ସରକାରୀ ମେଡିକାଲ କଲେଜଗୁଡ଼ିକରେ ପ୍ରଶାସନିକ ସ୍ତରରେ ପରିବର୍ତ୍ତନ

ଭୁବନେଶ୍ୱର: ଓଡ଼ିଶା ସରକାର ରବିବାର ରାଜ୍ୟର ପ୍ରମୁଖ ସରକାରୀ ମେଡିକାଲ କଲେଜଗୁଡ଼ିକରେ ପ୍ରଶାସନିକ ସ୍ତରରେ ପରିବର୍ତ୍ତନ କରିଛନ୍ତି । ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଜାରି କରିଥିବା ନିର୍ଦେଶ (ନୋଟିଫିକେଶନ୍) ଅନୁସାରେ, ବର୍ତ୍ତମାନ ପିଆରଏମ ମେଡିକାଲ କଲେଜ, ବାରିପଦାର ଡିନ୍ ଓ ପ୍ରିନ୍ସିପାଲ ଥିବା ପ୍ରଫେସର (ଡାକ୍ତର) ପ୍ରତିଭା ପଣ୍ଡାଙ୍କୁ କଟକର ଏସସିବି ମେଡିକାଲ କଲେଜର ନୂତନ ଡିନ୍ ଓ ପ୍ରିନ୍ସିପାଲ ଭାବେ ନିଯୁକ୍ତ କରାଯାଇଛି ।ଏହାସହିତ ଏସସିବି ମେଡିକାଲ କଲେଜର ଅର୍ଥୋପେଡିକ୍ସ ବିଭାଗର ପ୍ରଫେସର ଓ ବିଭାଗମୁଖ୍ୟ ଡାକ୍ତର ନିର୍ମଳ ଚନ୍ଦ୍ର ମହାପାତ୍ରଙ୍କୁ ପିଆରଏମ ମେଡିକାଲ କଲେଜ, ବାରିପଦାର ଡିନ୍ ଓ ପ୍ରିନ୍ସିପାଲ ଭାବେ ନିଯୁକ୍ତି ଦିଆଯାଇଛି ।ବର୍ତ୍ତମାନ ଏସସିବି ମେଡିକାଲ କଲେଜର ଡିନ୍ ଓ ପ୍ରିନ୍ସିପାଲ ଥିବା ପ୍ରଫେସର (ଡାକ୍ତର) ଲୁସି ଦାସଙ୍କୁ ସିଟିଭିଏସ୍ ବିଭାଗର ପ୍ରଫେସର ପଦବୀରେ ପୋଷ୍ଟିଂ କରାଯାଇଥିବା ବେଳେ ଏଥିସହ ସେ ଓବସ୍ଟେଟ୍ରିକ୍ସ ଓ ଗାଇନିକୋଲୋଜି ବିଭାଗର ମୁଖ୍ୟ ଭାବେ କାମ କରିବେ ।ଏହାସହ, ଏସସିବି ମେଡିକାଲ କଲେଜର ଫୋରେନ୍ସିକ୍ ମେଡିସିନ୍ ଓ ଟକ୍ସିକୋଲୋଜି ବିଭାଗର ପ୍ରଫେସର ଓ ବିଭାଗମୁଖ୍ୟ ଡା. ଜ୍ୟୋତିଷ ଚନ୍ଦ୍ର ଚୌଧୁରୀଙ୍କୁ ଏସସିବି ମେଡିକାଲ କଲେଜ ଓ ହସ୍ପିଟାଲର ସୁପରିଣ୍ଟେଣ୍ଡେଣ୍ଟ ଭାବେ ନିଯୁକ୍ତ କରାଯାଇଛି ।
ଅନ୍ୟପଟେ ଜିଏମସିଏଚ୍ ସୁନ୍ଦରଗଡ଼ର ଅର୍ଥୋପେଡିକ୍ସ ପ୍ରଫେସର ଡା. ସତ୍ୟଜିତ ରାୟଙ୍କୁ କଟକର ଏସସିବି ମେଡିକାଲ କଲେଜକୁ ବଦଳି କରାଯାଇଛି । ସେହିପରି, ଏମକେସିଜି ମେଡିକାଲ କଲେଜ, ବ୍ରହ୍ମପୁରରୁ ଡେପ୍ୟୁଟେସନ୍‌ରେ ଏସସିବିରେ କାମ କରୁଥିବା ଅସୋସିଏଟ୍ ପ୍ରଫେସର ଡା. ତପସ କୁମାର ପାଣିଗ୍ରାହୀଙ୍କୁ ଜିଏମସିଏଚ୍ ସୁନ୍ଦରଗଡ଼କୁ ବଦଳି କରାଯାଇଛି ।