ପୁଣି ସୃଷ୍ଟି ହେବ ଲଘୁଚାପ

ଭୁବନେଶ୍ୱର: ଝାଡ଼ଖଣ୍ଡ ଏବଂ ସଂଲଗ୍ନ ଉତ୍ତର ଗାଙ୍ଗେୟ ପଶ୍ଚିମବଙ୍ଗ ଉପତ୍ୟକା ଅଞ୍ଚଳରେ ସକ୍ରିୟ ଅବପାତ ଝାଡ଼ଖଣ୍ଡ ଓ ବିହାର ମଧ୍ୟଦେଇ ଗତି କରିବା ସହ ଦୁର୍ବଳ ହୋଇ ଏକ ସ୍ପଷ୍ଟ ଚିହ୍ନିତ ଲଘୁଚାପ କ୍ଷେତ୍ରରେ ପରିଣତ ହେବ। ଫଳରେ ବୁଧବାରଠାରୁ ଶୁକ୍ରବାର ପର୍ଯ୍ୟନ୍ତ ରାଜ୍ୟରେ ବର୍ଷା ପରିମାଣ କମିବ। ରାଜ୍ୟର କିଛି ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ହେବ। ତେବେ ଶନିବାରଠାରୁ ସୋମବାର ପର୍ଯ୍ୟନ୍ତ ୩ ଦିନ ବିଭିନ୍ନ ସ୍ଥାନରେ ବର୍ଷା ହେବା ନେଇ ୟେଲୋ ଓ୍ବାର୍ନିଂ ଜାରି କରିଛି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର।
ପାଣିପାଗ କେନ୍ଦ୍ର ସୂଚନା ଅନୁଯାୟୀ, ଗତ ୨୪ ଘଣ୍ଟାରେ ମୟୂରଭଞ୍ଜ ଜିଲାର ବହଳଦାଠାରେ ସର୍ବାଧିକ ୨୭୩ ମି.ମି. ବର୍ଷା ରେକର୍ଡ କରାଯାଇଛି। ସେହିପରି ୨୨ଟି ସ୍ଥାନରେ ପ୍ରବଳ ବର୍ଷା ହୋଇଛି। ଏଥିମଧ୍ୟରେ ମୟୂରଭଞ୍ଜ ଜିଲା ରାଇରଙ୍ଗପୁରରେ ୧୮୦ ମି.ମି., ବରଗଡ଼ ଜିଲା ଝାରବନ୍ଧରେ ୧୫୦ ମି.ମି., ମୟୂରଭଞ୍ଜ ଜିଲା ଜାମଦାରେ ୧୨୪ ମି.ମି., ସୁନ୍ଦରଗଡ଼ ଜିଲା ବାଲିଶଙ୍କରାରେ ୧୧୫ ମି.ମି., ଟେନ୍‌ସାରେ
୧୧୨.୮ ମି.ମି., ମୟୂରଭଞ୍ଜ ଜିଲା ବାଙ୍ଗିରିପୋଷୀରେ ୧୧୨.୪ ମି.ମି., ବିଜାତଳାରେ ୧୦୭ ମି.ମି., ସୁନ୍ଦରଗଡ଼ ଜିଲା ମନ୍ଦିରାଦାମରେ ୧୦୫.୨ ମି.ମି., ବଣାଇଗଡ଼ରେ ୧୦୩ ମି.ମି., ମୟୂରଭଞ୍ଜ ଜିଲା ତିରିଙ୍ଗରେ ୯୬.୨ ମି.ମି., ସୁନ୍ଦରଗଡ଼ ଜିଲା ଗୁରୁଣ୍ଡିଆରେ ୯୨ ମି.ମି. ବର୍ଷା ହୋଇଛି।