ବିଲ ମଝିକୁ ଓଲଟିଲା କାର

ବାଣପୁର: ନାଚୁଣୀ ଥାନା ଅଧୀନ ଦେଓଗାଁ ଆଗୁଳଛକ ନିକଟ ବ୍ରିଜ୍‌ ପାଖରେ ଏକ ବଡ଼ ଧରଣର ସଡ଼କ ଦୁର୍ଘଟଣା ଘଟିଛି। ଏକ ଦ୍ରୁତଗାମୀ ଧଳା ରଙ୍ଗର ଟାଟା ଇଣ୍ଡିଗୋ କାର୍ ଭାରସାମ୍ୟ ହରାଇ ରାସ୍ତା କଡ଼ରେ ଥିବା ବିଲ ଭିତରକୁ ଓଲଟି ପଡ଼ିଛି।ଘଟଣାରୁ ପ୍ରକାଶ ଯେ, କାର୍‌ଟି ଆୟତପୁର ଛକ ଦେଇ ବାଣପୁର ଅଭିମୁଖେ ଅତି ଦ୍ରୁତ ଗତିରେ ଯାଉଥିଲା। ଏହି ସମୟରେ ଚାଳକ ଗାଡ଼ି ଉପରୁ ନିୟନ୍ତ୍ରଣ ହରାଇବାରୁ କାର୍‌ଟି ପ୍ରାୟ ୩ ପଲଟି ମାରି ବିଲ ମଝିକୁ ଚାଲିଯାଇଥିଲା। ଗାଡ଼ିଟି ସମ୍ପୂର୍ଣ୍ଣ ରୂପେ ଦୁର୍ଘଟଣାଗ୍ରସ୍ତ ହୋଇଛି।ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ଦୁର୍ଘଟଣା ସମୟରେ ଗାଡ଼ି ଭିତରେ ୫ ଜଣ ଯୁବକ ଥିଲେ। ସେମାନେ ପ୍ରାୟ ସମସ୍ତେ ଅତ୍ୟଧିକ ମଦ୍ୟପାନ କରି ମାତାଲ୍ ଅବସ୍ଥାରେ ଥିଲେ। ବିଲ ଭିତରେ ଗାଡ଼ି ଓଲଟିବା ପରେ ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରିବା ପାଇଁ ଧାଇଁ ଆସିଥିଲେ। ମାତ୍ର ଉଦ୍ଧାର ହେବା ପରେ ଉକ୍ତ ଯୁବକମାନେ ସେଠାରେ ଉପସ୍ଥିତ ଥିବା ଲୋକଙ୍କୁ ଓଲଟା ଧମକଚମକ ଦେଇ ଘଟଣାସ୍ଥଳରୁ ଚମ୍ପଟ ମାରିଥିଲେ।
ଦୁର୍ଘଟଣା ସମ୍ପର୍କରେ ଖବର ପାଇ ଗମ୍ଭାରୀମୁଣ୍ଡା ପୋଲିସ ବିଟ୍ ହାଉସ ଅଧିକାରୀ ପ୍ରଫୁଲ୍ଲ କୁମାର ସାହୁ ସଦଳବଳେ ଘଟଣାସ୍ଥଳରେ ପହଞ୍ଚିଥିଲେ। ପୋଲିସ ବିଲ ଭିତରୁ ଦୁର୍ଘଟଣାଗ୍ରସ୍ତ ଗାଡ଼ିକୁ ଉଦ୍ଧାର କରି ଜବତ କରିଛି। ଏହି ଭୟାବହ ଦୁର୍ଘଟଣାରେ ଆଶ୍ଚର୍ଯ୍ୟଜନକ ଭାବେ କୌଣସି ବ୍ୟକ୍ତି ଆହତ ହୋଇନାହାନ୍ତି ବୋଲି ପୋଲିସ ସୂଚନା ଦେଇଛି। ଗାଡ଼ି ନମ୍ବର ଆଧାରରେ ପୋଲିସ ଫେରାର୍ ଯୁବକମାନଙ୍କ ସମ୍ପର୍କରେ ଅଧିକ ତଦନ୍ତ ଚଳାଇଛି।