ସବୁ କଲେଜରେ ଆଇସିସି ଗଠନ ବାଧ୍ୟତାମୂଳକ

ଭୁବନେଶ୍ୱର: ସମସ୍ତ ସରକାରୀ, ବେସରକାରୀ ଅନୁଦାନପ୍ରାପ୍ତ କଲେଜରେ ଆଭ୍ୟନ୍ତରୀଣ ଅଭିଯୋଗ କମିଟି (ଆଇସିସି) ଗଠନକୁ ଗୁରୁତ୍ୱ ଦିଆଯିବ । ଯେଉଁଠି ଆଇସିସି ନାହିଁ ସେଠାରେ ତୁରନ୍ତ ଗଠନ କରିବାକୁ ନିର୍ଦ୍ଦେଶ ହୋଇଛି । ଏଥିସହ ସମସ୍ତ କଲେଜକୁ ଆଇସିସି କମିଟିର କାର୍ଯ୍ୟକାରୀ ତଥ୍ୟ ପ୍ରଦାନ କରିବାକୁ ନିର୍ଦ୍ଦେଶ ଦିଆଯାଇଛି। ଏନେଇ ଉଚ୍ଚଶିକ୍ଷା ବିଭାଗ ପକ୍ଷରୁ ସମସ୍ତ ସରକାରୀ, ବେସରକାରୀ ଅନୁଦାନପ୍ରାପ୍ତ ଓ ଅଣଅନୁଦାନପ୍ରାପ୍ତ ପ୍ରଫେସନାଲ କଲେଜର ଅଧ୍ୟକ୍ଷଙ୍କୁ ଚିଠି କରାଯାଇଛି ।
ଭୁବନେଶ୍ୱର ଆଞ୍ଚଳିକ ଶିକ୍ଷା ନିର୍ଦ୍ଦେଶାଳୟ ପକ୍ଷରୁ ସମସ୍ତ କଲେଜକୁ ଆଇସିସିର ତଥ୍ୟ ପ୍ରଦାନ କରିବାକୁ ନିର୍ଦ୍ଦେଶ ହୋଇଛି । ଯଦି ଏଥିରେ କୌଣସି ଶିକ୍ଷାନୁଷ୍ଠାନ ଖିଲାପ କରନ୍ତି ସେ ୨୦୨୬-୨୭ ଶିକ୍ଷାବର୍ଷରେ ନାମଲେଖା ପ୍ରକ୍ରିୟାରୁ ବାଦ ପଡ଼ିବେ । ଚିଠିରେ କୁହାଯାଇଛି, ସମସ୍ତ ଉଚ୍ଚଶିକ୍ଷାନୁଷ୍ଠାନରେ ଆଇସିସି ଗଠନ କରିବା ବାଧ୍ୟତାମୂଳକ । ଏଥିରେ ଶିକ୍ଷାନୁଷ୍ଠାନର ଛାତ୍ରଛାତ୍ରୀ, ଅଧ୍ୟାପକ, ଅଧ୍ୟାପିକା ଓ କର୍ମଚାରୀମାନେ ନିଜର ଅଭିଯୋଗ କରିବେ । କମିଟି ଏହାକୁ ସମାଧାନ କରିବ । ଯେଉଁ ଶିକ୍ଷାନୁଷ୍ଠାନରେ ଆଇସିସି ନାହିଁ ସେଠାରେ ଗଠନ କରିବାକୁ ନିର୍ଦ୍ଦେଶ ହୋଇଛି ।

ଯେଉଁ ଶିକ୍ଷାନୁଷ୍ଠାନ ମାନଙ୍କରେ ଆଇସିସି ରହିଛି, ତାହା କିପରି କାର୍ଯ୍ୟକ୍ଷମ କରୁଛି ତାର ସବିଶେଷ ତଥ୍ୟ ମାଗିଛି ବିଭାଗ । ୭ ଦିନ ମଧ୍ୟରେ ଅର୍ଥାତ୍ ୧୭ ତାରିଖ ମଧ୍ୟରେ ଏହାର ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଛି । ଏହି ରିପୋର୍ଟ ଦେବାରେ ଯେଉଁ ଶିକ୍ଷାନୁଷ୍ଠାନ ଅବହେଳା କରିବେ ତାଙ୍କୁ ଚଳିତ ୨୦୨୬- ୨୭ ଶିକ୍ଷାବର୍ଷରେ ନାମଲେଖାରୁ ବାଦ ଦିଆଯିବ । ଆବଶ୍ୟକ ହେଲେ କଠୋର କାର୍ଯ୍ୟାନୁଷ୍ଠାନ ନିଆଯିବ ।