ରାଜ୍ୟର ୪ଟି ସ୍ଥାନରେ ନୂଆ କଲେଜଖୋଲିବ ଓୟୁଏଟି

ଭୁବନେଶ୍ୱର : ରାଜ୍ୟରେ କୃଷି ଓ କୃଷକଙ୍କ ଉନ୍ନତି ପାଇଁ ଗଢ଼ା ଯାଇଥିବା ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ (ଓୟୁଏଟି) ଦିନକୁ ଦିନ କଳେବର ବୃଦ୍ଧି କରି ଚାଲିଛି । ଅଧିକରୁ ଅଧିକ ଚାଷୀଙ୍କୁ ସାହାଯ୍ୟ କରିବାକୁ ବ୍ଲୁ ପ୍ରିଣ୍ଟ୍ ପ୍ରସ୍ତୁତି କରି ଚାଲିଛନ୍ତି ଓୟୁଏଟି କର୍ତ୍ତୃପକ୍ଷ । ଆଉ ସେଥିରେ ମୋହର ମାରୁଛନ୍ତି ଉଭୟ ରାଜ୍ୟ ଓ କେନ୍ଦ୍ର ସରକାର । ଏବେ ଏଥିରେ ଆଉ ଏକ ନୂଆ ଫର୍ଦ୍ଦ ଯୋଡ଼ି ହେବ । ଓୟୁଏଟି ରାଜ୍ୟର ୪ଟି ସ୍ଥାନରେ ଖୋଲିବ ନୂଆ କଲେଜ । ସେଥି ମଧ୍ୟରୁ ୨ଟି କୃଷି ମହାବିଦ୍ୟାଳୟ, ଗୋଟିଏ ପଶୁ ଚିକିତ୍ସା ଓ ପଶୁପାଳନ ମହାବିଦ୍ୟାଳୟ ଓ ଗୋଟିଏ ମତ୍ସ୍ୟ ମହାବିଦ୍ୟାଳୟ । ମୟୂରଭଞ୍ଜରେ ୬୦ ସିଟ୍ ବିଶିଷ୍ଟ କୃଷି ମହାବିଦ୍ୟାଳୟ ହେବ । ସେହି ମହାବିଦ୍ୟାଳୟରେ ଚଳିତବର୍ଷରୁ ପାଠପଢ଼ା ଆରମ୍ଭ ପାଇଁ ସମସ୍ତ ପ୍ରକ୍ରିୟା ଆରମ୍ଭ ହୋଇଯାଇଛି । ନାମଲେଖା ଆରମ୍ଭ ହେବା ସହିତ ଉଭୟ ଶିକ୍ଷକ ଓ ଅଣଶିକ୍ଷକ ନିଯୁକ୍ତି ପ୍ରକ୍ରିୟା ବି ଜାରି ରହିଛି । ସମସ୍ତ କଲେଜ ଭଳି ଏଠାରେ ବି ଡିନ୍ଠୁ ଆରମ୍ଭ କରି ପ୍ରଫେସର, ଆସୋସିଏଟ୍ ପ୍ରଫେସର, ଆସିଷ୍ଟାଣ୍ଟ ପ୍ରଫେସର, କିରାଣି, ପିଅନ୍, ଲାଇବ୍ରେରିଆନ୍ ନିଯୁକ୍ତ ହେବେ ବୋଲି କୁଳସଚିବ ପ୍ରତିଭା ଦୋରା ସୂଚନା ଦେଇଛନ୍ତି ।
ସେହିପରି ଚଳିତବର୍ଷରୁ ସମ୍ବଲପୁର ଜିଲ୍ଲାର ଚିପିଲିମା ନିକଟରେ ଥିବା କଳାମାଟି ଗାଁରେ ହେବ ପଶୁ ଚିକିତ୍ସା ଓ ପଶୁପାଳନ ମହାବିଦ୍ୟାଳୟ । ପୂର୍ବରୁ ଚିପିଲିମାରେ କୃଷି ମହାବିଦ୍ୟାଳୟ ଥିବା ବେଳେ ପୁଣି ଏଠାରେ ପଶୁ ଚିକିତ୍ସା ଓ ପଶୁପାଳନ ମହାବିଦ୍ୟାଳୟ ପ୍ରତିଷ୍ଠା କରାଯିବ । ନିର୍ମାଣ କାର୍ଯ୍ୟ ସରିବା ପର୍ଯ୍ୟନ୍ତ ଚିପିଲିମାରେ ଥିବା ଗୋଶାଳାରେ ଅସ୍ଥାୟୀ ଭାବେ କଲେଜ ଚାଲିବ । ଏହି କଲେଜ ଖୋଲିବା ପାଇଁ ଭାରତୀୟ ପ୍ରାଣୀ ଚିକିତ୍ସା ପରିଷଦ(ଭେଟେରିନାରୀ କାଉନସିଲ୍ ଅଫ୍ ଇଣ୍ଡିଆ)ର ଅନୁମତି ଲୋଡ଼ାଯାଇଛି । ଏହା ମିଳିବା ପରେ ଚଳିତବର୍ଷରୁ ପାଠପଢ଼ା ଆରମ୍ଭ ହେବା ସହିତ ଉଭୟ ଶିକ୍ଷକ ଓ ଅଣଶିକ୍ଷକ ନିଯୁକ୍ତି ପ୍ରକ୍ରିୟା ଆରମ୍ଭ ହେବ ।
