Garvita Odia
ଷ୍ଟକହୋମ୍: ୨୦୨୬ ମସିହା ପାଇଁ ରସାୟନ ବିଜ୍ଞାନର ନୋବେଲ୍ ପୁରସ୍କାର ଘୋଷଣା ହୋଇଛି। ଫ୍ରାନ୍ସର ହେନେରୀ ବି. କାଗନ ଓ ଜାପାନର କେନ୍ସୋ ସୋଆଇଙ୍କୁ ଏହି ସମ୍ମାନ ପାଇଁ ମନୋନୀତ କରାଯାଇଛି। ଅସମମିତ ଜୈବିକ ସଂଶ୍ଳେଷଣରେ ଅଣ-ରୈଖିକ ପ୍ରଭାବ ଏବଂ ଅଟୋକାଟାଲିସିସ୍ ସମ୍ପର୍କିତ ଗୁରୁତ୍ୱପୂର୍ଣ୍ଣ ଆବିଷ୍କାର ପାଇଁ ଉଭୟ ବୈଜ୍ଞାନିକଙ୍କୁ ଏହି ସମ୍ମାନ ଦିଆଯାଇଛି।
ରୟାଲ୍ ସ୍ୱିଡିଶ୍ ଏକାଡେମୀ ଅଫ୍ ସାଇନ୍ସେସ୍ କହିଛି ଯେ, ଦୁଇ ବୈଜ୍ଞାନିକଙ୍କ ଗବେଷଣା ଏପରି ରାସାୟନିକ ପ୍ରକ୍ରିୟାକୁ ବୁଝିବାରେ ନୂଆ ଦିଗ ଖୋଲିଛି, ଯେଉଁଥିରେ ଅତି ସାମାନ୍ୟ ଅସମାନତା ସମୟ ସହିତ ବଢ଼ି ଗୋଟିଏ ପ୍ରକାରର ଅଣୁକୁ ଅନ୍ୟ ରୂପ ଉପରେ ପ୍ରାଧାନ୍ୟ ଦେଇପାରେ।କାଗନ ଓ ସୋଆଇଙ୍କ ଗବେଷଣାର ମୁଖ୍ୟ ବିଷୟ ହେଉଛି ଅଣୁର ଦୁଇଟି ପ୍ରତିବିମ୍ବ ରୂପ। ଏହି ଦୁଇ ରୂପ ଦେଖିବାକୁ ସମାନ ହୋଇଥିଲେ ମଧ୍ୟ ପରସ୍ପରର ଦର୍ପଣ ପ୍ରତିଛବି ଭଳି ଭିନ୍ନ ହୋଇଥାଏ। ମଣିଷର ବାମ ଓ ଡାହାଣ ହାତ ଏହାର ସରଳ ଉଦାହରଣ।
ରାସାୟନିକ ପ୍ରତିକ୍ରିୟାରେ ସାଧାରଣତଃ ଏହି ଦୁଇ ରୂପ ସମାନ ପରିମାଣରେ ତିଆରି ହେବାର ସମ୍ଭାବନା ରହିଥାଏ। କିନ୍ତୁ ପ୍ରକୃତିରେ ଜୀବନ ସମ୍ବନ୍ଧୀୟ ଅନେକ ଅଣୁରେ ଗୋଟିଏ ରୂପକୁ ଅଧିକ ପସନ୍ଦ କରାଯାଏ। ଏହି ବିଶେଷତାକୁ ବୁଝିବା ରସାୟନ ବିଜ୍ଞାନର ଏକ ଦୀର୍ଘଦିନର ପ୍ରଶ୍ନ ଥିଲା।ସୋଆଇଙ୍କ ଗବେଷଣାରେ ଅଟୋକାଟାଲିସିସ୍ ଗୁରୁତ୍ୱପୂର୍ଣ୍ଣ ଭୂମିକା ନେଇଛି। ଏହି ପ୍ରକ୍ରିୟାରେ ରାସାୟନିକ ପ୍ରତିକ୍ରିୟାରୁ ତିଆରି ହେଉଥିବା ପଦାର୍ଥ ନିଜେ ପୁଣି ସେହି ପ୍ରତିକ୍ରିୟାକୁ ଆହୁରି ଆଗକୁ ବଢ଼ାଇଥାଏ।