ଫ୍ଲଡ଼ ଲାଇଟ ବନ୍ଦ ବିବାଦ: କାରଣ ଦର୍ଶାଅ ନୋଟିସର ଜବାବ ରଖିଲା ଓସିଏ

କଟକ: ବାରବାଟୀ ଫ୍ଲଡ଼ ଲାଇଟ ବନ୍ଦ ବିବାଦ । ରାଜ୍ୟ ସରକାରଙ୍କ କାରଣ ଦର୍ଶାଅ ନୋଟିସର ଜବାବ ରଖିଲା ଓଡିଶା କ୍ରିକେଟ ସଂଘ । ଭୁଲବଶତଃ ଏହି ଅଘଟଣ ଘଟିଥିବା ଉତ୍ତର ରଖିଛି ଓସିଏ । ଏନେଇ ଓସିଏ ସଭାପତି ପଙ୍କଜ ଲୋଚନ ମହାନ୍ତି କହିଛନ୍ତି, “ବିସିସିଆଇ ଏହି ଘଟଣା ପରେ କୌଣସି ପ୍ରଶ୍ନ କରିନାହିଁ । ଏପରିକି ଏହାରି ଭିତରେ ବାରବାଟୀରେ ସିସିଏଲ ମ୍ୟାଚ ଅନୁଷ୍ଠିତ ହୋଇଛି । ସେଦିନ ରାତି ୧.୩୦ ପର୍ୟ୍ୟନ୍ତ ଫ୍ଲଡ଼ ଲାଇଟ ଜଳିଲା । କୌଣସି ତ୍ରୁଟି ମଧ୍ୟ ପରିଲକ୍ଷିତ ହୋଇ ନଥିଲା । ସବୁକିଛି ଶାନ୍ତିଶୃଙ୍ଖଳାର ସହ ଶେଷ ହୋଇଥିଲା । ଭାରତ ଇଂଲଣ୍ଡ ମ୍ୟାଚ ସମୟରେ ଯେଉଁ ବିଭ୍ରାଟ ହୋଇଥିଲା ତାହା ଓସିଏର ଏକପ୍ରକାର ଭୁଲ । ଆଗାମୀ ଦିନରେ ଏପରି ଘଟଣା କେବେ ଘଟିବନି । ଏଣିକି ପ୍ରତ୍ୟେକ ଫ୍ଲଡ଼ ଲାଇଟ ପାଇଁ ୨ଟି ଜେନେରେଟର ମୁତୟନ ରହିବ ।”ଗତ ୯ ତାରିଖରେ ବାରବାଟୀରେ ଅନୁଷ୍ଠିତ ହୋଇଥିବା ଭାରତ ଓ ଇଂଲଣ୍ଡ ମଧ୍ୟରେ ଦ୍ୱିତୀୟ ଦିନିକିଆ ମୁକାବିଲାରେ ଘଟିଥିଲା ଏକ ବଡ଼ ଅଘଟଣ । ଦ୍ୱିତୀୟ ଇନିଂସରେ ଭାରତର ବ୍ୟାଟିଂ ଚାଲିଥିବା ବେଳେ ହଠାତ୍ କ୍ଲକ ଟାୱାର ନିକଟସ୍ଥ ଫ୍ଲଡ଼ ଲାଇଟ ବନ୍ଦ ହୋଇଯାଇଥିଲା । ସେଥିପାଇଁ ପାଖାପାଖି ୩୦ ମିନିଟ ଧରି ଖେଳ ବନ୍ଦ ରହିଥିଲା । । ଯାହାକୁ ନେଇ ଦର୍ଶକ ଓ କ୍ରିକେଟର ବିରକ୍ତ ପ୍ରକାଶ କରିଥିଲେ । ଏହାକୁ ନେଇ ଓସିଏର ପରିଚାଳନା ଉପରେ ପ୍ରଶ୍ନ ଉଠିଥିଲା । ଦେଶ ବିଦେଶରେ ଏନେଇ କଟକ ବାରବାଟୀ ନିନ୍ଦିତ ହୋଇଥିଲା । ଏହାକୁ ନେଇ ରାଜନୀତି ମଧ୍ୟ ତେଜିଥିଲା । ଯାହାକୁ ନେଇ ରାଜ୍ୟ ସରକାରଙ୍କ ପକ୍ଷରୁ ଓସିଏକୁ କାରଣ ଦର୍ଶାଅ ନୋଟିସ ଜାରି କରାଯାଇଥିଲା । ଯାହାର ଉତ୍ତରରେ ଓସିଏ ସମସ୍ତ ଦିଗ ଉପରେ ପୁଙ୍ଖାନୁପୁଙ୍ଖ ରିପୋର୍ଟ ପ୍ରଦାନ କରିଥିବା କହିଛନ୍ତି ଓସିଏ ସଭାପତି ।