ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ମାମଲାରେ ସର୍ବୋଚ୍ଚ ଅଦାଲତଙ୍କ ସ୍ଥଗିତାଦେଶ

ନୂଆଦିଲ୍ଲୀ: ଭାରତୀୟ ସେନାର ମାନହାନି କଲା ଭଳି ମନ୍ତବ୍ୟ ନେଇ ରାହୁଲଙ୍କ ବିରୋଧରେ ଚାଲିଥିବା ମାମଲା ଉପରେ ସର୍ବୋଚ୍ଚ ଅଦାଲତ ସ୍ଥଗିତାଦେଶ ଦେଇଛନ୍ତି, କିନ୍ତୁ ଏଭଳି ଟିପ୍ପଣୀ ଦେଇଥିବାରୁ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ସୁପ୍ରିମକୋର୍ଟଙ୍କ ଭର୍ତ୍ସନା କରିଛନ୍ତି । । ୨୦୨୨ରେ କଂଗ୍ରେସର ଭାରତ ଯୋଡ଼ୋ ଯାତ୍ରାରେ ରାହୁଲ କହିଥିଲେ, ଭାରତୀୟ ଯବାନଙ୍କୁ ଚୀନ ସୈନିକ ମାଡ଼ ମାରିଛନ୍ତି। ଭାରତର ୨୦୦୦ ବର୍ଗ କିଲୋମିଟର ଭୂମି ଚୀନ ଅକ୍ତିଆର କରିଛି । ଏଭଳି ମନ୍ତବ୍ୟ ପାଇଁ ରାହୁଲ ଗାନ୍ଧୀଙ୍କ ବିରୋଧରେ ଲକ୍ଷ୍ନୌର ଏକ ସ୍ୱତନ୍ତ୍ର ଅଦାଲତରେ ମାନହାନି ରୁଜୁ ହୋଇଥିଲା । ଏହା ବିରୋଧରେ ରାହୁଲଙ୍କ ପକ୍ଷରୁ ଆହ୍ଲାବାଦ ହାଇକୋର୍ଟରେ ଆବେଦନ କରାଯାଇଥିଲା । ସ୍ଥଗିତାଦେଶ ପାଇଁ ଆହ୍ଲାବାଦ ହାଇକୋର୍ଟ ମନା କରିଥିଲେ । ପରେ ରାହୁଲ ସୁପ୍ରିମକୋର୍ଟକୁ ଯାଇଥିଲେ । ସୁପ୍ରିମକୋର୍ଟ ମାମଲା ଉପରେ ସ୍ଥଗିତାଦେଶ ଦେଇଥିଲେ ବି ରାହୁଲ ଗାନ୍ଧୀଙ୍କୁ ଭର୍ତ୍ସନା କରିଛନ୍ତି। ସର୍ବୋଚ୍ଚ ଅଦାଲତ କହିଛନ୍ତି, ‘ଜଣେ ପ୍ରକୃତ ଭାରତୀୟ କେବେ ଏପରି ମନ୍ତବ୍ୟ ଦେଇପାରିବ ନାହିଁ’। ‘ରାହୁଲଙ୍କ ପାଖରେ ସେପରି କିଛି ପ୍ରମାଣ ଅଛି କି?’ ‘ସେତେବେଳେ ଥିଲେ କେଉଁଠି?’ ବୋଲି ସୁପ୍ରିମକୋର୍ଟ ପ୍ରଶ୍ନ କରିଛନ୍ତି। ଲୋକସଭାର ବିରୋଧୀ ଦଳ ନେତା ହିସାବରେ ରାହୁଲ ସଂସଦରେ ଏ ପ୍ରସଙ୍ଗ ଉଠାଇପାରିଥାନ୍ତେ। ‘ବାକ୍ ସ୍ବାଧୀନତା ଆଳରେ କେହି ମନଇଚ୍ଛା କିଛି କହିପାରିବେ ନାହିଁ’। ରାହୁଲ ଗାନ୍ଧୀଙ୍କୁ ସୁପ୍ରିମକୋର୍ଟ ଭର୍ତ୍ସନା କରିଥିଲେ ବି ତଳ କୋର୍ଟରେ ତାଙ୍କ ବିରୋଧରେ ଚାଲିଥିବା ମାନହାନି ମାମଲା ଉପରେ ୩ ସପ୍ତାହ ପାଇଁ ସ୍ଥଗିତାଦେଶ ଦେଇଛନ୍ତି ।