Garvita Odia
ଖୁବଶୀଘ୍ର ଓଲିଉଡ ସୁପରଷ୍ଟାର ଅନୁଭବ ମହାନ୍ତିଙ୍କ ଘରକୁ ଆସିବେ କୁନି ଅତିଥି । ମାଆ ହେବେ ଜାଗୃତି ଶୁକ୍ଲା । ବିବାହର ବର୍ଷେ ପରେ ଏହି ଦମ୍ପତି ଖୁସି ଖବର ଦେଇଛନ୍ତି । ନବରାତ୍ରୀର ପ୍ରଥମ ଦିନରେ ଏହି ଗୁଡ୍ ନ୍ୟୁଜ୍ ଦେଇଛନ୍ତି ଅନୁଭବ ଓ ଜାଗୃତି । ସୋସିଆଲ ମିଡିଆରେ ଏହି ଖୁସି ଖବର ଦେବା ପରେ ଦମ୍ପତିଙ୍କୁ ଛୁଟୁଛି ଶୁଭେଚ୍ଛାର ସୁଅ ।ଅନୁଭବ ଓ ଜାଗୃତି ମିଳିତ ଭାବେ ଇନଷ୍ଟାଗ୍ରାମରେ 3ଟି ଫଟୋ ସେୟାର କରିଛନ୍ତି । ପ୍ରଥମ ଫଟୋରେ ଖୁସି ଖବର ଦେଇଥିବା ବେଳେ ଦ୍ୱିତୀୟ ଫଟୋରେ ଉଭୟଙ୍କୁ ଦେଖିବାକୁ ମିଳିଛି ଏବଂ ତୃତୀୟ ଫଟୋରେ ଉଭୟଙ୍କ ବିବାହ ଫଟୋ ସାମ୍ନାରେ ଜାଗୃତି ପ୍ରେଗନେଟ୍ କିଟ୍ ଧରିଥିବାର ନଜର ଆସିଛନ୍ତି । ଏହା ସେୟାର କରି ଅନୁଭବ ଲେଖିଛନ୍ତି, ”ଏକ ସୁନ୍ଦର ନୂଆ ଅଧ୍ୟାୟର ଆରମ୍ଭ । ଆମେ ଯେତେବେଳେ ମାତାପିତା ହେବାର ଏହି ନୂଆ ଯାତ୍ରାରେ ପାଦ ଥାପୁଛୁ, ସେତେବେଳେ ଆମ ହୃଦୟ ଆପଣମାନଙ୍କ ଅସୀମ ସ୍ନେହ, ପ୍ରାର୍ଥନା ଓ ଆଶୀର୍ବାଦ ପାଇଁ କୃତଜ୍ଞତାରେ ଭରିଯାଇଛି । ଆପଣମାନଙ୍କ ଭଲପାଇବା ଓ ଆଶୀର୍ବାଦ ଆମ ପାଇଁ ଅମୂଲ୍ୟ ।”
ଏହି ଖୁସି ଖବର ଆସିବା ମାତ୍ରେ ସେଲିବ୍ରିଟି ସମେତ ଫ୍ୟାନ୍ସ ଉଭୟଙ୍କୁ ଶୁଭକାମନା ଜଣାଉଛନ୍ତି । ଅଭିନେତା ସବ୍ୟସାଚୀ ମିଶ୍ର ଲେଖିଛନ୍ତି, ଅଭିନନ୍ଦନ ଆଗକୁ ଆସୁଥିବା ଏହି ସ୍ମରଣୀୟ ଅଧ୍ୟାୟ ପାଇଁ ଅନେକ ଶୁଭେଚ୍ଛା । ମୋତେ ଲାଗୁଛି ଯେ ଏହା ଏକ ଝିଅ ହେବ । ସେହିପରି ସୁପ୍ରିୟା ନାୟକ, ପ୍ରକୃତି ମିଶ୍ର, ସୂର୍ଯ୍ୟମୟୀ ମହାପାତ୍ର, ଶୀତଲ ପାତ୍ର ସମେତ ଅନେକ କଳାକାର ତାଙ୍କୁ ଶୁଭକାମନା ଜଣାଇଛନ୍ତି ।ଗତବର୍ଷ (2025) ମାର୍ଚ୍ଚ 8 ତାରିଖରେ ଅନୁଭବ ମହାନ୍ତି ଓ ଜାଗୃତି ଶୁକ୍ଲା ପରିବାର, ସମ୍ପର୍କୀୟଙ୍କ ଉପସ୍ଥିିତିରେ ନିର୍ବନ୍ଧ କରିଥିଲେ । ଏହା ପରେ ସେହିବର୍ଷ ମାର୍ଚ୍ଚ 11ରେ ଉଭୟ ରାଜସ୍ଥାନରେ ଡେଷ୍ଟିନେସନ ୱେଡିଂ କରିଥିଲେ । ତେବେ ବିବାହର ବର୍ଷେ ପରେ ଉଭୟ ପିତାମାତା ହେବାକୁ ଯାଉଛନ୍ତି ।କହିରଖୁଛୁ କି, ଏହା ଅନୁଭବଙ୍କ ଦ୍ୱିତୀୟ ବିବାହ । ଜାଗୃତିଙ୍କ ପୂର୍ବରୁ ଅନୁଭବ ଓଲିଉଡ ଅଭିନେତ୍ରୀ ବର୍ଷା ପ୍ରିୟଦର୍ଶିନୀଙ୍କୁ ଫେବୃଆରୀ ୮, ୨୦୧୪ ବିବାହ କରିଥିଲେ । ହେଲେ ଏହି ଷ୍ଟାର ଦମ୍ପତିଙ୍କ ସମ୍ପର୍କ ବେଶି ଦିନ ତିଷ୍ଠିଲା ନାହିଁ । ଉଭୟ ପାରିବାରିକ ବିବାଦ ସହ ବିବାହ ବିଚ୍ଛେଦ ନେଇ ବିଭିନ୍ନ ମାମଲା ରୁଜୁ କରିଥିଲେ । ଏହା ପରେ ଡିସେମ୍ବର ୨୧, ୨୦୨୩ରେ ହାଇକୋର୍ଟ ଅନୁଭବ ମହାନ୍ତିଙ୍କ ଆବେଦନ ଆଧାରରେ ତାଙ୍କୁ ବିବାହ ବିଚ୍ଛେଦ ପାଇଁ ଅନୁମତି ଦେଇଥିଲେ । ଏହା ମଧ୍ୟରେ ଅନୁଭବଙ୍କ ଜାଗୃତିଙ୍କ ସହ ସମ୍ପର୍କ ନେଇ ଚର୍ଚ୍ଚା ଜୋର ଧରିଥିବା ବେଳେ ବର୍ତ୍ତମାନ ଛାଡପତ୍ର ପରେ ଜାଗୃତିଙ୍କ ହାତ ଧରିଛନ୍ତି ଅନୁଭବ ।
