Garvita Odia
ଭୁବନେଶ୍ୱର: ଡିସେମ୍ବର ୨୬ରେ ବିଜେଡିର ୨୭ତମ ପୂର୍ତ୍ତି ସହ ୨୮ତମ ପ୍ରତିଷ୍ଠା ଦିବସ ସବୁ ନିର୍ବାଚନ ମଣ୍ଡଳୀରେ ପାଳନ କରାଯିବ। ଏଥିପାଇଁ ବିଜେଡି ସୁପ୍ରିମୋ ନବୀନ ପଟ୍ଟନାୟକ ବିଜେଡି କର୍ମକର୍ତ୍ତାଙ୍କୁ ଚିଠି ଲେଖି ସାମିଲ ହେବାକୁ ଅପିଲ କରିଛନ୍ତି। ଏହାସହ ଆଗକୁ ନୂଆ ପ୍ରତ୍ୟୟର ସହିତ ଲୋକଙ୍କ ସେବା କରିଚାଲିବାକୁ କର୍ମକର୍ତ୍ତାଙ୍କୁ ଆହ୍ୱାନ ଦେଇଛନ୍ତି ନବୀନ। କିପରି ପ୍ରତିଷ୍ଠା ଦିବସ ପାଳନ ହେବ ସେନେଇ ଦଳୀୟ କର୍ମକର୍ତ୍ତାଙ୍କୁ ଆଜି ଚିଠି ଲେଖି ନବୀନ ଏହି ଆହ୍ୱାନ ଦେଇଛନ୍ତି। ଗତ ୨୭ ବର୍ଷ ଧରି ଉତ୍ସର୍ଗୀକୃତ ମନୋଭାବ ନେଇ ନିଷ୍ଠାପର ଭାବେ ଦଳ ଜନତାଙ୍କ ସେବା କରିଆସିଛି। ଏଥିପାଇଁ ବିଜେଡି ଆଞ୍ଚଳିକ ଦଳ ଭାବେ ସାରା ଦେଶରେ ଏକ ପ୍ରଶଂସନୀୟ ପରିଚିତି ଆଣିପାରିଛି। ବିଜେଡି ଆଜି ଏକ ସାମାଜିକ ଆନ୍ଦୋଳନରେ ପରିଣତ ହୋଇଛି। ବିଜୁ ବାବୁଙ୍କ ଆଦର୍ଶରେ ରାଜ୍ୟର ସବୁ କ୍ଷେତ୍ରରେ ଏବଂ ସବୁ ବର୍ଗର ଲୋକଙ୍କ ବିକାଶ ପାଇଁ ବିଜେଡିର ଆଭିମୁଖ୍ୟକୁ ଜନସାଧାରଣଙ୍କ ଅକୁଣ୍ଠ ସମର୍ଥନ, ଶୁଭେଚ୍ଛା ମିଳିଛି। ଆଗକୁ ମଧ୍ୟ ବିଜେଡି ଲୋକଙ୍କ ପାଇଁ କାମ କରିଚାଲିବ ବୋଲି ନବୀନ ଚିଠିରେ ଉଲ୍ଲେଖ କରିଛନ୍ତି।
