କାଶୀପୁରରେ ଜନନୀ ଯନ୍ତ୍ରଣା: ଭାରରେ ୫ କିମି ବୁହା ହେଲେ ଗର୍ଭବତୀ, ମୃତ ସନ୍ତାନ ଜନ୍ମ

କାଶୀପୁର: ଖଣିଜ ସମ୍ପଦରେ ଭରପୂର ରାୟଗଡ଼ା ଜିଲ୍ଲାର କାଶୀପୁର ବ୍ଲକରେ ଥମିବାର ନାଁ ନେଉନି ଜନନୀ ଯନ୍ତ୍ରଣା । ଦୁର୍ଗମ ଅଞ୍ଚଳକୁ ରାସ୍ତାଘାଟ ସୁବିଧା ନଥିବାରୁ ଗର୍ଭବତୀଙ୍କୁ ଠିକ୍ ସମୟରେ ଚିକିତ୍ସା ସେବା ମିଳିବାରେ ବାଧା ସୃଷ୍ଟି ହେଉଛି । ଏହାର ଏକ ହୃଦୟବିଦାରକ ଚିତ୍ର ସାମ୍ନାକୁ ଆସିଛି ସୁଙ୍ଗେର ପଞ୍ଚାୟତର ମାଳିପଦର ଗ୍ରାମରୁ । ଗର୍ଭ ଯନ୍ତ୍ରଣାରେ ଛଟପଟ ହେଉଥିବା ଜଣେ ମହିଳାଙ୍କୁ ଗ୍ରାମବାସୀ ଚାଦରରେ ଭାର କରି ପ୍ରାୟ ୫ କିଲୋମିଟର ବୋହି ଆମ୍ବୁଲାନ୍ସ ପର୍ଯ୍ୟନ୍ତ ନେଇଥିଲେ । ଶେଷରେ ରାୟଗଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରେ ମହିଳା ଜଣକ ଏକ ମୃତ ସନ୍ତାନକୁ ଜନ୍ମ ଦେଇଥିବା ଜଣାପଡ଼ିଛି । ସୂଚନା ଅନୁଯାୟୀ, ମାଳିପଦର ଗ୍ରାମର ଅର୍ଜୁନ ମାଝୀଙ୍କ ପତ୍ନୀ ସୁକୁ ମାଝୀ (୩୫)ଙ୍କୁ ଗତକାଲି ଗର୍ଭ ଯନ୍ତ୍ରଣା ହୋଇଥିଲା । ଖବର ପାଇ ଆଶାକର୍ମୀ ଆମ୍ବୁଲାନ୍ସକୁ ଫୋନ୍ କରିଥିଲେ । କିନ୍ତୁ ଗ୍ରାମକୁ ଯିବା ପାଇଁ ରାସ୍ତା ନଥିବାରୁ ଆମ୍ବୁଲାନ୍ସଟି ଆଲିଗୁନା ଗ୍ରାମ ନିକଟରେ ଅଟକି ରହିଥିଲା । ଫଳରେ ପରିବାର ସଦସ୍ୟ ଓ ଗ୍ରାମବାସୀ ମିଶି ଚାଦରରେ ସୁକୁଙ୍କୁ ଭାର କରି ଦୁର୍ଗମ ପାହାଡ଼ିଆ ରାସ୍ତା ଦେଇ ପ୍ରାୟ ୫ କିଲୋମିଟର ବୋହି ଆମ୍ବୁଲାନ୍ସ ନିକଟରେ ପହଞ୍ଚାଇଥିଲେ । ଏହି କାର୍ଯ୍ୟରେ ଆମ୍ବୁଲାନ୍ସ ଚାଳକ ଦୀପକ ଗୋପାଳ ମଧ୍ୟ ସହଯୋଗ କରିଥିଲେ । ପରେ ସୁକୁଙ୍କୁ ନିକଟସ୍ଥ ସୁଙ୍ଗେର ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିଲା । କିନ୍ତୁ ସେଠାରେ ଡାକ୍ତର ନଥିବାରୁ ତାଙ୍କୁ କାଶୀପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିଲା । ସେଠାରେ ମଧ୍ୟ ତାଙ୍କ ସ୍ୱାସ୍ଥ୍ୟାବସ୍ଥା ଭଲ ନଥିବାରୁ ଅଧିକ ଚିକିତ୍ସା ପାଇଁ ରାୟଗଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା । ସେଠାରେ ସେ ଏକ ମୃତ ସନ୍ତାନକୁ ଜନ୍ମ ଦେଇଥିଲେ। ଏହି ଦୁଃଖଦ ଘଟଣା ପରେ ପରିବାରରେ ଶୋକର ଛାୟା ଖେଳିଯାଇଛି ।