Garvita Odia
ଭୁବନେଶ୍ୱର,: ଶିକ୍ଷା ହେଉଛି ବିକଶିତ ଓଡ଼ିଶାର ସ୍ୱପ୍ନକୁ ସାକାର କରିବାର ଚାବିକାଠି I ଶିକ୍ଷା ଏବଂ ଦକ୍ଷତା ବିକାଶରେ ଅଧିକ ନିବେଶ ଦ୍ୱାରା ଏକ ବିକଶିତ ଏବଂ ଭବିଷ୍ୟତ ପ୍ରସ୍ତୁତ ଓଡ଼ିଶା ଗଠନ ସମ୍ଭବ ବୋଲି ଓଡ଼ିଶାର ମାନ୍ୟବର ରାଜ୍ୟପାଳ ଡ଼. ହରି ବାବୁ କମ୍ଭମପାଟି କହିଛନ୍ତି I ବୁଧବାର ଦିନ ଭୁବନେଶ୍ୱର ଠାରେ ଆୟୋଜିତ ଏଜୁକେସନ ଏମିନେନ୍ସ କନକ୍ଳେଭରେ ମୁଖ୍ୟ ଅତିଥି ଭାବେ ଯୋଗ ଦେଇ ରାଜ୍ୟପାଳ ଏହା କହିଛନ୍ତି I ଏହି ଅବସରରେ ଉଦବୋଧନ ଦେଇ ରାଜ୍ୟପାଳ କହିଥିଲେ ଯେ, ଗୁଣାତ୍ମକ ଶିକ୍ଷା, ନବସୃଜନ ଏବଂ ଦକ୍ଷ ମାନବ ସମ୍ବଳ ଦ୍ୱାରା ସଶକ୍ତ ଏକ ଶକ୍ତିଶାଳୀ ଜ୍ଞାନ-ଚାଳିତ ସମାଜ ଦ୍ୱାରା ହିଁ ବିକଶିତ ଓଡ଼ିଶା ଏବଂ ବିକଶିତ ଭାରତର ସ୍ୱପ୍ନ ସାକାର ହୋଇପାରିବ। ଶିକ୍ଷାକୁ ରାଷ୍ଟ୍ର ନିର୍ମାଣର ମୂଳଦୁଆ ଭାବରେ ବର୍ଣ୍ଣନା କରି ରାଜ୍ୟପାଳ କହିଥିଲେ ଯେ, ଆଧୁନିକ ଯୁଗରେ ସମାଜ କେବଳ ପ୍ରାକୃତିକ ସମ୍ପଦ ଦ୍ୱାରା ନୁହେଁ ବରଂ ତାର ଜ୍ଞାନ ପଦ୍ଧତି, ସୃଜନଶୀଳତା ଏବଂ ଦକ୍ଷ ମାନବ ସମ୍ବଳ ଦ୍ୱାରା ପରିଭାଷିତ।ଶିକ୍ଷା ଏବଂ ଜ୍ଞାନ ସୃଷ୍ଟିରେ ସର୍ବୋତ୍ତମ ନିବେଶ ଦ୍ୱାରା ଏକ ବିକଶିତ ଓଡ଼ିଶା ନିର୍ମାଣ କରିବା ସମ୍ଭବ ବୋଲି ରାଜ୍ୟପାଳ ଅବତାରଣା କରିଥିଲେ । ଏତତବ୍ୟତୀତ ରାଜ୍ୟପାଳ ଏହା ମଧ୍ୟ କହିଥିଲେ ଯେ ଶିକ୍ଷା ବ୍ୟକ୍ତିବିଶେଷଙ୍କୁ ଜ୍ଞାନୀ, ଦାୟିତ୍ୱବାନ ଏବଂ କ୍ରିୟାଶୀଳ ନାଗରିକରେ ପରିଣତ କରେ ଏବଂ ନବସୃଜନ, ଗଣତାନ୍ତ୍ରିକ ମୂଲ୍ୟବୋଧ ଏବଂ ସାମାଜିକ ସମନ୍ୱୟକୁ ପ୍ରୋତ୍ସାହିତ କରେ। ରାଜ୍ୟପାଳ ଉଲ୍ଲେଖ କରିଥିଲେ ଯେ ଶିକ୍ଷା ଦାରିଦ୍ର୍ୟ ହ୍ରାସ କରିବା ସହିତ ଅସମାନତାକୁ ଦୂର କରେ ଏବଂ ଯୁବପିଢିଙ୍କୁ ସୁକ୍ଷ୍ମ ଭାବେ ଚିନ୍ତା କରିବାରେ, ସୃଜନଶୀଳତା ଏବଂ ଆତ୍ମବିଶ୍ୱାସରେ ସଜ୍ଜିତ କରିବାରେ ସାହାଯ୍ୟ କରିଥାଏ ।