ଫଳରେ ଆରମ୍ଭରେ ଥିବା ଏକ ଅତି କ୍ଷୁଦ୍ର ପାର୍ଥକ୍ୟ ମଧ୍ୟ ଧୀରେ ଧୀରେ ବଡ଼ ଅସମାନତାରେ ପରିଣତ ହୋଇପାରେ। ଏହା ମାଧ୍ୟମରେ ଗୋଟିଏ ଅଣୁରୂପ କିପରି ଅନ୍ୟଟି ଉପରେ ପ୍ରାଧାନ୍ୟ ବିସ୍ତାର କରେ, ତାହା ବୁଝିବାରେ ବୈଜ୍ଞାନିକମାନେ ସଫଳ ହୋଇଛନ୍ତି।ଏହି ଗବେଷଣାର ପ୍ରଭାବ ମୌଳିକ ରସାୟନ ବିଜ୍ଞାନରେ ସୀମିତ ନୁହେଁ। ଔଷଧ ବିକାଶ ଓ ଉତ୍ପାଦନରେ ଅଣୁର ନିର୍ଦ୍ଦିଷ୍ଟ ରୂପକୁ ନିୟନ୍ତ୍ରଣ କରିବା ଅତ୍ୟନ୍ତ ଜରୁରୀ। ସମାନ ପରମାଣୁରୁ ଗଠିତ ଦୁଇଟି ପ୍ରତିବିମ୍ବ ରୂପ ଶରୀରରେ ଭିନ୍ନ ଭାବରେ କାମ କରିପାରେ। ତେଣୁ ଏହି ଆବିଷ୍କାର ଭବିଷ୍ୟତର ଔଷଧ ବିକାଶ ପାଇଁ ମଧ୍ୟ ଗୁରୁତ୍ୱ ବହନ କରେ।ନୋବେଲ୍ ପରମ୍ପରା ଅନୁଯାୟୀ, ଆସନ୍ତା ଡିସେମ୍ବର ୧୦ରେ ଷ୍ଟକହୋମ୍ରେ ସ୍ୱିଡେନ୍ର ରାଜା କାର୍ଲ ଷୋଡ଼ଶ ଗୁସ୍ତାଫ୍ ବିଜେତାମାନଙ୍କୁ ପଦକ ଓ ପ୍ରମାଣପତ୍ର ପ୍ରଦାନ କରିବେ। ଉଭୟ ବୈଜ୍ଞାନିକଙ୍କୁ ମିଳିତ ଭାବେ ୧୨ ମିଲିୟନ୍ ସ୍ୱିଡିଶ୍ କ୍ରୋନା ପୁରସ୍କାର ରାଶି ମିଳିବ।ଏହାର ପୂର୍ବଦିନ ପଦାର୍ଥ ବିଜ୍ଞାନ ପାଇଁ ମଧ୍ୟ ନୋବେଲ୍ ସମ୍ମାନ ଘୋଷଣା ହୋଇଥିଲା। ଫ୍ରାନ୍ସିସ୍ ହାଲ୍ ଜେନ୍ଙ୍କୁ ଆଇସକ୍ୟୁବ୍ ନ୍ୟୁଟ୍ରିନୋ ଅବଜରଭେଟୋରିରେ ଗୁରୁତ୍ୱପୂର୍ଣ୍ଣ ଅବଦାନ ଏବଂ ମହାକାଶରୁ ପୃଥିବୀକୁ ଆସୁଥିବା ଅତ୍ୟଧିକ ଶକ୍ତିଶାଳୀ ନ୍ୟୁଟ୍ରିନୋ କଣିକା ସମ୍ପର୍କିତ ଆବିଷ୍କାର ପାଇଁ ଏହି ସମ୍ମାନ ଦିଆଯିବ।
ନ୍ୟୁଟ୍ରିନୋ ଅତ୍ୟନ୍ତ କ୍ଷୁଦ୍ର କଣିକା। ପ୍ରତି ସେକେଣ୍ଡରେ କୋଟି କୋଟି ନ୍ୟୁଟ୍ରିନୋ ପୃଥିବୀ ଓ ଆମ ଶରୀର ମଧ୍ୟ ଦେଇ ଅତିକ୍ରମ କରୁଥିଲେ ମଧ୍ୟ ସେଗୁଡ଼ିକ ସାଧାରଣ ପଦାର୍ଥ ସହ ଅତ୍ୟନ୍ତ କମ୍ ପ୍ରତିକ୍ରିୟା କରନ୍ତି। ଏହି ରହସ୍ୟମୟ କଣିକାର ଅଧ୍ୟୟନରେ ଜେନଙ୍କ ଅବଦାନ ବିଜ୍ଞାନ ଜଗତରେ ନୂଆ ଦିଗ ଖୋଲିଛି।
