଛି । ଦେଶରେ ୫୪୫୩ଟି ପରୀକ୍ଷା କେନ୍ଦ୍ର ହୋଇଥିବା ବେଳେ ଦେଶ ବାହାରେ ୧୩ଟି ସହରରେ ପରୀକ୍ଷା ହୋଇଛି । ଦେଶରେ ୨୦.୮ ଲକ୍ଷ ଛାତ୍ରଛାତ୍ରୀ ପରୀକ୍ଷା ଦେଇଛନ୍ତି । ଅନ୍ୟପଟେ ଓଡ଼ିଶାର ୨୬ଟି ସହରରେ ପରୀକ୍ଷା କେନ୍ଦ୍ର ହୋଇଥିଲା । ଭୁବନେଶ୍ୱରରେ କେବଳ ୩୨ଟି । ଓଡ଼ିଶାରୁ ପ୍ରାୟ ୧ ଲକ୍ଷ ପିଲା ପରୀକ୍ଷା ଦେଇଛନ୍ତି । ସାରା ଦେଶରେ ନିଟ୍-ୟୁଜି ପରୀକ୍ଷା ପାଇଁ ୨୨.୭ ଲକ୍ଷ ଛାତ୍ରଛାତ୍ରୀ ପଞ୍ଜୀକରଣ କରିଥିଲେ । ଅପରାହ୍ନ ୨ଟାରୁ ୫ଟା ଯାଏ ପରୀକ୍ଷା ହୋଇଥିଲା ।
ଶେଷ ୩ ବର୍ଷ ହେଲା ନିଟ୍-ୟୁଜି ପଢ଼ିବା ପାଇଁ ୨୦ ଲକ୍ଷରୁ ଅଧିକ ପିଲା ପଞ୍ଜୀକରଣ କରୁଛନ୍ତି । ଗତବର୍ଷ ୨୪ ଲକ୍ଷ, ୨୦୨୩ରେ ୨୦ ଲକ୍ଷ ୮୭ ହଜାର, ୨୦୨୨ରେ ୧୮ ଲକ୍ଷ ୭୨ ହଜାର, ୨୦୨୧ରେ ୧୬ ଲକ୍ଷ ୧୪ ହଜାର ଏବଂ ୨୦୨୦ରେ ୧୫ ଲକ୍ଷ ୯୭ ହଜାର ପିଲା ପରୀକ୍ଷା ଦେଇଥିଲେ । ମେଡିକାଲ୍ ନାମଲେଖା ପାଇଁ ସିଟ୍ କରାଇ ଦେବା, ପରୀକ୍ଷା ହଲ୍ରେ ପରୀକ୍ଷାର୍ଥୀ ପାଇଁ ପରୀକ୍ଷା ଦେବା, ପ୍ରଶ୍ନପତ୍ର ଆଗୁଆ ଦେବା ଭଳି ପ୍ରଲୋଭନ ଦେଖାଇ ଦଲାଲ ମାନେ ବିଦ୍ୟାର୍ଥୀଙ୍କଠାରୁ ଟଙ୍କା ଆଦାୟ କରୁଥିବାର ଅଭିଯୋଗ ହୋଇଥିଲା । ପୁଲିସ ଚଢ଼ାଉ କରି ଦଲାଲଙ୍କୁ ଗିରଫ କରିଥିଲା । ତେଣୁ ନିଟ୍-ୟୁଜି ପରୀକ୍ଷାର୍ଥୀ ମାନେ କୌଣସି ଦଲାଲଙ୍କ ପ୍ରଲୋଭନର ଶିକାର ନହୋଇ କୌଣସି ଟଙ୍କା କାରବାର ନକରିବାକୁ ପରାମର୍ଶ ଦେଇଥିଲା ଏନ୍ଟିଏ ।