ଶିକ୍ଷା-ଚାଳିତ ବିକାଶ ମାଧ୍ୟମରେ ଓଡ଼ିଶାର ପରିବର୍ତ୍ତନ ଉପରେ ଆଲୋକପାତ କରି ଶିକ୍ଷା କ୍ଷେତ୍ରକୁ ଉଚ୍ଚ ପ୍ରାଥମିକତା ଦେବା ଏବଂ ଜାତୀୟ ଶିକ୍ଷା ନୀତି ୨୦୨୦କୁ ବ୍ୟାପକ ଭାବରେ କାର୍ଯ୍ୟକାରୀ କରିବାରେ ରାଜ୍ୟ ସରକାରଙ୍କ ଉଦ୍ୟମକୁ ରାଜ୍ୟପାଳ ପ୍ରଶଂସା କରିଥିଲେ। ରାଜ୍ୟପାଳ କହିଥିଲେ ଯେ ମାତୃଭାଷା-ଆଧାରିତ ଶିକ୍ଷା, ଡିଜିଟାଲ୍ ସଶକ୍ତିକରଣ, ବହୁମୁଖୀ ଶିକ୍ଷା ଏବଂ ଦକ୍ଷତା ବିକାଶ ଉପରେ ଗୁରୁତ୍ୱ ଭବିଷ୍ୟତ ପାଇଁ ପିଢ଼ି ପ୍ରସ୍ତୁତ କରିବା ଦିଗରେ ଏକ ଦୂରଦୃଷ୍ଟିପୂର୍ଣ୍ଣ ଆଭିମୁଖ୍ୟକୁ ପ୍ରତିଫଳିତ କରୁଛି।ପଞ୍ଚସଖା ଶିକ୍ଷା ସେତୁ, ଗୋଦାବରୀଶ ମିଶ୍ର ଆଦର୍ଶ ପ୍ରାଥମିକ ବିଦ୍ୟାଳୟ ଏବଂ ମାଧୋ ସିଂହ ହାତ ଖର୍ଚ ଭଳି ପଦକ୍ଷେପ ଉପରେ ଆଲୋକପାତ କରି ରାଜ୍ୟପାଳ କହିଥିଲେ ଯେ ଏହି ପଦକ୍ଷେପଗୁଡ଼ିକ ବିଦ୍ୟାଳୟ ଶିକ୍ଷାକୁ ସୁଦୃଢ଼ କରିବା ସହିତ ଜନଜାତି ଏବଂ ଆର୍ଥିକ ଦୃଷ୍ଟିରୁ ଦୁର୍ବଳ ଗୋଷ୍ଠୀ ମଧ୍ୟରେ ଅନ୍ତର୍ଭୁକ୍ତିକୁ ସୁନିଶ୍ଚିତ କରୁଛି।ରାଜ୍ୟପାଳ ଏହା ମଧ୍ୟ କହିଥିଲେ ଯେ, ବିଶ୍ୱ ଦକ୍ଷତା କେନ୍ଦ୍ର ଭଳି ଅନୁଷ୍ଠାନ ବିଶ୍ୱ ଅର୍ଥନୀତିର ଉଦୀୟମାନ କ୍ଷେତ୍ରଗୁଡ଼ିକରେ ନେତୃତ୍ୱ ନେବା ପାଇଁ ଯୁବପିଢ଼ିଙ୍କୁ ପ୍ରସ୍ତୁତ କରୁଛି। ବିଶ୍ୱବିଦ୍ୟାଳୟ, ବିଦ୍ୟାଳୟ, ଗବେଷଣା ପ୍ରତିଷ୍ଠାନ ଏବଂ ନୀତି ନିର୍ଦ୍ଧାରକମାନଙ୍କୁ ଏକତ୍ର କାମ କରି ଏକ ଇକୋସିଷ୍ଟମ ସୃଷ୍ଟି କରିବାକୁ ରାଜ୍ୟପାଳ ପରାମର୍ଶ ଦେଇଥିଲେ, ଯାହା ଦ୍ୱାରା ନବସୃଜନ ଓ ଗବେଷଣାକୁ ପ୍ରୋତ୍ସାହନ ଏବଂ ସାମାଜିକ ଆବଶ୍ୟକତା ସହିତ ଶିକ୍ଷାକୁ ସଂଯୋଗ କରାଯାଇପାରିବ।
