ବଡବାରବା ପଞ୍ଚାୟତରେ ଜନଶୁଣାଣୀ

୧୪ ଅଭିଯୋଗର ଶୁଣାଣୀ, ଶୀଘ୍ର ସମାଧାନ ପାଇଁ ପ୍ରତିଶ୍ରୁତି

ରାଇକିଆ: ରାଇକିଆ ବ୍ଲକ ଅନ୍ତର୍ଗତ ବଡବାରବା ପଞ୍ଚାୟତ ସଭାଗୃହରେ ଅତିରିକ୍ତ ଗୋଷ୍ଠୀ ଉନ୍ନୟନ ଅଧିକାରୀ ଦିବ୍ୟସିଂ କଂହରଙ୍କ ଅଧ୍ୟକ୍ଷତାରେ ଜନଶୁଣାଣୀ କାର୍ଯ୍ୟକ୍ରମ ଅନୁଷ୍ଠିତ ହୋଇଛି। ଗ୍ରାମାଞ୍ଚଳର ବିଭିନ୍ନ ସମସ୍ୟା ସମେତ ନୂତନ ଯୋଜନା, ପାନୀୟଜଳ ଓ ରାସ୍ତା ସମ୍ପର୍କିତ ଅଭିଯୋଗ ଉପରେ ଆଲୋଚନା ହୋଇଥିଲା। ସମସ୍ୟାଗୁଡ଼ିକର ଯାଞ୍ଚ କରି ଶୀଘ୍ର ସମାଧାନ ଦିଗରେ ପଦକ୍ଷେପ ନେବାକୁ ଶ୍ରୀ କଂହର ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ।ଜନଶୁଣାଣୀରେ ମୋଟ ୧୪ଟି ଅଭିଯୋଗ ଦାଖଲ ହୋଇଥିଲା। ସେଥିମଧ୍ୟରୁ ୬ଟି ସାମୂହିକ ଓ ୮ଟି ବ୍ୟକ୍ତିଗତ ସମସ୍ୟା ରହିଥିଲା। ଗ୍ରାମବାସୀ ପାନୀୟଜଳ ସଂକଟ, ରାସ୍ତା ମରାମତି, ମୋବାଇଲ ନେଟୱର୍କ ସମସ୍ୟା ଓ ବିଦ୍ୟାଳୟ ପାଚେରି ନିର୍ମାଣ ଭଳି ବିଭିନ୍ନ ସମସ୍ୟା ଉପସ୍ଥାପନ କରିଥିଲେ। ଅଭିଯୋଗଗୁଡ଼ିକୁ ଶ୍ରୀ କଂହର ଗୁରୁତ୍ୱର ସହ ଶୁଣିବା ସହ ଆବଶ୍ୟକ ଯାଞ୍ଚ ପରେ ଶୀଘ୍ର ପଦକ୍ଷେପ ନିଆଯିବ ବୋଲି ଉପସ୍ଥିତ ଅଭିଯୋଗକାରୀଙ୍କୁ ଆଶ୍ୱାସନ ଦେଇଥିଲେ।ଏହି ଅବସରରେ ବଡବାରବା ସରପଞ୍ଚ ରବିଚନ୍ଦ୍ର ନାୟକ, ସମିତିସଭ୍ୟ ନାରାୟଣ ଦେଳେଇ, ପିଇଓ ବସନ୍ତ କୁମାର ପଣ୍ଡା, ଏଡିଓ ବାଦଲ କୁମାର ନାୟକ, ବ୍ଲକ ସଂଯୋଜକ କମଳ ପ୍ରସାଦ ନାୟକ, ଏଇଇ ବଣ୍ଟି କୁମାର ଚୌଧୁରୀ, ସହକାରୀ ଯନ୍ତ୍ରୀଙ୍କ ସମେତ ବ୍ଲକର ବିଭିନ୍ନ ବିଭାଗର ଅଧିକାରୀ ଉପସ୍ଥିତ ଥିଲେ।

ରିପୋର୍ଟର: ଦୁତି କୃଷ୍ଣ ପଣ୍ଡା