ବିଶ୍ୱରେ କେବେ କେଉଁଠି ପାଳନ ହୁଏ ଶ୍ରମିକ ଦିବସ

ଭୁବନେଶ୍ବର: ଭାରତରେ ଶ୍ରମିକ ଦିବସ ପାଳନ କରିବାର ପରମ୍ପରା ପ୍ରାୟ ଏକ ଶତାବ୍ଦୀ ପୁରୁଣା। ଦେଶରେ ପ୍ରଥମ କରି ୧ ମଇ, ୧୯୨୩ ରେ ଚେନ୍ନାଇ ଠାରେ ‘ଲେବର କିଷାନ ପାର୍ଟି ଅଫ୍ ହିନ୍ଦୁସ୍ତାନ’ ଦ୍ୱାରା ପାଳିତ ହୋଇଥିଲା ଶ୍ରମିକ ଦିବସ । ସେହି ସମୟରେ ପ୍ରଥମ କରି ‘ଲାଲ୍ ପତାକା’ ବ୍ୟବହାର କରାଯାଇଥିଲା, ଯାହା ଶ୍ରମିକଙ୍କ ସଂଘର୍ଷ ଏବଂ ଏକତାର ପ୍ରତୀକ ପାଲଟିଥିଲା। ସାରା ବିଶ୍ୱରେ ଏହି ଦିବସର ଆରମ୍ଭ ୧୯ଶ ଶତାବ୍ଦୀର ଶେଷ ଭାଗରେ ଆମେରିକାର ଶିକାଗୋରେ ହୋଇଥିବା ‘ହେମାର୍କେଟ’ ଘଟଣାରୁ ହୋଇଥିଲା, ଯେଉଁଠାରେ ଶ୍ରମିକମାନେ କାମର ସମୟକୁ ୧୫ ଘଣ୍ଟାରୁ କମାଇ ୮ ଘଣ୍ଟା କରିବା ଦାବିରେ ଆନ୍ଦୋଳନ କରିଥିଲେ।
ଭାରତ ସମେତ ବିଶ୍ୱର ପ୍ରାୟ ୮୦ରୁ ଅଧିକ ଦେଶରେ ଶ୍ରମିକ ଦିବସ ୧ ମଇରେ ହିଁ ପାଳନ କରାଯାଏ। ଆମେରିକା ଓ କାନାଡାରେ ଲେବର ଡେ ସେପ୍ଟେମ୍ବର ମାସର ପ୍ରଥମ ସୋମବାର ଦିନ ପାଳନ କରାଯାଏ। ଅଷ୍ଟ୍ରେଲିଆରେ ଅଲଗା ଅଲଗା ରାଜ୍ୟରେ ଭିନ୍ନ ଭିନ୍ନ ତାରିଖରେ ଶ୍ରମିକ ଦିବସ ପାଳନ କରାଯାଏ, ଯାହା ମୁଖ୍ୟତଃ ମାର୍ଚ୍ଚ କିମ୍ବା ଅକ୍ଟୋବରରେ ପଡ଼ିଥାଏ। ତେବେ ଭାରତ ଭଳି ଚୀନ୍ ରେ ୧ ମଇରେ ପାଳନ କରାଯାଏ ଶ୍ରମିକ ଦିବସ ।