ଏହି ଅବସରରେ ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦିଙ୍କ ‘ଅର୍ଥନୈତିକ ଆତ୍ମରକ୍ଷା’ ପାଇଁ ଆହ୍ୱାନକୁ ଉଲ୍ଲେଖ କରି ରାଜ୍ୟପାଳ କହିଥିଲେ ଯେ, ଦେଶର ଦୀର୍ଘକାଳୀନ ସମୃଦ୍ଧି ଏବଂ ରଣନୈତିକ ସ୍ୱାର୍ଥକୁ ସୁରକ୍ଷା ଦେବା ପାଇଁ ଅର୍ଥନୈତିକ ସ୍ଥିରତା ଏବଂ ଆତ୍ମନିର୍ଭରଶୀଳତା ଅତ୍ୟାବଶ୍ୟକ। ରାଜ୍ୟପାଳ ଉଲ୍ଲେଖ କରିଥିଲେ ଯେ ସଚେତନ ଭାବେ ଜନସାଧାରଣଙ୍କ ଅଂଶଗ୍ରହଣ ଏବଂ ଦାୟିତ୍ୱପୂର୍ଣ୍ଣ ବ୍ୟବହାର ଦେଶର ଅର୍ଥନୀତିକୁ ସୁଦୃଢ଼ କରିବାରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇପାରେ।
ଇନ୍ଧନ ସଂରକ୍ଷଣ, ସ୍ୱଦେଶୀ ଉତ୍ପାଦକୁ ପ୍ରୋତ୍ସାହନ, ପ୍ରାକୃତିକ କୃଷିକୁ ପ୍ରୋତ୍ସାହିତ କରିବା ଏବଂ ରନ୍ଧନ ତୈଳର ବ୍ୟବହାର ହ୍ରାସ କରିବା କେବଳ ସଂରକ୍ଷଣର କାର୍ଯ୍ୟ ନୁହେଁ ବରଂ ଏହା ରାଷ୍ଟ୍ରକୁ ମଜବୁତ ଏବଂ ସୁରକ୍ଷା କରିବା ପାଇଁ ଅତ୍ୟାବଶ୍ୟକ ପଦକ୍ଷେପ ବୋଲି ରାଜ୍ୟପାଳ କହିଥିଲେ। ସାମୂହିକ ଅଂଶଗ୍ରହଣ ପାଇଁ ଆହ୍ୱାନ ଜଣାଇ ଦାୟିତ୍ୱ ଏବଂ ଦେଶପ୍ରେମର ମନୋଭାବ ସହିତ ଜାତୀୟ ମିଶନରେ ଯୋଗଦେବା ପାଇଁ ସମାଜର ସମସ୍ତ ବର୍ଗର ନାଗରିକଙ୍କୁ ରାଜ୍ୟପାଳ ଆହ୍ୱାନ ଜଣାଇଥିଲେ।
ଏହି କାର୍ଯ୍ୟକ୍ରମରେ ଦକ୍ଷତା ବିକାଶ ଏବଂ ବୈଷୟିକ ଶିକ୍ଷା ବିଭାଗର ମନ୍ତ୍ରୀ ଶ୍ରୀ ସମ୍ପଦ ଚନ୍ଦ୍ର ସ୍ୱାଇଁ ବକ୍ତବ୍ୟ ପ୍ରଦାନ କରିଥିବା ବେଳେ ରୋଟାରୀ ଜିଲ୍ଲା ଗଭର୍ଣ୍ଣର ଶ୍ରୀ ମନୋଜ କୁମାର ତ୍ରିପାଠୀ ଉପସ୍ଥିତ ଥିଲେ। ପ୍ରାରମ୍ଭରେ ନ୍ୟୁଜ୍ ୧୮ ଓଡ଼ିଆର ସମ୍ପାଦକ ନରେନ୍ଦ୍ରନାଥ ଜେନା ସ୍ୱାଗତ ଭାଷଣ ପ୍ରଦାନ କରିଥିଲେ ।
