ଦିଲ୍ଲୀ ବିଧାନସଭା ନିର୍ବାଚନ: ପ୍ରାର୍ଥୀ ତାଲିକା ଜାରି କଲା କଂଗ୍ରେସ

ନୂଆଦିଲ୍ଲୀ: ଦିଲ୍ଲୀ ବିଧାନସଭା ନିର୍ବାଚନ ପାଇଁ କଂଗ୍ରେସ ଏହାର ୨୧ ଜଣିଆ ପ୍ରାର୍ଥୀ ତାଲିକା ପ୍ରକାଶ କରିଛି। ପ୍ରଥମ ପର୍ୟ୍ୟାୟ ପ୍ରାର୍ଥୀ ତାଲିକାରେ ଅନେକ ହେଭିୱେଟ ନେତାଙ୍କୁ ଟିକେଟ ଦେଇଛି ଦଳ। ପୂର୍ବତନ ପିସିସି ସଭାପତି ତଥା ପୂର୍ବତନ ବିଧାୟକ ଅନୀଲ ଚୌଧୁରୀଙ୍କୁ ପାଟପଡଗଞ୍ଜରୁ ଟିକେଟ ଦିଆଯାଇଛି। ଆମ୍ ଆଦମୀ ପାର୍ଟି ଏହି ଆସନରୁ ଅବଧ ଓଝାଙ୍କୁ ପ୍ରାର୍ଥୀ କରିଛି। ଏହାପୂର୍ବରୁ ପାଟପଡଗଞ୍ଜ ଆମ୍ ଆଦମୀ ପାର୍ଟିର ବରିଷ୍ଠ ନେତା ତଥା ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ଆସନ ଥିଲା।ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଶୀଲା ଦୀକ୍ଷିତଙ୍କ ପୁଅ ତଥା ପୂର୍ବତନ ଲୋକସଭା ସାଂସଦ ସନ୍ଦୀପ ଦୀକ୍ଷିତଙ୍କୁ ପ୍ରଥମ ପର୍ୟ୍ୟାୟ ତାଲିକାରେ ମୈଦାନକୁ ଓହ୍ଲାଇଛି କଂଗ୍ରେସ। ତାଙ୍କୁ ହାଇପ୍ରୋଫାଇଲ ନୂଆଦିଲ୍ଲୀ ବିଧାନସଭା ଆସନରୁ ପ୍ରାର୍ଥୀ କରିଛି ଦଳ। ବଦଲି ଆସନ ପାଇଁ ଦିଲ୍ଲୀ କଂଗ୍ରେସ ସଭାପତି ଦେବେନ୍ଦ୍ର ଯାଦବଙ୍କୁ ଚୟନ କରାଯାଇଥିବାବେଳେ ଦଳର ମୁଖପାତ୍ର ରାଗିଣୀ ନାୟକଙ୍କୁ ୱାଜିରପୁରରୁ ପ୍ରତିଦ୍ୱନ୍ଦ୍ୱିତା କରିବାକୁ ମନୋନୀତ କରାଯାଇଛି। ସେହିଭଳି କସ୍ତୁରବା ନଗରରୁ ଅଭିଷେକ ଦତ୍ତଙ୍କୁ ପ୍ରାର୍ଥୀ କରିଛି ଦଳ।

ସମ୍ଭବତଃ ଫେବୃଆରୀ ୨୦୨୫ରେ ଅନୁଷ୍ଠିତ ହେବ ଦିଲ୍ଲୀ ବିଧାନସଭା ନିର୍ବାଚନ। ଏଥିପାଇଁ ଦଳର ଶୀର୍ଷ ନେତୃତ୍ୱ ପ୍ରଥମ ପର୍ୟ୍ୟାୟରେ ୨୧ ଜଣିଆ ପ୍ରାର୍ଥୀ ତାଲିକା ଜାରି କରିଛନ୍ତି।