Garvita Odia
ଭୁବନେଶ୍ୱର: ପୁଣି ଆନେ୍ଦାଳନ ଡାକରା ଦେଇଛି ବିଜୁ ଜନତା ଦଳ ବା ବିଜେଡି । ଆସନ୍ତା ୨୩ ତାରିଖ ଦିନ ବିଜୁ ଜନତା ଦଳ ବିଧାନସଭା ଘେରାଉ କରିବ । ଏନେଇ ଶନିବାର ଦଳ ପକ୍ଷରୁ ସୂଚନା ଦିଆଯାଇଛି । ପଞ୍ଚାୟତିରାଜ ବ୍ୟବସ୍ଥାରେ ଜନପ୍ରତିନିଧିଙ୍କ କ୍ଷମତାକୁ ସଙ୍କୁଚିତ କରାଯିବାକୁ ନେଇ ବିଜେଡି ବିଧାନସଭା ଘେରିବ । ଶନିବାର ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଏନେଇ ସୂଚନା ଦେଇଛନ୍ତି ଦେବୀ ମିଶ୍ର, ପ୍ରମିଳା ମଲ୍ଲିକ ଓ ଅରୁଣ ସାହୁ । ଏହି ଘେରାଉ କାର୍ଯ୍ୟକ୍ରମରେ ଜିଲ୍ଲା ପରିଷଦ ଅଧ୍ୟକ୍ଷ, ବ୍ଲକ ଅଧ୍ୟକ୍ଷ, ସରପଞ୍ଚ ଓ ସ୍ୱାର୍ଡମେମ୍ବରମାନେ ସାମିଲ ହେବେ ।
ସାମ୍ବାଦିକ ସମ୍ମିଳନୀରେ ଆହୁରି କୁହାଯାଇଛି ଯେ, “ବିକଶିତ ଓଡ଼ିଶା ନାଁରେ ଆଉ ଏକ ପ୍ରକଳ୍ପ କରି ତାକୁ ବି ଦିଆଯାଉ ନାହିଁ। ତଳ ସ୍ତରରେ ଚାପ ସୃଷ୍ଟି କରାଯାଇ ପଂଚାୟତ ସ୍ତରର ନେତାଙ୍କୁ ବିଲ ଦିଆଗଲା ନାହିଁ । ପଞ୍ଚାୟତିରାଜ ବ୍ୟବସ୍ଥାକୁ ଧ୍ୱଂସ କରାଯାଉଛି। ବିଜେଡି ନିରବ ଦ୍ରଷ୍ଟା ହୋଇ ରହିବ ନାହିଁ। ବିଧାନସଭା ଭିତରେ ଓ ବାହାରେ ଆନ୍ଦୋଳନ କରିବ। ଜିଲ୍ଲା ପରିଷଦଙ୍କୁ ଅବହେଳା କରାଯାଉଛି, ବ୍ଲକ ଅଧ୍ୟକ୍ଷଙ୍କ କ୍ଷମତାକୁ ସଙ୍କୁଚିତ କରାଯାଇଛି। ଏବେ ଅଧ୍ୟକ୍ଷ ହେବେ ରବର ଷ୍ଟାମ୍ପ। ୮୫୪ ଜିଲ୍ଲା ପରିଷଦ ସଭ୍ୟ ମଧ୍ୟରୁ ବିଜେଡିର ୭୦୦ ରୁ ଅଧିକ ସଦସ୍ୟ ଜିତିଥିଲେ। ୨୭୦ରୁ ଅଧିକ ବ୍ଲକରେ ବିଜେଡି ସମର୍ଥିତ ଅଧ୍ୟକ୍ଷ। ସେହିଭଳି ୮୦ ଭାଗରୁ ଅଧିକ ବିଜେଡି ସମର୍ଥିତ ସମିତି ସଭ୍ୟ ଓ ଅନ୍ୟ ପଂଚାୟତ ପ୍ରତିନିଧି ରହିଛନ୍ତି। ଏବେ ୧୦ ଲକ୍ଷ ଯାଏ ବିଲ୍ ବ୍ଲକ ଅଧ୍ୟକ୍ଷ ଅନୁମୋଦନ କରିପାରିବେ ନାହିଁ। ବିଡ଼ିଓ କରିବେ। ଓଡିଶା ପଂଚାୟତ ସମିତି ଆକ୍ଟ କହୁଛି ଯେ, ବିଡ଼ିଓ ଏକଜେକ୍ୟୁଟିଭ ଅଫିସର। ଅଧ୍ୟକ୍ଷ ହେଉଛନ୍ତି ଏକଜେକ୍ୟୁଟିଭ ଅଥରିଟି। ଅଫିସର ଏବେ ଉପରେ ରହିବେ। ବାବୁ ଶାସନ ଆରମ୍ଭ କରିଦେଲେ ସରକାର। ଅଧ୍ୟକ୍ଷ ଏବେ ପଙ୍ଗୁ। ପ୍ରକଳ୍ପ ଗ୍ରାମସଭାରୁ ପାସ ହୋଇ ଆସିବ ବୋଲି ସରକୁଳାର ଦେଲେ। ଆମ ଓଡ଼ିଶା ନବୀନ ଓଡ଼ିଶାରେ ତଲରୁ ଉପର ଯାଏ ଆସୁଥିଲା। କିନ୍ତୁ ବିଜେପି ଜିଲା ପରିଷଦକୁ କାଟିଦେଲେ। ସରପଞ୍ଚ, ୱାର୍ଡ ମେମ୍ବର ଓ ଜିଲ୍ଲା ପରିଷଦ କ୍ଷମତା ଅପହରଣ କରି ଜିଲ୍ଲାପାଳ ଓ ଶାସକ ଦଳର ବିଧାୟକଙ୍କୁ କ୍ଷମତା ଦିଆଗଲା। ନିର୍ବାଚିତ ପ୍ରତିନିଧିଙ୍କ କ୍ଷମତାକୁ ହତ୍ୟା କଲେ।”
