Garvita Odia
ପୁରୀ : ଆଉ ମାତ୍ର ଦିନକ ପରେ ରଥକୁ ବିଜେ ହେବ ଆଜ୍ଞା ମାଳ। ଏଣୁ ରଥ ନିର୍ମାଣରେ ଶେଷ ସ୍ପର୍ଶ ଦେଉଛନ୍ତି କାରିଗର। ମଙ୍ଗଳବାର ରଥରେ ପାଶ୍ୱର୍ଦେବତାଙ୍କୁ ସ୍ଥାପନ କରାଯାଇଛି । ୩ ରଥରେ ୨୭ ପାର୍ଶ୍ୱଦେବାଦେବୀ ବିଜେ ହୋଇଛନ୍ତି । ରଥରେ ପ୍ରଥମେ ଶିଖରଡମ୍ୱରୁ ଲଗାଗଲା । ସେଥିରେ ପାର୍ଶ୍ୱଦେବାଦେବୀଙ୍କୁ ସ୍ଥାପନ କରାଗଲା । ବୁଧବାର ରଥରେ ଠେକରା ବାଡ଼ ବୁଲିବ। ଏନେଇ ଦେବଦଳନ ରଥ ମୁଖ୍ୟ ବିଶ୍ୱକର୍ମା ନାରାୟଣ ମହାରଣା ସୂଚନା ଦେଇଛନ୍ତି । କୋଠସୁଆଁସିଆ ସେବକମାନେ ରଥରେ କନା ମଣ୍ଡଣି କାର୍ୟ୍ୟରେ ଲିପ୍ତ ଅଛନ୍ତି। ଏହାପରେ ସେମାନେ ପିତ୍ତଳ ସାଜ ଲଗାଇବେ । ରଥର ବ୍ରେକ୍ ମରାମତି ଜାରି ରହିଛି । ବ୍ରେକ୍ କାଠର ଖତରା ଅଂଶ ହଣା ଯାଇ ନୂଆ କାଠ ଯୋଡ଼ି ସେଥିରେ ରବର ପ୍ଲେଟ୍ ଦେଇ ଲୁହା କଣ୍ଟା ବାଡ଼ିଆ ଯାଉଛି । ରଥରେ ଧ୍ୱଜବତା ଲଗା ସରିଛି । ଦୁଆରଘଡ଼ା ଉପରେ ଲାଗିଥିବା ଧ୍ୱଜବତାରେ ଲାଗିବ ରଥ ଆଜ୍ଞାମାଳ । ଅଶ୍ୱ ଲାଗିବା ପାଇଁ ଇଶ ଓ ଜୁଆଳି ପ୍ରସ୍ତୁତ । ପୂର୍ବରୁ ରଥ ସମ୍ମୁଖରେ ଚାରପରିଛା କାଠ ଲାଗିଥିଲା । ଏହା ଉପରେ ଦୁଇଟି ଇଶ ଲାଗିବ । ଇଶର ବେକରେ ଜୁଆଳି ଲାଗିବ । ଜୁଆଳିରେ ଅଶ୍ୱଙ୍କୁ ଲଗାଯିବ । ୩ ରଥର ୧୨ ଅଶ୍ୱଙ୍କୁ ରଙ୍ଗ ଦେଇ ପ୍ରସ୍ତୁତ କରୁଛନ୍ତି ଚିତ୍ରକର ।
ସେପଟେ ରଥ ସିଂହାସନ କାମ ଶେଷ ପର୍ୟ୍ୟାୟରେ । ବିଶ୍ୱକର୍ମାମାନେ ପଟା ବାଡ଼େଇ ସିହାଂସନ ବୁଜିଛନ୍ତି । ପୂର୍ବରୁ ଧମକ ଉପରେ ଜଗତପୃଷ୍ଠଶେଣୀ ରଖିଥିଲେ । ତା’ଉପରେ ପଟା ପଡ଼ି ସିଂହାସନ ପରିଛା ପଡ଼ିଲା । ଏହାପରେ ପଟା ପଡ଼ି ଚକା ପଡିବ । ଚକା ବେଦିରେ ଠାକୁରେ ଅଧିଷ୍ଠିତ ହେବେ । ବେଦି ପଛପଟେ ରହିବ ପ୍ରଭା । ପ୍ରଥମେ ବିଶ୍ୱକର୍ମାମାନେ ପ୍ରଭା ତିଆରି କରିଛନ୍ତି । ରୂପକାରମାନେ ସେଥିରେ କିର୍ତ୍ତୀମୁଖ ଓ ଉଭୟ ପାର୍ଶ୍ୱରେ ମଗରମୁଣ୍ଡ ଖୋଦେଇ କରିଛନ୍ତି । ଗତକାଲି ଚିତ୍ରକରମାନେ ପ୍ରଭାରେ ରଙ୍ଗ କାର୍ୟ୍ୟ ଶେଷ କରିଛନ୍ତି । ପ୍ରଭା ସ୍ଥାପନ ପରେ ଚକା ସିଂହାସନ ପଡ଼ିଲେ ନିର୍ମାଣକାରୀଙ୍କ ରଥ ନିର୍ମାଣ କାର୍ୟ୍ୟ ସରିବ । ସିଂହାସନ ଉପରେ କନକମୁଣ୍ଡି କାମ ହୋଇଛି । ଏବେ କନକମୁଣ୍ଡିରେ ପିତଳ ଚାଦର ବୁଲିବ ।
