Garvita Odia
ବାରିପଦା: ପିଆରଏମ୍ ମେଡିକାଲ କଲେଜ ହସ୍ପିଟାଲରୁ ପିଲା ଚୋରି। ରଣିଭୋଲ ଅଞ୍ଚଳର ଜଣେ ବ୍ୟକ୍ତିଙ୍କ ନବଜାତକ ଶିଶୁ ଚୋରି ହୋଇଥିବା ଅଭିଯୋଗ ହୋଇଛି। ଏନେଇ ବାରିପଦା ଟାଉନ୍ ଥାନା ପକ୍ଷରୁ ତଦନ୍ତ ଆରମ୍ଭ ହୋଇଛି।
ସୂଚନା ଅନୁଯାୟୀ, ରଣିଭୋଲ ଅଞ୍ଚଳର ଜନୈକ ବ୍ୟକ୍ତି ତାଙ୍କ ଗର୍ଭବତୀ ପତ୍ନୀଙ୍କୁ ପିଆରଏମ୍ ମେଡିକାଲ କଲେଜ ହସ୍ପିଟାଲରେ ଭର୍ତ୍ତି କରିଥିଲେ। ଗତକାଲି ତାଙ୍କର ପୁଅଟିଏ ଜନ୍ମ ହୋଇଥିଲା। ଗତକାଲି ଠାରୁ ଅନ୍ୟ ଜଣେ ମହିଳା ସେମାନଙ୍କ ସହ କଥାବାର୍ତ୍ତା ଓ ମିଳାମିଶା କରୁଥିଲା। ସକାଳେ ସେହି ମହିଳା ଜଣକ ନବଜାତକର ବାପାଙ୍କୁ ପିଲା ଜନ୍ମ ହେବା ପରେ ସରକାରୀ ଟଙ୍କା ପାଇଛ କି ନାହିଁ ପଚାରି ପିଲାଟିକୁ ନେଇ ବାହାରକୁ ଆସ ବୋଲି କହିଥିଲା। ନବଜାତକର ବାପା ପିଲାଟିକୁ ନେଇ ବାହାରକୁ ଆସିବା ପରେ ମହିଳା ଜଣଙ୍କ ବିଶ୍ୱାସ ଜନ୍ମାଇ ତାଙ୍କ ଫଟୋ ଉଠାଇଥିଲା। ପିଲାକୁ ମୋତେ ଦେଇ ଆଧାର କାର୍ଡର ଜେରକ୍ସ ଓ ଫଟୋ ଆଣିବାକୁ କହିଥିଲା। ପିଲାର ବାପା ଆଧାର କାର୍ଡ ଆଣିବାକୁ ତାଙ୍କ ସ୍ତ୍ରୀ ଥିବା ବେଡ୍ ପାଖକୁ ଯିବା ସମୟରେ ମହିଳା ଜଣକ ପିଲାକୁ ନେଇ ଫେରାର ହୋଇଯାଇଥିଲା। ଏହାପରେ ନବଜାତକର ପରିବାର ଲୋକେ ଏନେଇ ବାରିପଦା ଟାଉନ୍ ଥାନାରେ ଅଭିଯୋଗ କରିଛନ୍ତି। ପୁଲିସ ପକ୍ଷରୁ ତଦନ୍ତ ଜାରି ରହିଛି।
