୨୩ଟିକିଆ ହାତୀପଲ୍ଲ ଚନ୍ଦକାରୁ ଆଠଗଡ ବନାଞ୍ଚଳକୁ ଫେରିଲେ

ଆଠଗଡ,22/08: ଆଠଗଡ ବନାଞ୍ଚଳକୁ ପ୍ରାୟ ୮ ମାସ ବ୍ୟବଧାନ ପରେ ଚନ୍ଦକା ଅଞ୍ଚଳରୁ ପୁଣି ଫେରିଛନ୍ତି ୨୩ଟିକିଆ ହାତୀପଲ୍ଲ। ଗୁରୁବାର ଭୋର ପ୍ରାୟ ୪ ଟା ବେଳେ ଚନ୍ଦକାରୁ ଡମପଡା ସଂରକ୍ଷିତ ଜଙ୍ଗଲ ଦେଇ ୨୨ ଘର ହାତୀ ମହାନଦୀ ପାର ହୋଇ ଆଠଗଡ ବନାଞ୍ଚଳ ଅନ୍ତର୍ଗତ କନ୍ଦରପୁର ନିକଟ ବାଘେରା ପାଖରେ ଉଠିବା ପରେ ସୁକାଶନ ସଂରକ୍ଷିତ ଜଙ୍ଗଲକୁ ଆସିଛନ୍ତି । ପୁଣି ଶୁକ୍ରବାର ଭୋର ସମୟରେ ପଛରେ ରହିଯାଇଥିବା ଆଉ ଏକ ଦନ୍ତା ହାତୀ ନଦୀ ପାର ହୋଇ ସୁକାଶନ ଜଙ୍ଗଲକୁ ଆସିଥିବା ବନ ବିଭାଗ ସୂତ୍ରରୁ ପ୍ରକାଶ। ପୂର୍ବରୁ ଏଠାରେ ଏକ ଗୋଟିକିଆ ମାଈ ହାତୀ ରହିଥିଲା । ଏବେ ସର୍ବମୋଟ ୨୪ଟି ହାତୀ ସୁକାଶନ ଜଙ୍ଗଲରେ ରହିଥିବା ସୂଚନା ମିଳିଛି । ସେମାନଙ୍କ ମଧ୍ୟରେ ୮ଟି ଛୁଆ ହାତୀ, ୯ଟି ମାଈ, ୫ଟି ଦନ୍ତା ଓ ଗୋଟିଏ ମାଖନା ହାତୀ ରହିଛନ୍ତି। ଏବେ ହାତୀ ପଲ୍ଲ ଆସିବା ପରେ ସେମାନଙ୍କ ସୁରକ୍ଷା ନେଇ ବନ ବିଭାଗ ମୁଣ୍ଡ ବିନ୍ଧା ଆରମ୍ଭ ହୋଇ ଯାଇଥିବାବେଳେ ନିଜ କ୍ଷେତର ଫସଲ ହାତୀ ମୁଁହରୁ କିପରି ବଞ୍ଚାଇବେ ସେଥିପାଇଁ ଚାଷୀଙ୍କ ଚିନ୍ତା ବଢିଗଲାଣି। ଆଠଗଡ ବନଖଣ୍ଡ ଅଧିନ ଆଠଗଡ ବନାଞ୍ଚଳରେ ଚନ୍ଦକା ହାତୀ ଏବଂ ଖୁଣ୍ଟୁଣୀ ବନାଞ୍ଚଳରେ କପିଳାସ ହାତୀ ନିୟମିତ ଜଙ୍ଗଲରୁ ବାହାରି ବିଭିନ୍ନ ଅଞ୍ଚଳରେ ବ୍ୟାପକ ଫସଲ ଖାଇବା ସହ କୁଦି ଦଳି ନଷ୍ଟ କରୁଥିବାରୁ ଚାଷୀମାନେ କ୍ଷତିଗ୍ରସ୍ତ ହେଉଛନ୍ତି ।