Garvita Odia
ବାରିପଦା: ଶିମିଳିପାଳ ଦକ୍ଷିଣ ଡିଭିଜନର ଉପରବାରାହା କାମୁଡା ରେଞ୍ଜରେ ବିରଳ ପ୍ରଜାତି କଳା ବାଘୁଣୀର ମୃତଦେହ ଠାବ ହୋଇଛି l ଗତ ୬ ତାରିଖ ସନ୍ଧ୍ୟା ୫ ଟା ସମୟରେ ପାଟ୍ରୋଲିଂ କରୁଥିବା ଷ୍ଟାଫ୍ ପ୍ରାୟ ୫ ବର୍ଷର ଏକ ମାଈ ମେଲାନିଷ୍ଟିକ ବାଘର ମୃତଦେହ ଠାବ କରିଥିଲେ। ଖବର ପାଇବା ମାତ୍ରେ ଶିମିଳିପାଳ ଟାଇଗର ରିଜର୍ଭର କ୍ଷେତ୍ର ନିର୍ଦ୍ଦେଶକ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ।ଜାତୀୟ ବ୍ୟାଘ୍ର ସଂରକ୍ଷଣ ପ୍ରାଧିକରଣର ମାନକ କାର୍ଯ୍ୟପ୍ରଣାଳୀ ଅନୁଯାୟୀ ଗତ ୭ ତାରିଖରେ ଏକ ବିଶେଷଜ୍ଞ ଦଳ ଦ୍ୱାରା ବାଘର ମୃତଦେହକୁ ବ୍ୟବଚ୍ଛେଦ କରାଯାଇଥିଲା। ଏହି ଦଳରେ ଶିମିଳିପାଳ ଟାଇଗର ରିଜର୍ଭର କ୍ଷେତ୍ର ନିର୍ଦ୍ଦେଶ, ଜଣେ ପଶୁ ଚିକିତ୍ସକ, ୱାଇଲ୍ଡଲାଇଫ ଟ୍ରଷ୍ଟ ଅଫ୍ ଇଣ୍ଡିଆର ଜଣେ ପଶୁ ଚିକିତ୍ସକ, ଠାକୁରମୁଣ୍ଡାର ଜଣେ ପଶୁ ଚିକିତ୍ସକ ଏବଂ ମହାରାଷ୍ଟ୍ର ଜଣେ ସହକାରୀ ଅଧ୍ୟାପକ ସାମିଲ ଥିଲେ। ପ୍ରାଥମିକ ପରୀକ୍ଷାରୁ ବାଘର ଶରୀରେ କୌଣସି ଆଘାତ ଚିହ୍ନ ମିଳିନାହିଁ। ତଥାପି ମୃତ୍ୟୁର ପ୍ରକୃତ କାରଣ ଜାଣିବା ପାଇଁ ବିଭିନ୍ନ ଜୈବିକ ନମୁନା ସଂଗ୍ରହ କରି ଭୁବନେଶ୍ୱର ଓୟୁଏଟିର ସେଣ୍ଟର ଫର ୱାଇଲ୍ଡଲାଇଫ ହେଲଥକୁ ବିସ୍ତୃତ ଲାବୋରେଟରି ପରୀକ୍ଷା ପାଇଁ ପଠାଯାଇଛି। ରିପୋର୍ଟ ହାତକୁ ଆସିବା ପରେ ହିଁ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହୋଇପାରିବ ବୋଲି ଶିମିଳିପାଳ କ୍ଷେତ୍ର ନିର୍ଦ୍ଦେଶକ ଡ଼ ପ୍ରକାଶ ଚାନ୍ଦ ଗୋଗିନେନି କହିଛନ୍ତି l
ବ୍ୟବଚ୍ଛେଦ ସରିବା ପରେ ସମସ୍ତ ନିୟମ ଅନୁଯାୟୀ ବାଘର ମୃତଦେହକୁ ପୋଡି ଦିଆଯାଇଛି। ପୋଷ୍ଟମର୍ଟମରୁ ଆରମ୍ଭ କରି ମୃତଦେହକୁ ପୋଡିବା ପର୍ଯ୍ୟନ୍ତ ସମସ୍ତ ପ୍ରକ୍ରିୟାର ଭିଡିଓ ଏବଂ ଫଟୋ ମଧ୍ୟ ରେକର୍ଡ କରାଯାଇଛି। ବିଶ୍ୱରେ କେବଳ ଶିମିଳିପାଳରେ ହିଁ ଏପରି କଳା ବାଘ ଦେଖିବାକୁ ମିଳୁଥିବାରୁ ଏହି ଘଟଣା ବ୍ୟାଘ୍ର ସଂରକ୍ଷଣ କ୍ଷେତ୍ରେ ନିଶ୍ଚିତ ଭାବେ ଏକ ବଡ଼ କ୍ଷତି ବୋଲି ବନ ବିଭାଗ କହିଛି।
