Garvita Odia
ଭୁବନେଶ୍ବର: କର୍କଟ ଯୁଦ୍ଧରେ ହାରିଗଲେ ୨୦୦୩ ବ୍ୟାଚ୍ ଓଡ଼ିଶା କ୍ୟାଡର ଆଇପିଏସ୍ ଅଧିକାରୀ ଶେଫିନ୍ ଅହମ୍ମଦ କେ । କେରଳମ୍ର ଥିରୁଅନନ୍ତପୁରମ୍ ସ୍ଥିତ ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ସୋମବାର ତାଙ୍କର ପରଲୋକ ଘଟିଛି । ଶେଫିନ୍ ଦୀର୍ଘଦିନ ଧରି କର୍କଟ ରୋଗରେ ପୀଡ଼ିତ ଥିଲେ । ମୃତ୍ୟୁ ବେଳକୁ ତାଙ୍କୁ ୫୦ ବର୍ଷ ବୟସ ହୋଇଥିଲା ।
ଶେଫିନ୍ ଅହମ୍ମଦ କେରଳମର ମୂଳ ବାସିନ୍ଦା ଥିଲେ । ଇଞ୍ଜିନିୟରିଂରେ ସ୍ନାତକ ହାସଲ କରିବା ପରେ ସେ ଭାରତୀୟ ପୋଲିସ ସେବାରେ ଯୋଗ ଦେଇଥିଲେ । ସେ କ୍ରାଇମବ୍ରାଞ୍ଚର ଆଇଜି ଭାବେ ୨୦୨୩ ଜୁଲାଇରୁ କାର୍ଯ୍ୟରତ ଥିଲେ । ତେବେ ପ୍ରାଥମିକ ସୂଚନା ଅନୁଯାୟୀ, ଆସନ୍ତାକାଲି(ମଙ୍ଗଳବାର) ତାଙ୍କ ମରଶରୀରକୁ ଶେଷକୃତ୍ୟ ପାଇଁ ଜନ୍ମସ୍ଥାନ କୋଲ୍ଲମର ଓଚିରାକୁ ନିଆଯିବ ।ଶେଫିନଙ୍କ ବାପା ହବିବ୍ ଜଣେ CITU ନେତା ଥିଲେ । କ୍ୟାରିୟରରେ ଶେଫିନ୍ କେରଳମରେ ମଧ୍ୟ ଇଣ୍ଟର-କ୍ୟାଡର ଡେପୁଟେସନ୍ରେ ଦୀର୍ଘବର୍ଷ କାର୍ଯ୍ୟ କରିଥିଲେ । ଏହି ସମୟରେ ସେ ଥିରୁଅନନ୍ତପୁରମ୍ ରୁରାଲ୍ର ଏସ୍ପି ଭାବେ ମଧ୍ୟ ଦାୟିତ୍ୱ ତୁଲାଇଥିଲେ । ଓଡ଼ିଶା ପୋଲିସରେ ତାଙ୍କର ଦୀର୍ଘ କାର୍ଯ୍ୟକାଳ ମଧ୍ୟରେ ସେ ବିଭିନ୍ନ ଗୁରୁତ୍ୱପୂର୍ଣ୍ଣ ପଦରେ ରହିଥିଲେ। ବିଶେଷକରି ସାଇବର କ୍ରାଇମ୍ ଏବଂ CID କ୍ରାଇମବ୍ରାଞ୍ଚରେ ତାଙ୍କର ଉଲ୍ଲେଖନୀୟ ସେବା ପାଇଁ ସେ ବିଭିନ୍ନ ସମ୍ମାନ ଓ ପଦକ ପାଇଥିଲେ ।
