ସତ କଥା ନ ଲେଖି ଧମକେଇକି ଆଇନ ଦେଖାଉଛନ୍ତି : ପ୍ରମିଳା ମଲ୍ଲିକ

ଭୁବନେଶ୍ବର :ବିଜେଡି ପକ୍ଷରୁ ଜାରି କରାଯାଇଥିବା କାରଣ ଦର୍ଶାଅ ନୋଟିସର ୬ ବିଧାୟକ ଉତ୍ତର ରଖିବା ପରେ ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ ତା’ର ଜବାବ ଦେଇଛନ୍ତି । ସେ କହିଛନ୍ତି,ଚିଠି ଗୋଟେ ଅଫିସରୁ ବସି ଟାଇପ ହେଇଛି। ଯେଉଁମାନେ କିଣିକି ନେଇଛନ୍ତି ସେମାନେ ଲେଖିଛନ୍ତି ଏମାନେ ଦସ୍ତଖତ କରିଛନ୍ତି। ଆଇନ କ’ଣ ଏକା ସେମାନଙ୍କ ପାଇଁ । ନିଅନ୍ତୁ କ’ଣ ଆଇନର ଆଶ୍ରୟ ନେବେ । ଚୋରି କରି ଭୋଟ ଦେଲେ । ଦଳ ବିରୁଦ୍ଧରେ କାହିଁକି ଭୋଟ ଦେଲେ ଆମେ ମାଗିଥିଲୁ କିନ୍ତୁ ସତ କଥା ନ ଲେଖି ଧମକେଇକି ଆଇନ ଦେଖାଉଛନ୍ତି ।

ସତ ଲେଖୁନାହାନ୍ତି କାହିଁକି ଭୋଟ ଦେଲେ । ଦଳ ଟିକେଟ ନେଲାବେଳେ କାହିଁକି ବିବେକ ନଥିଲା। ସଭାପତି ନିଷ୍ପତି ନେବେ କାର୍ୟ୍ୟାନୁଷ୍ଠାନ ପାଇଁ। ବୈଠକରେ କଣ ନିଷ୍ପତ୍ତି ନିଆଯାଇଥିଲା କାହିଁକି ଲୁଚାଉଛନ୍ତି । ଦଳ ଫିଲଟର ହେଉଛି ସବୁ ଅଳିଆ ବାହାରିଗଲେ ସ୍ଵଚ୍ଛ ହେବ ।

ସୂଚନା ଅନୁସାରେ, ରାଜ୍ୟସଭା ନିର୍ବାଚନରେ କ୍ରସ୍ ଭୋଟିଂକୁ ନେଇ ବିଜେଡି ଦଳର ୬ ଜଣ ବିଧାୟକଙ୍କୁ କାରଣ ଦର୍ଶାଅ ନୋଟିସ୍ ଜାରି କରିଥିଲା । ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକଙ୍କ ତରଫରୁ ଜାରି ହୋଇଥିବା ନୋଟିସ୍ରେ ୨୦ତାରିଖ ଅପରାହ୍ନ ୫ଟା ସୁଦ୍ଧା କାରଣ ଦର୍ଶାଇବା ପାଇଁ ଉଲ୍ଲେଖ ରହିଥିଲା । ବାଲିଗୁଡ଼ା ବିଧାୟକ ଚକ୍ରମଣି କହଁର, ଜୟଦେବ (ଭୁବନେଶ୍ବର) ବିଧାୟକ ନବ କିଶେର ମଲ୍ଲିକ, କଟକ-ଚୌଦ୍ବାର ବିଧାୟକ ସୌଭିକ ବିଶ୍ବାଳ, ବସ୍ତା ବିଧାୟକ ସୁବାସିନୀ ଜେନା, ତିର୍ତ୍ତୋଲ ବିଧାୟକ ରମାକାନ୍ତ ଭୋଇ, ବାଙ୍କୀ ବିଧାୟକ ଦେବୀ ରଂଜନ ତ୍ରିପାଠୀଙ୍କୁ ନୋଟିସ୍ ଜାରି ହୋଇଥିଲା।