Garvita Odia
ଖୋର୍ଦ୍ଧା : ବେଗୁନିଆ ବୋଲଗଡ ନିର୍ବାଚନମଣ୍ଡଳୀ କାହା ଘର ? ବର୍ତ୍ତମାନ ବିଧାୟକ ପ୍ରଦୀପ ସାହୁଙ୍କର ନା ପୂର୍ବତନ ବିଧାୟକ ତଥା ବର୍ତ୍ତମାନ ଖୋର୍ଦ୍ଧା ବିଧାୟକ ପ୍ରଶାନ୍ତ ଜଗଦ୍ଦେବଙ୍କର, ତାହା ଏବେ ଚର୍ଚ୍ଚାର କେନ୍ଦ୍ର ବିନ୍ଦୁ ପାଲଟିଛି ।
ନିକଟରେ ବେଗୁନିଆ ନିର୍ବାଚନ ମଣ୍ଡଳୀ ଅନ୍ତର୍ଗତ ଅଟ୍ରି ଉଷ୍ଣପ୍ରସବଣକୁ ରାଜ୍ୟପାଳ ଯାଇଥିଲେ । ସୌଜନ୍ୟ ଦୃଷ୍ଟିରୁ ବେଗୁନିଆ ବିଧାୟକ ପ୍ରଦୀପ କୁମାର ସାହୁ ଏବଂ ଜିଲ୍ଲାପାଳ ଅମ୍ରିତ ଋତୁରାଜ ସେଠାରେ ରାଜ୍ୟପାଳଙ୍କ ଗସ୍ତକୁ ଶାନ୍ତି ଶୃଙ୍ଖଳାରେ କରିବା ପାଇଁ ଆୟୋଜନ କରୁଥିଲେ । ସେହି ସମୟରେ ଖୋର୍ଦ୍ଧା ବିଧାୟକ ପ୍ରଶାନ୍ତ ଜଗଦେବ ପହଞ୍ଚି ଅଟ୍ରି ଉଷ୍ଣପ୍ରସ୍ରବଣ ପାଇଁ ୧୮ କୋଟି ଅନୁଦାନ ଆସିଛି ବୋଲି ଦାବି କରିଥିଲେ । ଯାହାକୁ ପ୍ରଦୀପ କୁମାର ସାହୁ ପ୍ରତିବାଦ କରିଥିଲେ । ପ୍ରଦୀପ କହିଥିଲେ, ପୂର୍ବ ସରକାରରେ ଆସିଥିବା ଅନୁଦାନକୁ ଏ ସରକାର ଖର୍ଚ୍ଚ ନକରି ଆହୁରି ଅନୁଦାନ ଆସିଛି ବୋଲି କହୁଛନ୍ତି । ଏହାପରେ ପ୍ରଶାନ୍ତ ଜଗଦେବଙ୍କ ଉତ୍ତର ଥିଲା ଏକ ଅଲଗା ପ୍ରକାର । ଦୁଇ ଥର ହାରି ବିଧାୟକ ହୋଇଛ, ମା’କୁ କହିବ ମାମୁଁ ଘର କଥା ।
ସୂଚନାଯୋଗ୍ୟଯେ, ବିଧାୟକ ପ୍ରଦୀପ କୁମାର ସାହୁଙ୍କ ଘର ବେଗୁନିଆ ବ୍ଲକର ସାରୁଅରେ ଅବସ୍ଥିତ । ପ୍ରଶାନ୍ତଙ୍କ ଘର ଖୋର୍ଦ୍ଧା ନିର୍ବାଚନମଣ୍ଡଳୀ ଟାଙ୍ଗୀ ବ୍ଲକ ବଡ ପୋଖରିଆରେ । ପ୍ରଶାନ୍ତ ଜଗଦ୍ଦେବ ବେଗୁନିଆ ରେ ପୂର୍ବରୁ ଜାନକୀ ବଲ୍ଲଭ ପଟ୍ଟନାୟକଙ୍କ ଠାରୁ ହାରିଥିଲେ । ୨୦୦୯ରେ ଟିକେଟରୁ ବି ବଞ୍ôଚତ ହୋଇଥିଲେ । ସେତେବେଳେ ବିଜେଡ଼ି-ଏନସିପି ମେଣ୍ଟ ଯୋଗୁଁ ପ୍ରଶାନ୍ତ ନନ୍ଦ ଟିକେଟ ହାତେଇ ନେଇଥିଲେ । ପରେ ୨୦୧୪ରେ ବିଜେଡି ଟିକେଟରେ ବେଗୁନିଆ ବିଧାୟକ ହୋଇଥିଲେ । ଆଜି କିନ୍ତୁ ପ୍ରଦୀପ କୁମାର ସାହୁଙ୍କୁ ମା’କୁ କହିବ ମାମୁଁ ଘର କଥା ଏବଂ ତୁମେ ଦୁଇ ଥର ହାରିଛ କହିବା ନେଇ ଚର୍ଚ୍ଚାର ବିଷୟ ପାଲଟିଛି । ବେଗୁନିଆ ବିଧାୟକ ପ୍ରଦୀପ କୁମାର ସାହୁ କିନ୍ତୁ ଏହାର କୌଣସି ଉତ୍ତର ଦେଇନଥିଲେ । ଅନ୍ୟପକ୍ଷରେ ପ୍ରଶାନ୍ତ ଜଗଦ୍ଦେବ ଅଟ୍ରି ଉଷ୍ଣପ୍ରସ୍ରବଣ ପାଇଁ କେତେ ଅନୁଦାନ ପ୍ରାପ୍ତ ହୋଇଛି ତାହା ମଧ୍ୟ ସ୍ପଷ୍ଟ କରି ପାରିନଥିଲେ ।
