Garvita Odia
ଦେବଗଡ଼: ଦୃଢ ଇଚ୍ଛାଶକ୍ତି ଓ ନିଜ ଉପରେ ଆତ୍ମବିଶ୍ବାସ ଥିଲେ ଜୀବନରେ କିଛି ବି ଅସୁବିଧା ଥାଉ ନାଁ କାହିଁକି ସବୁ ସମ୍ଭବ ହୋଇପାରିବ । ଉକ୍ତ କଥାକୁ ପ୍ରମାଣ କରି ଦେଖାଇଛନ୍ତି ପୌରାଚଂଳର ଜଣେ ଦିବ୍ୟାଙ୍ଗ ଦମ୍ପତି । ଫିନାଇଲ ବିକ୍ରି କିରି ସମାଜର ମୁଖ୍ୟସ୍ରୋତରେ ସାମିଲ ହେବା ସହିତ ହୋଇଛନ୍ତି ସ୍ୱାବଲମ୍ବୀ। ସୂଚନା ଅନୁଯାୟୀ, ପୌରାଚଂଳର ଶନି ମନ୍ଦିର ସମ୍ମୁଖରେ ଏକ ଛୋଟ ଘରେ ରହୁଛନ୍ତି ଦିବ୍ୟାଙ୍ଗ ଦମ୍ପତ୍ତି ରୁଦ୍ର ପ୍ରତାପ ଭୁକ୍ତା ଓ ତାଙ୍କ ସ୍ତ୍ରୀ ବୁଦୁନି ଭୁକ୍ତା । ରୁଦ୍ର ପିଲା ଦିନୁ ଏକ ଦୁର୍ଘଟଣାରେ ନିଜର ସମ୍ପୂର୍ଣ୍ଣ ଦୃଷ୍ଟିଶକ୍ତି ହରାଇଛନ୍ତି । ତାଙ୍କ ସ୍ତ୍ରୀ ବୁଦୁନିଙ୍କୁ ମଧ୍ୟ ସ୍ବଳ୍ପ ଦେଖାଯାଏ । ଏହି ଦମ୍ପତ୍ତି ଜଣକ କାହା ଉପରେ ନିର୍ଭରଶୀଳ ହୋଇନାହାନ୍ତି । ନିଜ ଗୋଡରେ ଠିଆ ହୋଇ ବେଶ ଦୁଇ ପାଇସା ରୋଜଗାର କରିପାରୁଛନ୍ତି । ଏମାନଙ୍କ ଦୃଢ଼ ଇଛାଶକ୍ତି ଓ ନିଷ୍ଠା ଆଗରେ ହାର ମାନିଛି ଶାରୀରିକ ଅକ୍ଷମତା । ସାଧାରଣ ମଣିଷଙ୍କ ଭଳି ଏମାନେ ମଧ୍ୟ ନିଜ ପାଇଁ ନିଜେ ରୋଜଗାର କରିବାରେ ସକ୍ଷମ ହୋଇଛନ୍ତି ।ପ୍ରଥମେ ରୁଦ୍ର ୨୦୧୭ରେ ଭୁବନେଶ୍ବରରେ ଉତ୍କଳ ଦୃଷ୍ଟିହୀନ ସଂଘ ସହାୟତାରେ ଫିନାଇଲ ଓ ବ୍ଲିଚିଂ ପ୍ରସ୍ତୁତିର ଟ୍ରେନିଂ ନେଇଥିଲେ । ୨୦୧୯ରେ ସେ ଉକ୍ତ ଟ୍ରେନିଂ ସମାପ୍ତ କରିଥିଲେ । ଏହା ପରେ ବିଗତ କିଛିମାସ ହେଲା ପୌରାଚଂଳର ଶନି ମନ୍ଦିର ପାଖରେ ରହୁଥିବା ତାଙ୍କ ଘର ସମ୍ମୁଖରେ ଏକ ଷ୍ଟଲ ଖୋଲି ସେଠାରେ ନିଜ ହାତ ତିଆରି ଫିନାଇଲ ଓ ବ୍ଳଚିଂ ପାଉଡର ବିକ୍ରିକରି ରୋଜଗାରକ୍ଷମ ହୋଇଛନ୍ତି ଦମ୍ପତ୍ତି ଜଣକ । ଏହି ବ୍ୟବସାୟରୁ ଯେତିକ ଉପାର୍ଜନ ହେଉଛି ସେଥୁରୁ ବୃ୍ଦ୍ଧା ବାପାମାଆଙ୍କ ସେବା ଶ୍ରୁଶ୍ରୁଷା କରିବା ସହିତ ପରିବାର ଚଳାଉଥିବା ରୁଦ୍ର ପ୍ରତାପ କହିଛନ୍ତି ।ଏହାସହିତ ତାଙ୍କ ତ୍ସୀ ବୁଦୁନୀଙ୍କୁ ସ୍ବଳ୍ପ ଦେଖାଯାuଥିଲେ ମଧ୍ୟ ସେ ବି କୌଣସି ଗୁଣରେ କମ ନୁହଁନ୍ତି । ସେ ମହିଳା ଦୃଷ୍ଟିହୀନ କ୍ରିକେଟ ସଂଘ ପକ୍ଷରୁ ରାଜ୍ୟ ତଥା ଓଡିଶା ବାହାରେ ମଧ୍ୟ କ୍ରିକେଟ ଖେଳି ସାରିଛନ୍ତି । କିନ୍ତୁ ବର୍ତ୍ତମାନ ପରିସ୍ଥିତିରେ ତାଙ୍କୁ ସ୍ବଳ୍ପ ଦେଖାଯାଉଥିସେବାରୁ ଆଉ ଆଗ ପରି କ୍ରିକେଟ ଖେଳି ପାରୁନାହଁନ୍ତି । ଦମ୍ପତ୍ତିଙ୍କ ଏହି ପ୍ରୟାସ ସେମାନଙ୍କୁ ସ୍ବାବଲମ୍ବୀ କରିବା ସହିତ ସମାଜ ପାଇଁ ଏକ ଉଦାହରଣ ସୃଷ୍ଟି କରିଛି । ଏହି ଦିବ୍ୟାଙ୍ଗ ଦମ୍ପତିଙ୍କୁ ସରକାରୀ ପ୍ରୋତ୍ସାହନ ଯୋଗାଇ ଦିଆଗଲେ ସେମାନେ ତାଙ୍କ ବ୍ୟବସାୟକୁ ଅଧିକ ବୃଦ୍ଧି କରିବା ସହିତ ଅନ୍ୟପାଇଁ ରୋଜଗାର ପନ୍ଥା ସୃଷ୍ଟି କରିପାରିବେ ବୋଲି ସାଧାରଣରେ ମତପ୍ରକାଶ ପାଇଛି ।
