ମାନହାନି ମାମଲାରେ ରାହୁଲଙ୍କୁ ବେଲ୍

ନୂଆଦିଲ୍ଲୀ: କଂଗ୍ରେସର ବରିଷ୍ଠ ନେତା ତଥା ଲୋକସଭାର ବିରୋଧୀ ଦଳର ନେତା ରାହୁଲ ଗାନ୍ଧୀଙ୍କୁ ମାନହାନି ମାମଲାରେ ବୁଧବାର ଝାଡଖଣ୍ଡର ଚାଇବାସା ସ୍ଥିତ ଏମପି-ଏମଏଲଏ ସ୍ୱତନ୍ତ୍ର କୋର୍ଟ ଜାମିନ ପ୍ରଦାନ କରିଛନ୍ତି । ଏହି ମାମଲା ୨୦୧୮ ମସିହାରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ବିରୋଧରେ ଦିଆଯାଇଥିବା ଏକ କଥିତ ଆପତ୍ତିଜନକ ଟିପ୍ପଣୀ ସହ ଜଡିତ । ରାହୁଲ ଗାନ୍ଧୀ ବୁଧବାର ସକାଳ ପ୍ରାୟ ୧୦.୫୫ ସମୟରେ କୋର୍ଟରେ ହାଜର ହୋଇଥିଲେ । ତାଙ୍କ ଓକିଲଙ୍କ ଯୁକ୍ତି ଶୁଣିବା ପରେ ନ୍ୟାୟିକ ମାଜିଷ୍ଟ୍ରେଟ ସୁପ୍ରିୟା ରାଣୀ ତିଗ୍ଗାଙ୍କ ଅଦାଲତ ତାଙ୍କୁ ଜାମିନ ମଞ୍ଜୁର କରିଛନ୍ତି । ଏହି ଜାମିନ ସର୍ତ୍ତମୂଳକ ଭାବେ ଦିଆଯାଇଛି ଯେ ସେ ମାମଲାର ଶୁଣାଣି ପ୍ରକ୍ରିୟାରେ ସହଯୋଗ କରିବେ ।

୨୦୧୮ ମସିହାରେ ଚାଇବାସାରେ ଏକ ରାଲି ସମୟରେ ରାହୁଲ ଗାନ୍ଧୀ ତତ୍କାଳୀନ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହଙ୍କ ବିରୋଧରେ ଆପତ୍ତିଜନକ ମନ୍ତବ୍ୟ ଦେଇଥିବା ଅଭିଯୋଗ ହୋଇଥିଲା । ସେ କହିଥିଲେ ଯେ କଂଗ୍ରେସରେ କୌଣସି “ହତ୍ୟାକାରୀ” ରାଷ୍ଟ୍ରୀୟ ଅଧ୍ୟକ୍ଷ ହୋଇପାରିବ ନାହିଁ, ଏହା କେବଳ ବିଜେପିରେ ସମ୍ଭବ । ଏହି ବୟାନକୁ ନେଇ ସ୍ଥାନୀୟ ବିଜେପି ନେତା ପ୍ରତାପ କଟିୟାର ୨୦୧୮ ଜୁଲାଇ ୯ ତାରିଖରେ ରାହୁଲ ଗାନ୍ଧୀଙ୍କ ବିରୋଧରେ ଆପରାଧିକ ମାନହାନି ମାମଲା ଦାୟର କରିଥିଲେ ।