କଟା ତରଭୁଜ ଖାଇବା ପୂର୍ବରୁ ସାବଧାନ! ଗ୍ରୀଷ୍ମରେ ବଢୁଛି ବ୍ୟାକ୍ଟେରିଆ ସଂକ୍ରମଣ

ଗ୍ରୀଷ୍ମ ଋତୁରେ ଅସାବଧାନତାର ସହିତ କଟା ତରଭୁଜ ଖାଇବା ଏବେ ଅନେକଙ୍କ ପାଇଁ ବିପଦର କାରଣ ହେଉଛି। ଭୁଲ ସଂରକ୍ଷଣ ଓ ଖାଦ୍ୟ ପରିଷ୍କାରକୁ ଅଣଦେଖା କରିବାରୁ ଖାଦ୍ୟରେ ବିଷାକ୍ତତା ବଢୁଛି । ଗୁରୁତର ଅସୁସ୍ଥତା ଏବଂ କେତେକ ମାମଲାରେ ମୃତ୍ୟୁ ଘଟଣା ମଧ୍ୟ ସାମ୍ନାକୁ ଆସୁଛି ।ଗ୍ରୀଷ୍ମ ଋତୁ ଆସିଲେ ବଜାରରେ ତରଭୁଜର ଚାହିଦା ବଢ଼ିଯାଏ। ରସାଳ ଏବଂ ଥଣ୍ଡା ଏହି ଫଳ ଶରୀରକୁ ହାଇଡ୍ରେଟ୍ ରଖିବା ସହ ଗରମରୁ ମଧ୍ୟ ଆରାମ ଦେଇଥାଏ। କିନ୍ତୁ ଖାଦ୍ୟ ବିଶେଷଜ୍ଞମାନଙ୍କ ମତରେ, କଟା ତରଭୁଜକୁ ଅସାବଧାନତାର ସହିତ ରଖିବା କିମ୍ବା ଖାଇବା ସ୍ୱାସ୍ଥ୍ୟ ପାଇଁ ବିପଦଜନକ ହୋଇପାରେ।
ବିଶେଷଜ୍ଞଙ୍କ କହିବା ଅନୁସାରେ, ସମ୍ପୂର୍ଣ୍ଣ ତରଭୁଜ ଏହାର ମୋଟା ଖୋଳ ଯୋଗୁଁ ଦୀର୍ଘ ସମୟ ପର୍ଯ୍ୟନ୍ତ ସୁରକ୍ଷିତ ରହେ। କିନ୍ତୁ ଥରେ କାଟିଦେଲେ ତାହାର ଭିତର ଅଂଶ ବାୟୁ, ହାତ, ଛୁରୀ ଓ ଅନ୍ୟାନ୍ୟ ସ୍ଥାନରେ ଥିବା ଜୀବାଣୁଙ୍କ ସଂସ୍ପର୍ଶରେ ସହଜରେ ଆସିଯାଏ। ତରଭୁଜରେ ଅଧିକ ପାଣି ଓ ପ୍ରାକୃତିକ ଶର୍କରା ଥିବାରୁ ଏହା ଜୀବାଣୁ ବୃଦ୍ଧି ପାଇଁ ଉପଯୁକ୍ତ ପରିବେଶ ସୃଷ୍ଟି କରିଥାଏ। ଯଦି କଟା ତରଭୁଜକୁ ଦୀର୍ଘ ସମୟ ବାହାରେ ରଖାଯାଏ, ତେବେ ସାଲମୋନେଲା ଓ ଲିଷ୍ଟେରିଆ ଭଳି କ୍ଷତିକାରକ ବ୍ୟାକ୍ଟେରିଆ ବଢ଼ିପାରେ।ଏହି ବ୍ୟାକ୍ଟେରିଆ ଦ୍ୱାରା ପେଟ ଯନ୍ତ୍ରଣା, ବାନ୍ତି, ଡାଇରିଆ, ଜ୍ୱର ଓ ଡିହାଇଡ୍ରେସନ୍ ଭଳି ସମସ୍ୟା ସୃଷ୍ଟି ହୋଇପାରେ। ବିଶେଷ କରି ପିଲା, ବୃଦ୍ଧ, ଗର୍ଭବତୀ ମହିଳା ଏବଂ ଦୁର୍ବଳ ରୋଗ ପ୍ରତିରୋଧକ ଶକ୍ତି ଥିବା ଲୋକଙ୍କ ପାଇଁ ଏହା ଅଧିକ ବିପଦପୂର୍ଣ୍ଣ ହୋଇଥାଏ।

ବିଶେଷଜ୍ଞଙ୍କ ମତରେ, କଟା ତରଭୁଜକୁ ସର୍ବଦା ଏକ ଏୟାରଟାଇଟ୍ ପାତ୍ରରେ ରଖିବା କିମ୍ବା ଭଲଭାବେ ଘୋଡ଼ାଇ ଫ୍ରିଜରେ ସଂରକ୍ଷଣ କରିବା ଉଚିତ। କଟା ତରଭୁଜକୁ ୧ରୁ ୨ ଦିନ ମଧ୍ୟରେ ଖାଇଦେବା ସର୍ବୋତ୍ତମ ବୋଲି ବିଶେଷଜ୍ଞମାନେ କହିଛନ୍ତି।ଏଥିସହିତ ତରଭୁଜ କାଟିବା ପୂର୍ବରୁ ଏହାର ଖୋଳକୁ ଭଲଭାବେ ପାଣିରେ ଧୋଇବା ଆବଶ୍ୟକ। ଅନେକେ ଏହି ପଦକ୍ଷେପକୁ ଅନଦେଖା କରିଥାନ୍ତି, ଯାହା ଫଳରେ ଖୋଳରେ ଥିବା ଜୀବାଣୁ ଛୁରୀ ମାଧ୍ୟମରେ ଫଳ ଭିତରକୁ ପ୍ରବେଶ କରିପାରେ। ସେହିପାଇଁ ସଫା ଛୁରୀ, କଟିଙ୍ଗ ବୋର୍ଡ ଓ ପାତ୍ର ବ୍ୟବହାର କରିବା ଆବଶ୍ୟକ।