Garvita Odiaନୂଆପଡ଼ା ଜିଲା କୋମନା ରେଞ୍ଜ ନାଗପଡ଼ା ପଞ୍ଚାୟତ ଝରଣାମାଲ ଗାଁରେ ଖଡ଼ିଆଳ ବନ ବିଭାଗ ଚଢାଉ କରି ୩ କିଲୋଗ୍ରାମ ୧୩୦ ଗ୍ରାମ ବଜ୍ରକାପ୍ତା କାତି ଜବତ କରିଛି। ଏଥିରେ ସମ୍ପୃକ୍ତ ୪ ଅଭିଯୁକ୍ତଙ୍କୁ ଗିରଫ କରାଯାଇଛି। ସେମାନେ ହେଲେ ବୋଡେନ ଥାନା ଝରଣାମାଲ ଗାଁର ଚତୁର୍ଭୁଜ କଟା(୭୧) ଓ ନରହରି ଗହୀର (୭୦), ସିନାପାଲି ଥାନା ଗୋବିନ୍ଦପୁର ଗାଁର କୁମୁଦ ହଂସ(୩୮) ଓ ସନ୍ତୋଷ ହଂସ(୨୮)।
ମିଳିଥିବା ସୂଚନା ମୁତାବକ, ମାସେ ତଳେ ବୋଡେନ ଥାନା ନାଗପଡ଼ା ପଞ୍ଚାୟତ ଝରଣାମାଇ ଗାଁ ନିକଟ ବାଜିନୀ ପ୍ରସ୍ତାବିତ ସଂରକ୍ଷିତ ଜଙ୍ଗଲରେ ଏକାଧିକ ବ୍ରଜକାପ୍ତାକୁ ଚତୁର୍ଭୁଜ ଓ ନରହରି ଶୀକାର କରିଥିଲେ। ପରେ ସେମାନେ ବଜ୍ରକାପ୍ତା କାତି ବାହାର କରି ଗଚ୍ଛିତ ରଖିବା ସହ ବିକ୍ରି ପାଇଁ ଗ୍ରାହକ ଖୋଜୁଥିଲେ। ଗତ ୧୮ ତାରିଖରେ ଏହି କାତି କିଣିବାକୁ ଗୋବିନ୍ଦପୁର ଗାଁର ବ୍ୟବସାୟୀ କୁମୁଦ ଓ ସନ୍ତୋଷ ଝରଣାମାଲ ଗାଁକୁ ଯାଇଥିଲେ। ଏହି ଖବର ପାଇ ଖଡ଼ିଆଳ ଡିଏଫ୍ଓ ଆଜିଜ ଖାନ୍ଙ୍କ ନିର୍ଦ୍ଦେଶ କ୍ରମେ ବନ ବିଭାଗ ଟିମ୍ ଝରଣାମାଲ ଗାଁରେ ଚଢାଉ କରିଥିଲା। ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ବେଳେ ଜାମିନ ନାମଞ୍ଜୁର ହେବାରୁ ବିଚାର ବିଭାଗୀୟ ହାଜତକୁ ପଠାଇ ଦେଇଥିବା ବନ ବିଭାଗ ସୂତ୍ରରୁ ସୂଚନା ମିଳିଛି ।
