ଶୋଇଥିବା ଶିଶୁକୁ ଝୁଣିଦେଲା କୁକୁର

କୋଷାଗୁମୁଡ଼ା: ବୁଲା କୁକୁରର ଦୌରାତ୍ମ୍ୟ । ଘରେ ପଶି ଶୋଇଥିବା ଶିଶୁକୁ ଝୁଣି ଲହୁଲୁହାଣ କରିଦେଇଛି । ଶିଶୁର ମୁହଁ ସହ ଶରୀରର ବିଭିନ୍ନ ଅଂଶକୁ କାମୁଡ଼ି କ୍ଷତାକ୍ତ କରିଦେଇଛି । ଏଭଳି ହୃଦୟ ବିଦାରକ ଘଟଣା ଘଟିଛି ନବରଙ୍ଗପୁର ଜିଲ୍ଲା କୋଷାଗୁମୁଡ଼ା ବ୍ଲକ୍ କୋଡ଼ିଙ୍ଗା ସଦର ମହକୁମାରେ । କୁକୁର କବଳରୁ ରକ୍ଷା କରିବାକୁ ଯାଇ ଶିଶୁର ପିଉସୀ ମଧ୍ୟ ଆହତ ହୋଇଛନ୍ତି । ଗୁରୁତର ଶିଶୁକୁ କଟକ ବଡ଼ ମେଡିକାଲକୁ ନିଆଯାଉଥିବା ପରିବାର ଲୋକ କହିଛନ୍ତି ।
ସୂଚନା ଅନୁଯାୟୀ, କୋଡ଼ିଙ୍ଗାର ଚାଉଁରିଆସାହିର ବାସିନ୍ଦା ରାଜୁ ଦଳେଇ । ରବିବାର ଅପରାହ୍ଣରେ ତାଙ୍କ ବର୍ଷକର ଶିଶୁ ଘରେ ଶୋଇଥିଲା । ଏହି ସମୟରେ ଏକ ବୁଲା କୁକୁର ଘରେ ପଶିଥିଲା । ଛୁଆକୁ ଆକ୍ରମଣ କରିଥିଲା । କାମୁଡ଼ି କାମୁଡ଼ି ଶିଶୁର ମୁହଁ, ଆଖି, ଗାଲ, ହାତକୁ ରକ୍ତାକ୍ତ କରିଦେଇଥିଲା । ଶରୀରରେ ଗଭୀର କ୍ଷତ ହୋଇଥିଲା । ଚିତ୍କାର ଶୁଣି ପହଞ୍ଚିଥିଲେ ରାଜୁଙ୍କ ଭଉଣୀ ରେଖା । କୁକୁରକୁ ଘଉଡ଼ାଇବା ଲାଗି ଉଦ୍ୟମ କରିଥିଲେ । ତାଙ୍କୁ ବି କୁକୁର ଆକ୍ରମଣ କରିଥିଲା । ପାଟିତୁଣ୍ଡ ଶୁଣି ସାହିପଡ଼ିଶା ପହଞ୍ଚିବାରୁ ଶିଶୁକୁ ଛାଡ଼ି କୁକୁର ପଳାଇଥିଲା । ଖବରପାଇ ପହଞ୍ଚିଥିଲେ ରାଜୁ । ଶିଶୁକୁ କୋଡ଼ିଙ୍ଗା ଡାକ୍ତରଖାନାକୁ ନିଆଯାଇଥିଲା । ପ୍ରାଥମିକ ଚିକିତ୍ସା ପରେ ଜିଲ୍ଲା ହସ୍ପିଟାଲ୍ ଏବଂ ପରେ କୋରାପୁଟ ସହିଦ ଲକ୍ଷ୍ମଣ ନାୟକ ମେଡିକାଲ କଲେଜ ଓ ହସ୍ପିଟାଲ୍କୁ ସ୍ଥାନାନ୍ତର କରାଯାଇଥିଲା । ଅବସ୍ଥା ଭଲ ନଥିବାରୁ ଡାକ୍ତରଙ୍କ ପରାମର୍ଶକ୍ରମେ ପରିବାର ଲୋକେ ଶିଶୁକୁ ଧରି କଟକ ମେଡିକାଲ ଯାଇଥିବା ସୂଚନା ମିଳିଛି ।