ପୁଣି ଅଦିନିଆ ରଥଯାତ୍ରାକୁ ନେଇ ବିବାଦ

ଭୁବନେଶ୍ୱର: ପୁଣି ଅଦିନିଆ ରଥଯାତ୍ରାକୁ ନେଇ ବିବାଦ । ଆଜି ଅଷ୍ଟ୍ରେଲିଆର ବ୍ରିସବେନରେ ଇସ୍କନ ଆୟୋଜନ କରିବ ଅଦିନିଆ ରଥଯାତ୍ରା । ଅଷ୍ଟ୍ରେଲିଆର କିଙ୍ଗ ଜର୍ଜ ସ୍କୋୟାର ବ୍ରିସବେନ ସିବିଡିରେ ପୂର୍ବାହ୍ନ ୧୧ଟା ରୁ ଅପରାହ୍ନ ୩ଟା ୩୦ ପର୍ୟ୍ୟନ୍ତ ରଥଯାତ୍ରା ଆୟୋଜନ ନେଇ ବିଜ୍ଞପ୍ତି ଦେଇଛି ଇସ୍କନ । ଏନେଇ ଶ୍ରୀମନ୍ଦିର ମୁଖ୍ୟ ପ୍ରଶାସକ କହିଛନ୍ତି, ଗତ ଅକ୍ଟୋବର ୨୦୨୫ରେ ଇସ୍କନ ଲେଖିଥିବା ଚିଠି ଅନୁଯାୟୀ ଭାରତରେ ସବୁ ସ୍ଥାନରେ, ତିଥିରେ ହିଁ ହେଉଛି ସ୍ନାନ ଓ ରଥଯାତ୍ରା । ବିଦେଶରେ ମଧ୍ୟ ସ୍ନାନଯାତ୍ରା ତିଥିରେ ହେଉଛି କିନ୍ତୁ ତଥାପି ବିଦେଶରେ ୧୦ଟି ସ୍ଥାନରେ ସ୍ନାନ ଯାତ୍ରା ଅତିଥିରେ ହେଉଥିବା ନେଇ ଇସ୍କନକୁ ପ୍ରମାଣ ଦେଇଥିଲା ଶ୍ରୀମନ୍ଦିର ପ୍ରଶାସନ ।

ଖାଲି ସ୍ନାନଯାତ୍ରା ନୁହେଁ ପ୍ରାୟ ୮୦ ସ୍ଥାନରେ ଗୋଟିଏ ବର୍ଷ ଭିତରେ, ବିଦେଶରେ ଅଦିନରେ ରଥଯାତ୍ରା ମଧ୍ୟ ହୋଇଛି । ତେଣୁ ଏ ବାବଦରେ ସେମାନଙ୍କୁ ଅବଗତ କରାଯାଉଛି । ଗତ ଐକ୍ୟ ମଣ୍ଡଳୀ ବୈଠକରେ ମଧ୍ୟ ଗଜପତି ଏନେଇ ଇସ୍କନ ଉପରେ ବର୍ଷିଥିଲେ । ଆଗାମୀ ଦିନରେ ଇସ୍କନର ଅଦିନିଆ ରଥଯାତ୍ରା ବନ୍ଦ କରିବାକୁ ପ୍ରକ୍ରିୟା ଜାରି ରହିବା ସହ ଶେଷରେ ଆଇନର ଆଶ୍ରୟ ନିଆଯିବ କହିଥିଲେ ଗଜପତି ଦିବ୍ୟସିଂହ ଦେବ ।