Garvita Odia
ନୂଆଦିଲ୍ଲୀ: ଦେଶରେ ଖୁବଶୀଘ୍ର ପେଟ୍ରୋଲ ଏବଂ ଡିଜେଲ ଦରରେ ବୃଦ୍ଧି ଦେଖିବାକୁ ମିଳିପାରେ। ରିପୋର୍ଟ ଅନୁଯାୟୀ, ସରକାର ତୈଳ ଦର ବଢ଼ାଇବା ପାଇଁ ବିଚାର କରୁଛନ୍ତି, ଯଦିଓ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ଘୋଷଣା କରାଯାଇ ନାହିଁ। ଏହାପୂର୍ବରୁ ସରକାର ୧ ମଇ ୨୦୨୬ରୁ ୧୯ କିଲୋଗ୍ରାମ ବିଶିଷ୍ଟ ବାଣିଜ୍ୟିକ (Commercial) ଏଲପିଜି ସିଲିଣ୍ଡର ମୂଲ୍ୟରେ ବଡ଼ ଧରଣର ବୃଦ୍ଧି କରିଛନ୍ତି। ଏହି ବୃଦ୍ଧି ପରେ ଦିଲ୍ଲୀରେ ଏହାର ମୂଲ୍ୟ ୯୯୩ ଟଙ୍କାରୁ ବଢ଼ି ୩,୦୭୧.୫୦ ଟଙ୍କାରେ ପହଞ୍ଚିଛି।
ସରକାରୀ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଅନ୍ତର୍ଜାତୀୟ ବଜାରରେ କଞ୍ଚା ତୈଳ (Crude Oil) ଦର କ୍ରମାଗତ ଭାବେ ବଢ଼ିବାରେ ଲାଗିଛି, ଯାହାଫଳରେ ତୈଳ କମ୍ପାନୀଗୁଡ଼ିକ ପ୍ରବଳ କ୍ଷତି ସହୁଛନ୍ତି। ଆମେରିକା-ଇରାନ ଯୁଦ୍ଧ କାରଣରୁ କଞ୍ଚା ତୈଳ ଦର ବ୍ୟାରେଲ ପିଛା ୧୦୦ ଡଲାର ଅତିକ୍ରମ କରିଛି। ଅନେକ ଦେଶରେ ପୂର୍ବରୁ ହିଁ ପେଟ୍ରୋଲ ଓ ଡିଜେଲ ଦର ବୃଦ୍ଧି ପାଇସାରିଛି। ତେଣୁ ଭାରତରେ ମଧ୍ୟ ଏହି ବୃଦ୍ଧିର ସମ୍ଭାବନା ଜୋର ଧରିଛି, କିନ୍ତୁ କେତେ ଟଙ୍କା ବଢ଼ିବ ସେ ନେଇ ସ୍ଥିତି ସ୍ପଷ୍ଟ ହୋଇନାହିଁ।
ଏହି ସମୟରେ କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ହରଦୀପ ସିଂ ପୁରୀ କହିଛନ୍ତି ଯେ, ବିଶ୍ୱ ବଜାରରେ କଞ୍ଚା ତୈଳ ଦରରେ ଅସ୍ଥିରତା ସତ୍ତ୍ୱେ ଭାରତରେ ପେଟ୍ରୋଲ ଏବଂ ଡିଜେଲ ମୂଲ୍ୟ ବଢ଼ିବାକୁ ଦିଆଯାଇ ନାହିଁ। ଭାରତ ସରକାର ‘ଭୟ’କୁ ନୀତି ହେବାକୁ ଦେଇନାହାନ୍ତି ଏବଂ ଦେଶର ରୋଷେଇ ଘର ପର୍ଯ୍ୟନ୍ତ ଜାଳେଣି ଯୋଗାଣ ବାଧାପ୍ରାପ୍ତ ହୋଇନାହିଁ ବୋଲି ସେ ପ୍ରକାଶ କରିଛନ୍ତି।
