ଜୀବନ ଜ୍ୟୋତି ମହାବିଦ୍ୟାଳୟର ୪୧ତମ ସ୍ଵନକ୍ଷତ୍ର ଦିବସ ପାଳିତ

ରାଇକିଆ: କନ୍ଧମାଳ ଜିଲ୍ଲା ରାଇକିଆ ସ୍ଥିତ ଜୀବନ ଜ୍ୟୋତି ମହାବିଦ୍ୟାଳୟର ୪୧ତମ ସ୍ଵନକ୍ଷତ୍ର ଦିବସ ମହାବିଦ୍ୟାଳୟ ପରିସରରେ ଉତ୍ସାହ ଓ ଉଦ୍ଦୀପନାର ସହ ପାଳିତ ହୋଇଯାଇଛି। ଏହି ଅବସରରେ ମହାବିଦ୍ୟାଳୟର ଦୀର୍ଘ ୪୧ ବର୍ଷର ଯାତ୍ରା, ଶିକ୍ଷା କ୍ଷେତ୍ରରେ ଏହାର ଅବଦାନ ଏବଂ ଛାତ୍ରଛାତ୍ରୀଙ୍କ ଭବିଷ୍ୟତ ଗଠନରେ ଏହାର ଭୂମିକା ସମ୍ପର୍କରେ ଆଲୋଚନା ହୋଇଥିଲା।ମହାବିଦ୍ୟାଳୟର ଅଧ୍ୟକ୍ଷ ଉମାକାନ୍ତ ରଥଙ୍କ ସଭାପତିତ୍ୱରେ ଆୟୋଜିତ ସଭାରେ ପ୍ରାକ୍ତନ ଅଧ୍ୟାପକ ଡ଼ଃ ଶ୍ୟାମସୁନ୍ଦର ଡାଙ୍ଗୁଆ ମୁଖ୍ୟ ଅତିଥି, ପ୍ରାକ୍ତନ କର୍ମଚାରୀ ବିମଳ କିଶୋର ପରିଚ୍ଛା ସମ୍ମାନିତ ଅତିଥି ଏବଂ ଦୁତିକୃଷ୍ଣ ପଣ୍ଡା ନିମନ୍ତ୍ରିତ ଅତିଥି ଭାବେ ଯୋଗଦେଇଥିଲେ।
କାର୍ଯ୍ୟକ୍ରମରେ ଅତିଥିମାନେ ମହାବିଦ୍ୟାଳୟର ଗୌରବମୟ ୪୧ ବର୍ଷର ଯାତ୍ରାକୁ ସ୍ମରଣ କରିବା ସହ ଛାତ୍ରଛାତ୍ରୀମାନେ ଶିକ୍ଷା ସହିତ ନୀତି, ଶୃଙ୍ଖଳା ଓ ମାନବିକ ମୂଲ୍ୟବୋଧକୁ ଜୀବନରେ ଅନୁସରଣ କରି ସମାଜ ଓ ଦେଶର ଉନ୍ନତିରେ ନିଜର ଅବଦାନ ରଖିବାକୁ ଆହ୍ବାନ ଦେଇଥିଲେ।
ସଂଯୋଜକ ବେଣୁପାଣି ମହାପାତ୍ର କାର୍ଯ୍ୟକ୍ରମର ସଂଯୋଜନା କରିଥିବାବେଳେ ଅଧ୍ୟାପକ ଦିଲ୍ଲୀପ କୁମାର ନାୟକ, ଡ. ସନ୍ତୋଷ କୁମାର ନାୟକ ,ଅଧ୍ୟାପିକା ମଞ୍ଜୁଳା ସାହୁ, ଦୁତି କୃଷ୍ଣ ପଣ୍ଡା ବକ୍ତବ୍ୟ ରଖିଥିଲେ। ବକ୍ତାମାନେ ମହାବିଦ୍ୟାଳୟର ଅତୀତର ସ୍ମୃତି, ବର୍ତ୍ତମାନର ଶିକ୍ଷା ବ୍ୟବସ୍ଥା ଓ ଭବିଷ୍ୟତର ଲକ୍ଷ୍ୟ ସମ୍ପର୍କରେ ମତବ୍ୟକ୍ତ କରିଥିଲେ।
ଏହି ଅବସରରେ ମହାବିଦ୍ୟାଳୟର ସମସ୍ତ ଅଧ୍ୟାପକ, ଅଧ୍ୟାପିକା, ଅଣଶିକ୍ଷକ କର୍ମଚାରୀ ଓ ଛାତ୍ରଛାତ୍ରୀ ଉପସ୍ଥିତ ରହି କାର୍ଯ୍ୟକ୍ରମକୁ ସଫଳ କରିଥିଲେ। ଶେଷରେ ଅଧ୍ୟାପିକା ଲିଜାଲିନ ଭୋଇ ମହାବିଦ୍ୟାଳୟ ର ଇତିହାସ ଉପରେ କବିତା ଗାନ ସହ ଧନ୍ୟବାଦ ଅର୍ପଣ କରିଥିଲେ।
ରିପୋର୍ଟର ଦୁତି କୃଷ୍ଣ ପଣ୍ଡା