Garvita Odia
ଭୁବନେଶ୍ୱର: ଛାତ୍ର ସଂସଦ ନିର୍ବାଚନ ଭିତରେ ପ୍ରାକ୍ ନିର୍ବାଚନୀ ହିଂସା ଆରମ୍ଭ ହୋଇଛି । ବିଜେବି ସ୍ୱୟଂଶାସିତ ମହାବିଦ୍ୟାଳୟର ସଭାପତି ପ୍ରାର୍ଥୀ ଆର୍ଯ୍ୟନ ମହାପାତ୍ରଙ୍କୁ ମରଣାନ୍ତକ ଆକ୍ରମଣ ହୋଇଛି । ପିପିଲି ପଦା ପଡି଼ଆରେ ଭୋଜିଭାତ ଚାଲିଥିବା ବେଳେ ଏକ ନିର୍ଦ୍ଦିଷ୍ଟ ଛାତ୍ର ଗୋଷ୍ଠୀର କିଛି ସମର୍ଥକ ତାଙ୍କୁ ମାଡ଼ ମାରି ମୁଣ୍ଡ ଫଟାଇ ଦେଇଛନ୍ତି ।ଏବିଭିପି ପକ୍ଷରୁ ପଦା ପଡି଼ଆରେ ସକାଳୁ ଭୋଜିଭାତର ଆୟୋଜନ ଚାଲିଥିଲା । ଅପରାହ୍ଣ ୧ଟାରେ କିଛି ସମର୍ଥକଙ୍କ ସହ ଆର୍ଯ୍ୟନ, ସାଧାରଣ ସମ୍ପାଦକ ପ୍ରାର୍ଥୀ ଅନନ୍ଦିତା ମିଶ୍ର ଓ ଉପ-ସଭାପତି ପ୍ରାର୍ଥୀ ଜ୍ୟୋର୍ତିମୟୀ ପାଣିଗ୍ରାହୀ ସେଠାରେ ପହଞ୍ଚିଲେ । ଚାଲିଲା । ଠିକ୍ ଏତିକିବେଳେ ୧୦-୧୨ଟି ବାଇକ୍ ଓ ଗୋଟିଏ କାର ପଡି଼ଆ ଭିତରକୁ ପଶିଲା । ଏବିଭିପିର କେହି ସମର୍ଥକ ହୋଇଥିବେ ଭାବି ଆର୍ଯ୍ୟନ ଓ ଉପସ୍ଥିତ ଛାତ୍ରମାନେ ସେତେଟା ଧ୍ୟାନ ଦେଲେନି । ଅପରଗୋଷ୍ଠୀର ସମର୍ଥକମାନେ ବାଇକରୁ ଭୁସ୍ଭାସ୍ ଓହ୍ଲାଇଲେ । କାର ଡିକିରୁ ହକି ଷ୍ଟିକ୍, ବ୍ୟାଟ୍ ଓ ବାଉଁଶ ଫାଳିଆ କାଢ଼ି ଆର୍ଯ୍ୟନଙ୍କ ଉପରେ ଝାମ୍ପି ପଡି଼ଲେ । ନିର୍ଧୁମ ପିଟିଚାଲିଲେ । ଆକ୍ରମଣରେ ଆଉ ଜଣେ ଛାତ୍ର ମଧ୍ୟ ଆହତ ହୋଇଥିଲେ । ଆର୍ଯ୍ୟନ ପିପିଲି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସିତ ହେବା ପରେ ଥାନାକୁ ଯାଇ ଏତଲା ଦେଇଥିଲେ ।
ପୁଲିସ ମାମଲା (୬୩୨/୨୬) ରୁଜୁ କରି ଘଟଣାସ୍ଥଳକୁ ଯାଇ ତନାଘନା କରିଛି । ଭୋଜିରେ ଉପସ୍ଥିତ ଛାତ୍ରଙ୍କୁ ପଚରାଉଚରା ଚଳାଇଛି । ଦୁର୍ବୃତ୍ତଙ୍କୁ ଧରିବାକୁ ପୁଲିସ ପକ୍ଷରୁ ୨ଟି ଟିମ୍ ଗଢାଯାଇଛି । ପିପିଲି-ଦାଣ୍ଡମୁକୁନ୍ଦପୁର ରାସ୍ତାରୁ ପଦା ପଡି଼ଆକୁ ଦୁର୍ବୃତ୍ତ ପଶିବା ବେଳର ସିସି କ୍ୟାମେରା ଫୁଟେଜ୍ ଯାଞ୍ଚ କରାଯାଉଛି । ପୁଲିସ ଏହି ମାମଲାରେ ପିପିଲି ଅଞ୍ଚଳର ଜଣେ ଯୁବକକୁ ଥାନାରେ ଅଟକ ରଖିଛି । ସେ ଜଣେ ଅଣଛାତ୍ର ବୋଲି ପୁଲିସ ସୂଚନା ଦେଇଛି । ତା’ ତଥ୍ୟ ଆଧାରରେ ଫେରାର୍ ଥିବା ଅନ୍ୟ ଅଭିଯୁକ୍ତକୁ ଧରିବାକୁ ପୁଲିସ ଚେଷ୍ଟା ଚଳାଇଛି । ଆଜି ରାତିରେ ପୁଲିସ ଭୁବନେଶ୍ୱର ବଡ଼ଗଡ଼ ବ୍ରିଟ୍ କଲୋନୀରେ ରହୁଥିବା ଜଣେ ଛାତ୍ରନେତାଙ୍କୁ ପୁଲିସ ଉଠାଇ ନେଇ ଥାନାରେ ପଚରାଉଚରା କରୁଛି।
