Garvita Odia
ଭୁବନେଶ୍ବର: ବିଜେପି ଆସିବା ଦିନଠୁଁ ଆଇନ ଶୃଙ୍ଖଳା ବିଗୁଡୁଛି ବୋଲି ଅଭିଯୋଗ କରିଛି ବିରୋଧୀ ଦଳ ବିଜେଡି । ଭଦ୍ରକ ଓ ବାଲେଶ୍ୱରରେ ଦଙ୍ଗା ହେଲା । ସଂଖ୍ୟାଲଘୁ ଲୋକଙ୍କ ଉପରେ ଅତ୍ୟାଚାର ହେଉଛି । ନାରୀ ନିର୍ୟାତନା, ଚୋରି, ହିଂସା ରୋକିବାକୁ ପଦକ୍ଷେପ ଗ୍ରହଣ କରାଯାଉନି । ହେଲେ ଏପରି ଅପରାଧୀଙ୍କୁ ପୋଲିସ ଦ୍ୱାରା ଉତ୍ସହିତ କରୁଛନ୍ତି । ବିଜେଡି ଲୋକଙ୍କୁ ହଇରାଣ କରାଯାଉଛି । ବିଜେପି କର୍ମୀଙ୍କ କେସ ଜରିଆରେ ବିଜେଡି ନେତାଙ୍କୁ ପୋଲିସ ହଇରାଣ କରୁଛି ବୋଲି ପ୍ରେସମିଟ କରି ବର୍ଷିଛନ୍ତି ବିଜେଡିର ବରିଷ୍ଠ ନେତ୍ରୀ ତଥା ବିରୋଧୀ ଦଳ ମୁଖ୍ୟ ସଚେତିକା ପ୍ରମିଳା ମଲ୍ଲିକ ଓ ଅନ୍ୟତମ ବରିଷ୍ଠ ନେତା ସଞ୍ଜୟ ଦାସବର୍ମା ।ପ୍ରମିଳା କହିଛନ୍ତି,‘‘କୁଚିଣ୍ଡା, ନୀଳଗିରି, ବଙ୍ଗୋମୁଣ୍ଡା, କଟକରେ ମହିଳା ନିର୍ୟାତନା ମାମଲା ସାମ୍ନାକୁ ଆସିଛି । କଟକର ଢାବା ଧର୍ଷଣର କେନ୍ଦ୍ର ପାଲଟିଥିଲା । ହେଲେ ପୋଲିସ ଏସବୁ ଦେଖୁନି । ପୋଲିସ ସରକାରୀ ଗୁଣ୍ଡା ଭାବେ କାମ କରୁଛି । ତାରାତାରିଣୀ ମନ୍ଦିରରୁ ସବୁ ଲୁଟି ନେଲେ । ଧର୍ମଶାଳା ବିଧାୟକ ଯାଜପୁର ଯାଉଥିଲେ, ଯାଜପୁର ତାଙ୍କ ଏରିଆ ନୁହେଁ, ଏତେ ଲୋକଙ୍କୁ ଠେଙ୍ଗା ଧରାଇ କାହିଁକି ଯାଜପୁର ନେଇଥିଲେ ? ବିଜେଡି ଲୋକ ଗିରଫ ହେଲେ, ବିଧାୟକଙ୍କ ଲୋକ କାହିଁକି ଗିରଫ ହେଲେନି ? ପୋଲିସ ଠିକ ନ୍ୟାୟ କରୁନି । ଆସନ୍ତାକାଲି ଡିଜିପିଙ୍କୁ ଭେଟି ପୋଲିସ ଓ ବିଜେପିର ଅନ୍ୟାୟ କଥା ଜଣାଇବୁ । ନ୍ୟାୟ ନମିଳିଲେ ଆନ୍ଦୋଳନ ହେବ ।’’ବିଜେଡି କାର୍ୟ୍ୟକ୍ରମ କାର୍ୟ୍ୟକାରୀ କମିଟି ଆବାହକ ସଞ୍ଜୟ ଦାସବର୍ମା କହିଛନ୍ତି ,” ସରକାର ଗଠନର ୫ ମାସରେ ଆଇନ ଶୃଙ୍ଖଳା କେବଳ ବିପର୍ୟ୍ୟସ୍ତ ହୋଇନି, ପୋଲିସକୁ ସରକାରୀ ଦଳର ଗୁଣ୍ଡା ବାହିନୀ ଭାବେ ବ୍ୟବହାର କରାଯାଇଛି । ଯାହା ଗଣତନ୍ତ୍ର ପାଇଁ ଶୁଭଙ୍କର ନୁହେଁ । ଧର୍ମଶାଳା ବିଧାୟକ ଯାଜପୁର ଯାଇଥିଲେ । ସେଠି ଗଣତନ୍ତ୍ରିକ ଆନ୍ଦୋଳନ ଚାଲିଥିଲା । ହେଲେ ବିଧାୟକ ଜୋର ଜବରଦସ୍ତ ପଶିବାକୁ ଚେଷ୍ଟା କରିଥିଲେ । ଯେଉଁ ଆଇନ ଶୃଙ୍ଖଳା ପରିସ୍ଥିତି ହେଲା, ଗୋଟେ ରାଜନୈତିକ ଦଳର ୧୯ ଜଣ ଗିରଫ ହେଲେ । ଅନ୍ୟ ଦଳର କେହି ଗିରଫ ହେଲେନି । ବିଜେଡି କର୍ମୀଙ୍କୁ ଆକ୍ରମଣ ହୋଇଛି । ହେଲେ ଜଣେ ବି ଗିରଫ ନ ହେବା ଦୁର୍ଭାଗ୍ୟ କଥା ।’’
