ପାରାଦୀପରେ ‘ସାଗର କବଚ-୨’

ପାରାଦୀପ: ଚର୍ଚ୍ଚିତ ମୁମ୍ବାଇ ୨୬/୧୧ ଆତଙ୍କବାଦୀ ଆକ୍ରମଣରୁ ଶିକ୍ଷା ନେଇ ଉପକୂଳବର୍ତ୍ତୀ ଅଞ୍ଚଳର ସୁରକ୍ଷା ବ୍ୟବସ୍ଥା କଡ଼ାକଡ଼ି । ଏହି ଉଦ୍ଦେଶ୍ୟରେ ପାରାଦୀପଠାରେ ଆରମ୍ଭ ହୋଇଛି ଦୁଇ ଦିନିଆ ମିଳିତ ସମରାଭ୍ୟାସ ‘ସାଗର କବଚ-୨’ । କେନ୍ଦ୍ର ଓ ରାଜ୍ୟ ସରକାରଙ୍କ ମିଳିତ ଉଦ୍ୟମରେ ପ୍ରତିବର୍ଷ ଦୁଇଥର ଏହି ସୁରକ୍ଷା ଅଭ୍ୟାସ ଅନୁଷ୍ଠିତ ହୋଇଥାଏ । ଚଳିତ ବର୍ଷ ଏହି ମିଳିତ ସମରାଭ୍ୟାସରେ ୧୮ରୁ ଉର୍ଦ୍ଧ୍ୱ ବିଭାଗ ସେମାନଙ୍କର ଯୁଦ୍ଧ କୌଶଳ ଓ ପ୍ରସ୍ତୁତି ପ୍ରଦର୍ଶନ କରୁଛନ୍ତି । ଗଭୀର ସମୁଦ୍ରରେ ଭାରତୀୟ ନୌସେନା, ତଟରକ୍ଷୀ ବାହିନୀ, ମତ୍ସ୍ୟ ବିଭାଗ ଏବଂ ମେରାଇନ୍ ପୁଲିସ ସମେତ ଅନ୍ୟାନ୍ୟ ଜଳଭାଗ ବିଭାଗଗୁଡ଼ିକ ସକ୍ରିୟ ଭାବେ ସାମିଲ ହୋଇଛନ୍ତି । କଷ୍ଟମ ବିଭାଗ, ଅଗ୍ନିଶମ ବିଭାଗ, ଓଡ଼ିଶା ପୋଲିସ, ବନ ବିଭାଗ, ପାରାଦୀପ ବନ୍ଦର କର୍ତ୍ତୃପକ୍ଷ, ଗୁଇନ୍ଦା ବିଭାଗ, ଓଡ୍ରାଫ୍ ଏବଂ ଏନଡିଆରଏଫ୍ ଟିମ୍ ସ୍ଥଳଭାଗରେ ସୁରକ୍ଷା ଦାୟିତ୍ୱରେ ରହିଛନ୍ତି ।
ଏହି ସମରାଭ୍ୟାସକୁ ଅଧିକ ପ୍ରଭାବଶାଳୀ କରିବା ପାଇଁ ସୁରକ୍ଷା ବାହିନୀ ଓ ଅନ୍ୟାନ୍ୟ ବିଭାଗଗୁଡ଼ିକୁ ମୁଖ୍ୟତଃ ଦୁଇଟି ଭାଗରେ ବିଭକ୍ତ କରାଯାଇଛି । ରେଡ୍ ଟିମ୍ ଓ ବ୍ଲୁ ଟିମ୍ । ରେଡ୍ ଟିମ୍ ଦଳର ସଦସ୍ୟମାନେ ଆତଙ୍କବାଦୀଙ୍କ ବେଶଧାରଣ କରି ଜଳପଥ ଦେଇ ସ୍ଥଳଭାଗରେ ପ୍ରବେଶ କରିବା ଏବଂ ଗୁରୁତ୍ୱପୂର୍ଣ୍ଣ ସ୍ଥାନରେ ଆକ୍ରମଣ ଯୋଜନା କରିବାର କୌଶଳ ପ୍ରଦର୍ଶନ କରିବେ । ବ୍ଲୁ ଟିମ୍ ଦଳ ସ୍ଥଳଭାଗରେ ସୁରକ୍ଷା ବଳୟକୁ ମଜବୁତ ରଖି ରେଡ୍ ଟିମ୍‌ର ଆକ୍ରମଣ ଉଦ୍ୟମକୁ ସଫଳତାର ସହ ପ୍ରତିରୋଧ କରିବ ଏବଂ ଶତ୍ରୁପକ୍ଷର ଆକ୍ରମଣ ଯୋଜନାକୁ ପଣ୍ଡ କରିବ । ଉପକୂଳ ସୁରକ୍ଷାର କୌଣସି ବି ଦିଗକୁ ଦୁର୍ବଳ ନ ରଖି ସମସ୍ତ ସୁରକ୍ଷା ଏଜେନ୍ସିଙ୍କ ମଧ୍ୟରେ ଏକ ସମନ୍ୱୟ ରକ୍ଷା କରିବା ହିଁ ଏହି ମିଳିତ ଅଭ୍ୟାସର ମୁଖ୍ୟ ଲକ୍ଷ୍ୟ ।