Garvita Odia
ଭୁବନେଶ୍ୱର: ନୂଆପଲ୍ଲୀ ଅଞ୍ଚଳରେ ଘରେ ପଶି ଯୁବତୀଙ୍କୁ ଦୁଷ୍କର୍ମ ମାମଲାରେ ପୁଲିସ ତ୍ୱରିତ ତଦନ୍ତ ସହ ଚାର୍ଜସିଟ୍ ଦାଖଲକୁ ଗୁରୁତ୍ୱ ଦେଉଛି । ସବୁ ଦିଗକୁ ତନ୍ନତନ୍ନ କରି ଅନୁଧ୍ୟାନ କରାଯାଉଛି । ସାକ୍ଷ୍ୟ ପ୍ରମାଣ ଯୋଗାଡି଼ବାରେ ପୁଲିସ ଦିନରାତି ଏକ କରିଦେଇଛି । ଅଭିଯୁକ୍ତ ଶ୍ରୀଧର ପଣ୍ଡାର ବୁଧବାର ଟିଆଇ ପରେଡ୍ କରାଯାଇଛି । ଆସନ୍ତା ୧୫ ଦିନ ଭିତରେ ହିଁ ମାମଲାର ଚାର୍ଜସିଟ୍ ଦାଖଲ କରାଯିବ ।
ତଦନ୍ତକାରୀ ଅଧିକାରୀ ଅଭିଯୁକ୍ତ ବିରୋଧରେ ପ୍ରମାଣ ସଂଗ୍ରହରେ ଲାଗିଛନ୍ତି । ପୀଡି଼ତାଙ୍କ ଭଡ଼ା ଘର ଆଖପାଖରୁ ଏକାଧିକ ସିସିକ୍ୟାମେରା ଫୁଟେଜ୍ ଯାଞ୍ଚ ସରିଯାଇଛି । ଘଟଣାଦିନ ଶ୍ରୀଧର ଉକ୍ତ ଘରକୁ କେତେବେଳେ ଯାଇଥିଲା ? କେତେ ସମୟ ପାଇଁ ଘରେ ଉପସ୍ଥିତ ଥିଲା? ସିସି କ୍ୟାମେରା ଫୁଟେଜ୍ରୁ ଏହା ସ୍ପଷ୍ଟ ହୋଇଯିବ । ଚାର୍ଜସିଟ୍ ଦାଖଲ ବେଳେ ସିସି କ୍ୟାମେରା ଫୁଟେଜ୍ ସହ ଅନ୍ୟାନ୍ୟ ଡିଜିଟାଲ ପ୍ରମାଣକୁ ଗୁରୁତ୍ୱ ଦେବ ପୁଲିସ । ଏହାଛଡ଼ା ପୀଡି଼ତା ଓ ଅଭିଯୁକ୍ତର ଡାକ୍ତରୀମାଇନା ରିପୋର୍ଟକୁ ମଧ୍ୟ ତର୍ଜମା ଚାଲିଛି । ପୁଲିସ ଏହାକୁ ଅନ୍ୟତମ ବଳିଷ୍ଠ ପ୍ରମାଣ ଭାବେ ଅଦାଲତରେ ଉପସ୍ଥାପନ କରିବ । ଶ୍ରୀଧରର ପୁରୁଣା ଅପରାଧିକ ରେକର୍ଡକୁ ମଧ୍ୟ ଚାର୍ଜସିଟ୍ରେ ଯୋଡ଼ାଯିବ । ଏଯାବତ୍ ତା’ ବିରୋଧରେ ଭୁବନେଶ୍ୱର ୟୁପିଡିରେ ଥିବା ୨ଟି ଚୋରି ମାମଲା ସାମ୍ନାକୁ ଆସିଛି । ଆଗକୁ ଆହୁରି ମାମଲା ବାହାରିପାରେ ବୋଲି ପୁଲିସ ଆଶା ରଖିଛି ।
ତଦନ୍ତ ପ୍ରକ୍ରିୟାରେ ଟିଆଇ ପରେଡ୍ଟି ଅଭିଯୁକ୍ତର ପରିଚୟ ସ୍ପଷ୍ଟ କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ । ବୁଧବାର ଅପରାହ୍ଣ ୩ ଟାରେ ଝାରପଡ଼ା ସ୍ୱତନ୍ତ୍ର ଜେଲ୍ ପରିସରରେ ଟିଆଇ ପରେଡ୍ ଆରମ୍ଭ ହୋଇଥିଲା । ଶ୍ରୀଧର ସହ ଅନ୍ୟ ୯ ଜଣ ବ୍ୟକ୍ତିଙ୍କୁ ଗୋଟିଏ ଧାଡିରେ ଛିଡ଼ା କରାଯାଇଥିଲା । ଜେଏମ୍ଏଫ୍ସିର ଜଣେ ବିଚାରପତିଙ୍କ ଉପସ୍ଥିତିରେ ପୀଡିତା ଜଣକ ୧୦ଜଣଙ୍କ ମଧ୍ୟରୁ ଜଣଙ୍କୁ ଦୁଷ୍କର୍ମକାରୀ ଭାବେ ଚିହ୍ନଟ କରିଥିଲେ । ଟିଆଇ ପରେଡ୍ ବେଳେ ଜେଲ୍ ୱାର୍ଡର ସହ ଅନ୍ୟ ଜଣେ ଜେଲ୍ର ଅଧିକାରୀ ଉପସ୍ଥିତ ଥିଲେ ।
ମାମଲାର ତଦନ୍ତକୁ ଦ୍ରୁତ ଗତିରେ ସାରିବାକୁ ପୁଲିସ ସବୁ ଜୋର୍ ଦେଉଛି । କେବଳ ଚାର୍ଜସିଟ୍ ଦାଖଲ ନୁହେଁ, ମାମଲାର ବିଚାର ପ୍ରକ୍ରିୟା ମଧ୍ୟ ଯେମିତି ଶୀଘ୍ର ଶେଷ ହୁଏ, ସେନେଇ ପୁଲିସ ତତ୍ପର ହୋଇଉଠିଛି । ମାମଲାକୁ ଫାଷ୍ଟଟ୍ରାକ୍ କୋର୍ଟରେ ବିଚାର କରିବାକୁ ପୁଲିସ ପକ୍ଷରୁ ଆବେଦନ କରାଯିବ ବୋଲି ଜଣେ ବରିଷ୍ଠ ପୁଲିସ ଅଧିକାରୀ ସୂଚନା ଦେଇଛନ୍ତି ।