ସୋନପୁରରେ ମତ୍ସ୍ୟ ମହାବିଦ୍ୟାଳୟ ପ୍ରତିଷ୍ଠା ହେବା ସହିତ କୃଷି ବିଭାଗ ଦାୟିତ୍ୱରେ ଥିବା ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂହଦେଓଙ୍କ ନିଜ ଜିଲ୍ଲା ବଲାଙ୍ଗୀରରେ ମଧ୍ୟ ଗୋଟିଏ ନୂଆ କୃଷି ମହାବିଦ୍ୟାଳୟ ପ୍ରତିଷ୍ଠା ହେବ । ତେବେ ରାଜ୍ୟରେ ଦୁଇଟି କୃଷି ମହାବିଦ୍ୟାଳୟ ଓ ଗୋଟିଏ ମତ୍ସ୍ୟ ମହାବିଦ୍ୟାଳୟ ଖୋଲିବା ବାବଦରେ ଭାରତୀୟ କୃଷି ଗବେଷଣା ପରିଷଦ(ଆଇସିଏଆର୍) ଅନୁମତି ଦେବ । ସେ ନେଇ ଆବେଦନ କରାଯାଇଛି । ଏହି ସମସ୍ତ ୪ଟି ଯାକ କଲେଜ ଖୋଲିବା ପାଇଁ ରାଜ୍ୟ ସରକାର ଅନୁମତି ପ୍ରଦାନ କରିବା ସହିତ ଅଗ୍ରୀମ ଅର୍ଥ ଦେଇ ସାରିଛନ୍ତି ।

ତେବେ ଅନୁମତି ମିଳିବା ପରେ ଓୟୁଏଟି ପକ୍ଷରୁ ସମସ୍ତ ପ୍ରକାର ପ୍ରକ୍ର୍ରିୟା ଆରମ୍ଭ ହୋଇଥିବା କୁଳସଚିବ ଶ୍ରୀମତୀ ଦୋରା ସୂଚନା ଦେଇଛନ୍ତି । ତେବେ କୁଳପତି ପ୍ରଫେସର ପ୍ରଭାତ କୁମାର ରାଉଳଙ୍କ ନିର୍ଦ୍ଦେଶ ଅନୁସାରେ ଏ ନେଇ ବିଶ୍ୱବିଦ୍ୟାଳୟ ପକ୍ଷରୁ ବିଧିବଦ୍ଧ ଭାବେ ବିଜ୍ଞପ୍ତି ପ୍ରକାଶ ପାଇଛି । ରାଜ୍ୟ କୃଷି ଓ କୃଷକ ସଶକ୍ତିକରଣ ବିଭାଗ ପକ୍ଷରୁ ଚଳିତବର୍ଷ ଜୁଲାଇ ୨୨ ତାରିଖରେ ଅନୁମୋଦନ ମିଳିଥିବା ବେଳେ ଓୟୁଏଟିର ପରିଚାଳନା ବୋର୍ଡ (ବୋଡ୍ ଅଫ୍ ମ୍ୟାନେଜମେଣ୍ଟ) ଫେବ୍ରୁଆରୀ ୨୧ରୁ ଏ ନେଇ ନିଷ୍ପତ୍ତି ସରିଛି । ଗତ ଜୁଲାଇ ୩୧ରେ ଏ ନେଇ ଏକାଡେମିକ୍ କାଉନସିଲରେ ସଂକଳ୍ପ ପାରିତ ହୋଇଥିବା ବେଳେ ଅଗଷ୍ଟ ୫ ତାରିଖରେ ଚୂଡାନ୍ତ ନିଷ୍ପତ୍ତି ହୋଇଛି । ଏହା ସହିତ ଉପରୋକ୍ତ ୪ଟି ଯାକ କଲେଜରେ ୨୦୨୬-୨୭ ଶିକ୍ଷାବର୍ଷରୁ ପାଠପଢ଼ା ଆରମ୍ଭ ହେବ ବୋଲି ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ବିଜ୍ଞପ୍ତି ପ୍ରକାଶ କରିଛନ୍ତି ।