ଦେବଗଡ଼ କେନ୍ଦ୍ରୀୟ ବିଦ୍ୟାଳୟର ଛାତ୍ରୀ ଜାତୀୟ ଶିଶୁ ବିଜ୍ଞାନ କଂଗ୍ରେସ ପାଇଁ ମନୋନୀତ

ଦେବଗଡ଼:କେନ୍ଦ୍ରୀୟ ବିଦ୍ୟାଳୟ ଦେବଗଡ଼ର ଛାତ୍ରୀ ଜାତୀୟସ୍ତରୀୟ କେନ୍ଦ୍ରୀୟ ବିଦ୍ୟାଳୟ ସଂଗଠନ ଶିଶୁ ବିଜ୍ଞାନ କଂଗ୍ରେସ ପାଇଁ ମନୋନୀତ ହୋଇ ବିଦ୍ୟାଳୟ ତଥା ଜିଲ୍ଲା ପାଇଁ ଗୌରବ ଆଣିଛନ୍ତି।ଭୁବନେଶ୍ୱରସ୍ଥିତ ପିଏମ୍ ଶ୍ରୀ କେନ୍ଦ୍ରୀୟ ବିଦ୍ୟାଳୟ ନମ୍ବର ୬ରେ ଆଞ୍ଚଳିକସ୍ତରୀୟ ଜାତୀୟ ଶିଶୁ ବିଜ୍ଞାନ କଂଗ୍ରେସ ପ୍ରତିଯୋଗିତା ଅନୁଷ୍ଠିତ ପ୍ରତିଯୋଗିତାରେ ଦେବଗଡ଼ କେନ୍ଦ୍ରୀୟ ବିଦ୍ୟାଳୟର ଅଷ୍ଟମ ଶ୍ରେଣୀର ଦୁଇ ଛାତ୍ରୀ ଶ୍ରେୟାଶ୍ରୀ ଗୁରୁ ଏବଂ ଚୌରାସ୍ମିତା ସାହୁଙ୍କ ସେମାନଙ୍କର ବିଜ୍ଞାନ ପ୍ରକଳ୍ପ (ସୁରକ୍ଷିତ ବ୍ୟବହାର ଉଦ୍ଦେଶ୍ୟରେ ପ୍ରଧାନପାଟ ଝରଣା ଜଳର ବିଶୋଧନ କ୍ଷମତାର ଆକଳନ) ସଂପର୍କରେ ଉପସ୍ଥାପନ କରିଥିଲେ।ପ୍ରଧାନପାଟ ଜଳର ଭୌତ୍ତିକ ବିଶୋଧନ ଓ ମାନବ ଉପଯୋଗିତା ଉପରେ ଆଧାରିତ ଏହି ଗବେଷଣାମୂଳକ ପ୍ରକଳ୍ପଟି ବିଚାରକମାନଙ୍କ ଦ୍ୱାରା ଉଚ୍ଚ ପ୍ରଶଂସିତ ହେବା ସହ ଜାତୀୟ ସ୍ତର ପାଇଁ ମନୋନୀତ ହୋଇଛି। ଦୁଇ ଛାତ୍ରୀଙ୍କୁ ବିଦ୍ୟାଳୟର ମାର୍ଗଦର୍ଶକ ଶିକ୍ଷକ ସଞ୍ଜିତ ରଥଙ୍କ ପ୍ରତ୍ୟକ୍ଷ ତତ୍ତ୍ୱାବଧାନ ଓ ଦିଗଦର୍ଶନରେ ନିଜ ପ୍ରକଳ୍ପ କାର୍ଯ୍ୟ ସମ୍ପାଦନ କରିଥିଲେ। ଏଥିରୁ ମନୋନୀତ ହୋଇଥିବା ଛାତ୍ରୀ ଶ୍ରେୟାଶ୍ରୀ ଗୁରୁ ଆସନ୍ତା ନଭେମ୍ବର ମାସ ୧୯ ତାରିଖରେ ଅନୁଷ୍ଠିତ ହେବାକୁ ଥିବା ଜାତୀୟ ଶିଶୁ ବିଜ୍ଞାନ କଂଗ୍ରେସ ପ୍ରତିଯୋଗିତାରେ ଅଂଶ ଗ୍ରହଣ କରି ଏହି ପ୍ରକଳ୍ପ ପ୍ରଦର୍ଶିତ କରିବେ। ଛାତ୍ରୀ ଶ୍ରେୟାଶ୍ରୀ ଦେବଗଡ଼ ମୁକୁନ୍ଦ ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ଅକ୍ଷୟ ଗୁରୁ ଓ ଶିକ୍ଷୟତ୍ରୀ ସୁମିତା ମିଶ୍ରଙ୍କ ଝିଅ ଅଟନ୍ତି। ଏହି ସଫଳତା ପାଇଁ ବିଦ୍ୟାଳୟର ଅଧ୍ୟକ୍ଷ ଭଗବାନ ସାହୁଙ୍କ କୃତୀ ଛାତ୍ରୀମାନଙ୍କ ସମେତ ମାର୍ଗଦର୍ଶକ ଶିକ୍ଷକଙ୍କୁ ସାଧୁବାଦ ଜଣାଇବା ସହ ଆଗାମୀ ଜାତୀୟ ସ୍ତରୀୟ ପ୍ରତିଯୋଗିତାରେ ଉଜ୍ଜ୍ୱଳ ପ୍ରଦର୍ଶନ ପାଇଁ ଛାତ୍ରୀ ଶ୍ରେୟାଶ୍ରୀକୁ ଶୁଭେଚ୍ଛା ଜଣାଇଛନ୍ତି।