କ୍ୟାବିନେଟ: ଦୁଇଟି ଶ୍ରମ ଆଇନରେ ସଂଶୋଧନ: କାର୍ୟ୍ୟ ଅବଧି ବୃଦ୍ଧି

ଭୁବନେଶ୍ୱର: ରାଜ୍ୟରେ ଦ୍ରୁତ ଶିଳ୍ପାୟନ ଓ ବ୍ୟବସାୟ ନିମନ୍ତେ ଅନୁକୂଳ ପରିବେଶ ସୃଷ୍ଟି କରିବା ଉଦ୍ଦେଶ୍ୟରେ ‘ଓଡ଼ିଶା ଦୋକାନ ଓ ବାଣିଜ୍ୟିକ ପ୍ରତିଷ୍ଠାନ ଆଇନ-୧୯୫୬ ଓ କାରଖାନା ଆଇନ-୧୯୪୮ ସଂଶୋଧନ ପ୍ରସ୍ତାବକୁ ରାଜ୍ୟ କ୍ୟାବିନେଟ୍ ମଞ୍ଜୁରୀ ଦେଇଛନ୍ତି । ଓଡିଶା ଦୋକାନ ଏବଂ ବାଣିଜ୍ୟିକ ପ୍ରତିଷ୍ଠାନ ଆଇନ-୧୯୫୬ର ପ୍ରାବଧାନ ଅନୁସାରେ ୨୦ କିମ୍ୱା ତା’ଠୁ ଅଧିକ କମର୍ଚାରୀଙ୍କୁ ନିୟୋଜିତ କରିଥିବା ଦୋକାନ ଓ ବାଣିଜ୍ୟିକ ପ୍ରତିଷ୍ଠାନ ପାଇଁ ଲାଗୁ ହେବ । ସମସ୍ତ ଦୋକାନ ଏବଂ ବାଣିଜ୍ୟିକ ପ୍ରତିଷ୍ଠାନ ନିଜର କମର୍ଚାରୀଙ୍କ ସଂଖ୍ୟାକୁ ଓଡ଼ିଆ ସାଇନ ବୋର୍ଡରେ ପ୍ରଦର୍ଶନ କରିବେ । କର୍ମଚାରୀଙ୍କ ଦୈନିକ କାର୍ୟ୍ୟ ଅବଧିକୁ ୯ଘଣ୍ଟାରୁ ୧୦ଘଣ୍ଟାକୁ ବୃଦ୍ଧି କରାଯାଇଛି । କୌଣସି କମର୍ଚାରୀ କୌଣସି ଦିନରେ ୧୦ ଘଣ୍ଟାରୁ ଅଧିକ କିମ୍ୱା କୌଣସି ସପ୍ତାହରେ ୪୮ ଘଣ୍ଟାରୁ ଅଧିକ କାର୍ୟ୍ୟ କରିବେ ନାହିଁ । ଯଦି ସେ ଅଧିକ ଅବଧି ପାଇଁ କାର୍ୟ୍ୟ କରନ୍ତି, ତେବେ ତାଙ୍କୁ ଓଭରଟାଇମ୍ ବାବଦରେ ସେ ପାଉଥିବା ସାଧାରଣ ମଜୁରୀ ତୁଳନାରେ ଘଣ୍ଟା ପିଛା ଦୁଇଗୁଣ ଅଧିକ ପାରିଶ୍ରମିକ ପାଇବାକୁ ହକଦାର ହେବ । ତେବେ ପ୍ରତି ୩ମାସରେ ସର୍ବାଧିକ ୧୪୪ଘଣ୍ଟା ଓଭରଟାଇମ୍ ଜଣେ କର୍ମଚାରୀ କରିପାରିବେ । କର୍ମଚାରୀଙ୍କ କାର୍ୟ୍ୟ ଅବଧି ଅତି କମରେ ଅଧଘଣ୍ଟାର ବ୍ୟବଧାନ ବିନା ନିରନ୍ତର ୬ ଘଣ୍ଟାରୁ ଅଧିକ ହେବନାହିଁ । ପ୍ରତିଷ୍ଠାନ ଗୁଡିକ ଦିନରାତି ୨୪ ଘଣ୍ଟା ଓ ବର୍ଷକୁ ୩୬୫ ଦିନ ଖୋଲା ରହିପାରିବ । ମହିଳା କର୍ମଚାରୀମାନେ ଚାହିଁଲେ ଲିଖିତ ସମ୍ମତି ଦେଇ ରାତିରେ କାର୍ୟ୍ୟ କରିପାରିବେ । ଓ ରାଜ୍ୟ ସରକାରଙ୍କ ଦ୍ୱାରା ଅଧିସୂଚିତ ସୁରକ୍ଷା ସର୍ତ୍ତାବଳୀ ଅନୁଯାୟୀ ସେମାନଙ୍କୁ ରାତ୍ରିରେ ନିୟୋଜିତ କରାଯାଇପାରିବ ।