Garvita Odia
ଭୁବନେଶ୍ବର: ରାଜଧାନୀ ଭୁବନେଶ୍ବରର ନୟାପଲ୍ଲୀ ଅଞ୍ଚଳରେ ଜଣେ ଯୁବତୀଙ୍କୁ ବନ୍ଧୁକ ଦେଖାଇ ଦୁଷ୍କର୍ମ କରାଯାଇଥିବା ନେଇ ଅଭିଯୋଗ ହୋଇଛି। ଏହି ଘଟଣାକୁ ନେଇ ମହିଳା ଥାନାରେ ଏତଲା ଦିଆଯାଇଥିବା ବେଳେ ମାମଲାରେ ଓଡ଼ିଶା ମହିଳା କମିସନ ହସ୍ତକ୍ଷେପ କରିଛନ୍ତି। ଘଟଣାକୁ ଗୁରୁତ୍ୱର ସହ ନେଇ ମହିଳା କମିସନ ଭୁବନେଶ୍ବର ଡିସିପିଙ୍କୁ ରିପୋର୍ଟ ତଲବ କରିଛନ୍ତି। ମାମଲା ସମ୍ପର୍କରେ ୧୦ ଦିନ ମଧ୍ୟରେ ରିପୋର୍ଟ ଦେବାକୁ କମିସନଙ୍କ ପକ୍ଷରୁ ଚିଠି ଜରିଆରେ ନିର୍ଦ୍ଦେଶ ଦିଆଯାଇଛି।
କମିସନଙ୍କ ନିର୍ଦ୍ଦେଶ ଅନୁସାରେ, ଏହା ଏକ ସମ୍ବେଦନଶୀଳ ଘଟଣା ହୋଇଥିବାରୁ ମାମଲାର ପୁଙ୍ଖାନୁପୁଙ୍ଖ ତଦନ୍ତ କରାଯିବା ଆବଶ୍ୟକ। ଘଟଣାର ପୃଷ୍ଠଭୂମି, ଅଭିଯୋଗର ସତ୍ୟତା, ପୁଲିସର ତଦନ୍ତର ଅଗ୍ରଗତି ଏବଂ ଏପର୍ଯ୍ୟନ୍ତ ନିଆଯାଇଥିବା ପଦକ୍ଷେପ ସମ୍ପର୍କରେ ରିପୋର୍ଟ ଦେବାକୁ କୁହାଯାଇଛି। ସୂଚନା ଅନୁସାରେ, ନୟାପଲ୍ଲୀ ଅଞ୍ଚଳରେ ଜଣେ ଯୁବତୀଙ୍କୁ ବନ୍ଧୁକ ମୁନରେ ରଖି ଦୁଷ୍କର୍ମ କରାଯାଇଥିବା ନେଇ ଅଭିଯୋଗ ଆସିଥିଲା । ଏନେଇ ମହିଳା ଥାନାରେ ଅଭିଯୋଗ ଦାଖଲ ହୋଇଛି।
ତେବେ ଘଟଣାର ସମ୍ପୂର୍ଣ୍ଣ ତଥ୍ୟ ଏବଂ ଅଭିଯୋଗର ସତ୍ୟତା ପୁଲିସ ତଦନ୍ତ ପରେ ସ୍ପଷ୍ଟ ହେବ। ଘଟଣାକୁ ନେଇ ରାଜଧାନୀରେ ମହିଳାଙ୍କ ସୁରକ୍ଷା ପ୍ରସଙ୍ଗ ପୁଣି ଚର୍ଚ୍ଚାକୁ ଆସିଛି। ମହିଳା କମିସନଙ୍କ ରିପୋର୍ଟ ତଲବ ପରେ ତଦନ୍ତ କେଉଁ ଦିଗରେ ଆଗକୁ ବଢ଼ୁଛି ଏବଂ ମାମଲାରେ ପୁଲିସ କ’ଣ ପଦକ୍ଷେପ ନେଉଛି, ତା’ଉପରେ ଏବେ ନଜର ରହିଛି।
