ଟ୍ରେଡ୍‌ ଡିଲ୍‌ ପରେ ଭାରତ-ଆମେରିକା ବୈଠକ

ନୂଆଦିଲ୍ଲୀ; ଭାରତୀୟ ବୈଦେଶିକ ମନ୍ତ୍ରୀ ଏସ. ଜୟଶଙ୍କର ମଙ୍ଗଳବାର ଆମେରିକାର ଗସ୍ତ କରିଛନ୍ତି। ଗସ୍ତର ପ୍ରଥମ ଦିନରେ, ସେ ଆମେରିକାର ଅର୍ଥ ସଚିବ ସ୍କଟ୍ ବେସାଣ୍ଟ ଏବଂ ବୈଦେଶିକ ସଚିବ ମାର୍କୋ ରୁବିଓଙ୍କ ସହିତ ଦୁଇଟି ଗୁରୁତ୍ୱପୂର୍ଣ୍ଣ ବୈଠକ କରିଛନ୍ତି । ଏହି ବୈଠକଗୁଡ଼ିକରେ ବାଣିଜ୍ୟ, ଶକ୍ତି, ପରମାଣୁ ସହଯୋଗ, ପ୍ରତିରକ୍ଷା, ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥ ଏବଂ ପ୍ରଯୁକ୍ତିବିଦ୍ୟା ଭଳି କ୍ଷେତ୍ରରେ ଭାରତ-ଆମେରିକା ସହଭାଗୀତାକୁ ଆହୁରି ମଜବୁତ କରିବା ଉପରେ ଆଲୋଚନା କରାଯାଇଥିଲା ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ଆଲୋଚନା ପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ସହିତ ଏକ ପ୍ରମୁଖ ବାଣିଜ୍ୟ ଚୁକ୍ତି ଘୋଷଣା କରିବାର ଗୋଟିଏ ଦିନ ପରେ ଜୟଶଙ୍କରଙ୍କ ୩ ଦିନିଆ ଗସ୍ତ କରିଛନ୍ତି । ଚୁକ୍ତି ଅନୁଯାୟୀ, ଭାରତୀୟ ସାମଗ୍ରୀ ଉପରେ ପାରସ୍ପରିକ ଶୁଳ୍କ ୨୫% ରୁ ୧୮% କୁ ହ୍ରାସ କରାଯାଇଛି, ଯାହା ତୁରନ୍ତ କାର୍ଯ୍ୟକାରୀ ହେବ।
ୱାସିଂଟନରେ ଆମେରିକା ବୈଦେଶିକ ସଚିବ ମାର୍କୋ ରୁବିଓଙ୍କୁ ଭେଟିଛନ୍ତି ବୈଦେଶିକ ମନ୍ତ୍ରୀ ଏସ୍‌ ଜୟଶଙ୍କର । ଐତିହାସିକ ଟ୍ରେଡ୍ ଡିଲ୍‌ ପରେ ଉଭୟଙ୍କ ମଧ୍ୟରେ ଆଲୋଚନା ହୋଇଛି । ଏ ନେଇ ଏକ୍ସରେ ସୂଚନା ଦେଇଛନ୍ତି ଜୟଶଙ୍କର ଆଞ୍ଚଳିକ ଏବଂ ବିଶ୍ୱସ୍ତରୀୟ ପ୍ରସଙ୍ଗକୁ ନେଇ ବିସ୍ତୃତ ଆଲୋଚନା ହୋଇଛି । ‘ବାଣିଜ୍ୟ, ଶକ୍ତି, ପରମାଣୁ, ପ୍ରତିରକ୍ଷା, ପ୍ରଯୁକ୍ତିବିଦ୍ୟା ପ୍ରସଙ୍ଗରେ ଆଲୋଚନା ହୋଇଥିବା ଜଣାପଡିଛି । ଉଭୟ ପକ୍ଷ ସହଭାଗୀ ସ୍ୱାର୍ଥକୁ ଆଗକୁ ବଢ଼ାଇବା ପାଇଁ ଶୀଘ୍ର ପୃଥକ ପ୍ରତିଷ୍ଠାନ ବୈଠକ କରିବାକୁ ରାଜି ହୋଇଛନ୍ତି । ମାର୍କୋ ରୁବିଓ ତାଙ୍କ ପୋଷ୍ଟରେ କହିଛନ୍ତି ଯେ, ଏହି ବୈଠକ ବିଶେଷ ଭାବରେ ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥର ଅନୁସନ୍ଧାନ ଏବଂ ନୂତନ ଆର୍ଥିକ ସୁଯୋଗ ଖୋଲିବା ଉପରେ ଧ୍ୟାନ ଦିଆଯାଇଛି ।
ଭାରତର ବୈଦେଶିକ ମନ୍ତ୍ରୀ ଜୟଶଙ୍କର ଆମେରିକାର ଅର୍ଥ ସଚିବ ସ୍କଟ୍ ବେସେଣ୍ଟଙ୍କ ସହ ଏକ ସାକ୍ଷାତ ସହିତ ତାଙ୍କ ଗସ୍ତ ଆରମ୍ଭ କରିଥିଲେ । ଜଣେ ଆଲୋଚନା ଅଧିକାରୀ କହିଛନ୍ତି ଯେ, ଏକ ନୂତନ ଭାରତ-ଆମେରିକା ଅର୍ଥନୈତିକ ଚୁକ୍ତିନାମାକୁ ଚୂଡ଼ାନ୍ତ କରିବା ପାଇଁ ଏହା ଗୁରୁତ୍ୱପୂର୍ଣ୍ଣ । ରବିବାର ଘୋଷଣା ହୋଇଥିବା ପ୍ରମୁଖ ବାଣିଜ୍ୟ ଚୁକ୍ତିର ସୂକ୍ଷ୍ମ ବିନ୍ଦୁଗୁଡ଼ିକୁ ଚୂଡ଼ାନ୍ତ କରିବା ଦିଗରେ ଏହି ଆଲୋଚନାଗୁଡ଼ିକୁ ଏକ ଆବଶ୍ୟକୀୟ ପଦକ୍ଷେପ ଭାବରେ ବର୍ଣ୍ଣନା କରାଯାଇଛି । ବୈଠକ ପରେ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ପୋଷ୍ଟ କରି ଜୟଶଙ୍କର କହିଛନ୍ତି ଯେ, ଦୁଇ ଦେଶ ମଧ୍ୟରେ ଅର୍ଥନୈତିକ ସହଭାଗୀତା ଏବଂ ରଣନୈତିକ ସହଯୋଗକୁ ଆଗକୁ ବଢ଼ାଇବା ଉପରେ ଉପଯୋଗୀ ଆଲୋଚନା ହୋଇଛି । ଟ୍ରେଜେରୀ ବିଭାଗ ସହିତ ଏହି ଆଲୋଚନା ରାଜନୈତିକ ନିଷ୍ପତ୍ତିଗୁଡ଼ିକୁ ନୀତିରେ ପରିଣତ କରିବାରେ ସାହାଯ୍ୟ କରିବ, ବିଶେଷକରି ବାଣିଜ୍ୟ ସୁବିଧା, ବଜାର ପ୍ରବେଶ ଏବଂ ନିୟମାବଳୀର ସମନ୍ୱୟ ଭଳି ପ୍ରସଙ୍ଗରେ ସହାୟକ ହେବ ।