Garvita Odia
ସୁନ୍ଦରଗଡ଼ : ଡାକ୍ତରଖାନାରୁ ଫେରାର କଏଦୀ ଗିରଫ । ଜିଲ୍ଲା ମୁଖ୍ୟ ଚିକିତ୍ସାଳୟରୁ ଗତ ୨୫ ତାରିଖ ରାତିରେ ଫେରାର ହୋଇଯାଇଥିବା ବିଚାରାଧୀନ କଏଦୀ ଟେକଚାନ୍ଦ ବେହେରା (୨୪) ଙ୍କୁ ୫ ଦିନ ପରେ ପୁଲିସ୍ ଧରିବାରେ ସଫଳ ହୋଇଛି । ସେ ଗାଁ ନିକଟସ୍ଥ ଜଙ୍ଗଲରେ ଲୁଚିଥିଲେ । ଟେକଚାନ୍ଦ ପତ୍ନୀଙ୍କ ସହ ଉକ୍ତ ଜଙ୍ଗଲରେ ଲୁଚି ରହିଥିଲେ । ପତ୍ନୀ ନିଜ ଘରକୁ ଲୁଚି ଲୁଚି ଯାଇ ଟେକଚାନ୍ଦଙ୍କ ପାଇଁ ଖାଦ୍ୟ ସାମଗ୍ରୀ ଆଣି ଦେଉଥିଲେ । ପତ୍ନୀଙ୍କ ଉପରେ ପୁଲିସ୍ ନଜର ରଖିଥିଲା । ମହିଳା ଜଣକ ଜଙ୍ଗଲ ଆଡ଼କୁ ଯାଉଥିବା ବେଳେ ଟାଉନ ଥାନା ଅଧିକାରୀ ସୁଶାନ୍ତ କୁମାର ପରିଡ଼ା ଓ ତଦନ୍ତକାରୀ ଅଧିକାରୀ ଭାଗୀରଥି ଜେନା ସଦଳବଳ ଜଙ୍ଗଲରେ ଚଢଉ କରି ଟେକଚାନ୍ଦଙ୍କୁ ଧରିଥିଲେ । ଟେକଚାନ୍ଦ ଫେରାର ହେବା ନେଇ ପୁଲିସ୍ ପକ୍ଷରୁ ଏକ ମାମଲା କରାଯାଇଛି ।
ସୂଚନାଯୋଗ୍ୟ, ୨ ୦ ୨ ୫ ଡିସେମ୍ବର ୨୪ ତାରିଖ ସନ୍ଧ୍ୟାରେ ରୂପାବାହାଲ ଗ୍ରାମରେ ଘଟି ଯାଇଥିବା ବିଶାଲ କାଲୋ ହତ୍ୟା ଘଟଣାରେ ପୁଲିସ ଟେକଚାନ୍ଦଙ୍କୁ ଧରିଥିଲା । ଥାନା ରେ ପଚରାଉଚରା ପରେ ୨ ଦିନ ପରେ ଅର୍ଥାତ୍ ୨୬ ତାରିଖରେ ତାଙ୍କୁ କୋର୍ଟ ଚାଲାଣ କରାଯାଇଥିଲା । କୋର୍ଟରେ ଜାମିନ ନ ମିଳିବାରୁ ତାଙ୍କୁ ସୁନ୍ଦରଗଡ଼ ଜିଲ୍ଲା କାରାଗାରରେ ବିଚାରାଧୀନ କଏଦୀ ଭାବେ ରହିଥିଲେ । ସୋମବାର ପୂର୍ବାହ୍ନରେ ସେ କାରାଗାରର ଶୌଚାଳୟକୁ ଯାଇଥିବା ବେଳେ ସେଠାରେ ପଡ଼ି ଯାଇଥିଲେ । ଏଥିରେ ତାଙ୍କ ଛାତିରେ ଯନ୍ତ୍ରଣା ହୋଇଥିଲା । ଜେଲରେ କାର୍ଯ୍ୟରତ ଡାକ୍ତର ତାଙ୍କର ପ୍ରାଥମିକ ଚିକିତ୍ସା ପରେ ଅଧିକ ଚିକିତ୍ସା ପାଇଁ ଜିଲ୍ଲା ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର ପାଇଁ ପରାମର୍ଶ ଦେଇଥିଲେ । ଜେଲ କର୍ତୃପକ୍ଷ ଅପରାହ୍ଣ ଦେଢ଼ଟା ସମୟରେ ତାଙ୍କୁ ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଥିଲେ । ଡାକ୍ତରଖାନାର ସର୍ଜରୀ ୱାର୍ଡରେ କଡ଼ା ସୁରକ୍ଷା ବଳରେ ତାଙ୍କ ଚିକିତ୍ସା ଚାଲିଥିବା ବେଳେ ରାତି ପ୍ରାୟ ୮ଟା ୫୬ରେ ସେ ପରିସ୍ରା ଯିବା ବାହାନାରେ ଚମ୍ପଟ ମାରିଥିଲେ ।
ସୁରକ୍ଷା ଦାୟିତ୍ୱରେ ଥିବା କର୍ମଚାରୀମାନେ ତାଙ୍କୁ ଖୋଜାଖୋଜି କରି ପାଇ ନ ଥିଲେ । ଏ ନେଇ ଜେଲ ଅଧୀକ୍ଷକ ଜୀବନସିଂ ମୁଣ୍ଡା ରାତି ପ୍ରାୟ ୧୨ଟାରେ ଟାଉନ ଥାନାରେ ଏତଲା ଦେଇଥିଲେ । କାର୍ଯ୍ୟରେ ଅବହେଳା କରିଥିବା ନେଇ ଜେଲ ଅଧୀକ୍ଷକ ଶ୍ରୀ ମୁଣ୍ଡା ଡାକ୍ତରଖାନାରେ ୱାର୍ଡର ସୌମ୍ୟରଞନ କର୍ଣ୍ଣଙ୍କୁ ନିଲମ୍ବିତ କରିଥିଲେ ।
