ଅଣ୍ଟା ସଳଖୁଛି ଓଡ଼ିଶା ପ୍ରଦେଶ କଂଗ୍ରେସ କମିଟି

ଭୁବନେଶ୍ବର: ଅଣ୍ଟା ସଳଖୁଛି ଓଡ଼ିଶା ପ୍ରଦେଶ କଂଗ୍ରେସ କମିଟି । ନୂଆ ପିସିସି ସଭାପତି ଘୋଷଣା ହେବା ପରେ ନେତା ଏବଂ କର୍ମୀଙ୍କ ମନରେ ଭରିଛି ନୂଆ ଆଶା । ଗତକାଲି (ମଙ୍ଗଳବାର) ନୂତନ ପିସିସି ସଭାପତି ଭକ୍ତ ଚରଣ ଦାସଙ୍କ ନେତୃତ୍ୱରେ ଆରମ୍ଭ ହୋଇଛି ସଂକଳ୍ପ ପଦଯାତ୍ରା । ଭୁବନେଶ୍ୱରରୁ ପୁରୀ ପର୍ୟ୍ୟନ୍ତ ଚାଲିଛି ଏହି ପଦଯାତ୍ରା । ଏଥିରେ ସାମିଲ ହୋଇଛନ୍ତି ହଜାର ହଜାର କଂଗ୍ରେସ ନେତା ଓ କର୍ମୀ । ଏହି ସଂକଳ୍ପ ପଦଯାତ୍ରା ଆସନ୍ତାକାଲି ଅର୍ଥାତ ୨୦ ତାରିଖରେ ପୁରୀ ଶ୍ରୀମନ୍ଦିରରେ ପହଞ୍ଚିବା ସହ ମହାପ୍ରଭୁଙ୍କୁ ଦର୍ଶନ କରିବେ ପିସିସି ସଭାପତି ।ଭୁବନେଶ୍ୱର ବିମାନ ବନ୍ଦରରେ ପହଞ୍ଚିବା ପରେ ନବ ନିଯୁକ୍ତ ପିସିସି ସଭାପତି ଭକ୍ତ ଚରଣ ଦାସଙ୍କୁ ଭବ୍ୟ ସ୍ୱାଗତ ଏବଂ ସମ୍ବର୍ଦ୍ଧନ କରାଯାଇଥିଲା । ପାରମ୍ପରିକ ନୃତ୍ୟ ଗୀତରେ କମ୍ପିଥିଲା ବିମାନବନ୍ଦର ପରିସର । ଏହାପରେ ପଦଯାତ୍ରା କ୍ୟାପିଟାଲ ହସ୍ପିଟାଲ ଛକ, ରାଜମହଲ ଛକ, କଳ୍ପନା ଛକ ଦେଇ ଲିଙ୍ଗିପୁର ପହଞ୍ଚିଥିଲା । ଲିଙ୍ଗିପୁର ପରେ ପିପିଲିରେ ରାତ୍ରି ଯାପନ କରିଥିଲେ ପିସିସି ସଭାପତି ଏବଂ ସାମିଲ ହୋଇଥିବା ନେତା ଏବଂ କର୍ମୀ । ଆଜି ପୁଣି ଏହି ପଦଯାତ୍ରା ପୁରୀ ଅଭିମୁଖେ ବାହାରି ଚନ୍ଦନପୁର ଶେଷ ହେବ । ସେହିଭଳି ପଦଯାତ୍ରାର ଅନ୍ତିମ ଦିନ ଅର୍ଥାତ ୨୦ ତାରିଖରେ ଚନ୍ଦନପୁରରୁ ପଦଯାତ୍ରା ବାହାରି ପୁରୀ ଶ୍ରୀମନ୍ଦିରରେ ଶେଷ ହେବ । ଏହାପରେ ନିଜ କର୍ମୀଙ୍କ ସହ ମହାପ୍ରଭୁଙ୍କ ଆଶୀର୍ବାଦ ନେବା କାର୍ୟ୍ୟକ୍ରମ ରହିଛି ।ପିସିସି ସଭାପତି ଭକ୍ତ ଦାସ କହିଛନ୍ତି ,” ଓଡ଼ିଶାର ଗୌରବ ଗାରିମା ଫେରାଇ ଆଣିବା ସହ ରାଜ୍ୟରେ ବିରାଟ ପରିବର୍ତ୍ତନ ପାଇଁ ଏହି ପଦଯାତ୍ରା ଆୟୋଜନ ହୋଇଛି । ଆମେ ନିଜେ ଠିକ ହେବୁ ସବୁ ଦଳକୁ ଠିକ କରିବା ପାଇଁ ଚେଷ୍ଟା କରିବୁ । “