Garvita Odia
ନୂଆଦିଲ୍ଲୀ : ପଶ୍ଚିମ ଏସିଆରେ ଆମେରିକା-ଇସ୍ରାଏଲ ଓ ଇରାନ ମଧ୍ୟରେ ଜାରି ଯୁଦ୍ଧ ପରେ ସୃଷ୍ଟି ହୋଇଥିବା ଇନ୍ଧନ ସଙ୍କଟର ସ୍ଥିତି, ପ୍ରଥମ ଥର ପେଟ୍ରୋଲର ମୂଲ୍ୟ ଉପରେ ପ୍ରଭାବ ପକାଇଛି। ଦେଶରେ ପ୍ରିମିୟମ ଅର୍ଥାତ୍ ପାୱାର ପେଟ୍ରୋଲର ଦାମ୍ ବଢାଇ ଦିଆ ଯାଇଛି। ସୂଚନା ମୁତାବିକ ,ପ୍ରିମିୟମ ପେଟ୍ରୋଲର ଦାମ୍ରେ ୨.୩୫ ଟଙ୍କା ପ୍ରତି ଲିଟରରେ ବୃଦ୍ଧି କରାଯାଇଛି। ରିପୋର୍ଟ ଅନୁସାରେ, ବର୍ତ୍ତମାନ ଏହି ଦାମ୍ କେବଳ ପ୍ରିମିୟମ ପେଟ୍ରୋଲର ଦାମ୍ରେ ଲାଗୁ ହେବ ଏବଂ ରେଗୁଲାର ପେଟ୍ରୋଲର ଦାମ୍ ବୃଦ୍ଧି କରାଯାଇ ନାହିଁ।
ଏହି ବୃଦ୍ଧିର ପ୍ରଭାବ ମୁଖ୍ୟତଃ ସେହି ଗ୍ରାହକଙ୍କ ଉପରେ ପଡ଼ିବ ଯିଏ ହାଇ-ଆକ୍ଟେନ ଅର୍ଥାତ୍ ପ୍ରିମିୟମ ପେଟ୍ରୋଲର ବ୍ୟବହାର କରନ୍ତି। କହି ରଖୁଛୁକି ପ୍ରିମିୟମ ପେଟ୍ରୋଲର ବ୍ୟବହାର ସାଧାରଣତଃ ଭଲ ଇଞ୍ଜିନ ପରଫର୍ମାନ୍ସ ଓ ଅଧିକ ମାଇଲେଜ୍ ପାଇଁ କରାଯାଏ।
ବର୍ତ୍ତମାନ ତୈଳ କମ୍ପାନୀ ଗୁଡ଼ିକ ପକ୍ଷରୁ ଦାମ୍ ବୃଦ୍ଧିର କୌଣସି ଅଫିସିଆଲି କାରଣ କୁହାଯାଇ ନାହିଁ। ହେଲେ ସୂଚନାକାରୀଙ୍କ ଅନୁସାରେ ଇରାନ ଯୁଦ୍ଧ ଯୋଗୁଁ ଗ୍ଲୋବାଲ ଅଶୋଧିତ ତୈଳର ଦାମ୍ରେ ଉତ୍ଥାନ ପତନ ଓ ଲଜିଷ୍ଟିକ୍ ଖର୍ଚ୍ଚରେ ପରିବର୍ତ୍ତନ ଦାମ୍ରେ ବୃଦ୍ଧିର ମୁଖ୍ୟ କାରଣ ହୋଇପାରେ।
ଉଲ୍ଲେଖନୀୟ ଯେ, ଆମେରିକା ଓ ଇସ୍ରାଏଲ ଦ୍ୱାରା ଇରାନ ଉପରେ ଆକ୍ରମଣ ଓ ତେହେରାନର ବ୍ୟାପକ ଜବାବୀ କାର୍ଯ୍ୟାନୁଷ୍ଠାନ ପରେ ତୈଳର ଦାମ୍ ପ୍ରତି ବ୍ୟାରେଲ ପିଛା ୧୦୦ ଡଲାର ଉପରେ ପହଞ୍ଚି ଯାଇଛି ଏବଂ ପୂରା ଦୁନିଆରେ ହାହାକାର ଲାଗି ରହିଛି। ସେପଟେ ଭାରତ ନିଜର ଅଶୋଧିତ ତୈଳର ଆବଶ୍ୟକତାର ପ୍ରାୟ ୮୮ ପ୍ରତିଶତ ଆମଦାନୀ କରିଥାଏ ଏବଂ ଏଥିପାଇଁ ବିଶ୍ୱ ଦାମ୍ରେ ଏହି ବୃଦ୍ଧି ବଡ଼ ଆର୍ଥିକ ସମସ୍ୟା ସୃଷ୍ଟି କରିଛି। ଏହା ଭାରତର କରେଣ୍ଟ ଆକାଉଣ୍ଟର କ୍ଷତିକୁ ବୃଦ୍ଧି କରାଇ ଥାଏ ,ଟଙ୍କା ଉପରେ ଚାପ ପକାଇ ଥାଏ ଏବଂ ଘର ଓ ବ୍ୟବସାୟ ଗୁଡ଼ିକ ପାଇଁ ଇନ୍ଧନ ପେମେଣ୍ଟ ବଢାଇ ଥାଏ।
