ଶ୍ରୀମନ୍ଦିରରେ ଆଜି ନନ୍ଦୋତ୍ସବ ନୀତି

ପୁରୀ: ଶନିବାର ବଡ଼ଦେଉଳରେ ଶ୍ରୀକୃଷ୍ଣ ଲୀଳା ଅବସରରେ ନନ୍ଦୋତ୍ସବ ଓ ବିଜୁଳି କନ୍ୟା ନୀତି ଅନୁଷ୍ଠିତ ହେବ । ସକାଳେ ରାମ କୃଷ୍ଣ ଜଗମୋହନରେ ଥିବା ଦୋଳିରେ ବିଜେ ହେବେ । ସନ୍ଧ୍ୟାରେ ରାମକୃଷ୍ଣ ଓ ମଦନମୋହନ ପୁଣି ଖଟରେ ବିଜେ ହେବେ । ତିନି ବିଗ୍ରହଙ୍କ ପୂଜାବିଧି ଅନୁଷ୍ଠିତ ହେବ । ଡମ୍ବରୁ ଉପରେ ଠାକୁରେ ବିଜେ ହେବେ । ଏହାପରେ ବିଜୁଳି କନ୍ୟା ନୀତି ହେବ । ଭଣ୍ଡାରଘରୁ ଦୁର୍ଗାଦେବୀଙ୍କୁ ଅଣାଯାଇ ମା’ ସୁଭଦ୍ରାଙ୍କ ବାଡ଼ରୁ ଆଜ୍ଞାମାଳ ଦିଆଯିବ । ଜଗମୋହନ ଆଗରେ ଖଟୁଲି ଉପରେ ବିଜେ ହେବେ ଦେବୀ । ସେଠାରେ ଯଥାବିଧି ନୀତି ହୋଇ ଠାକୁରାଣୀ ଭଣ୍ଡାର ଘରକୁ ବାହୁଡ଼ା ବିଜେ କରିବେ । ଲକ୍ଷ୍ମୀମନ୍ଦିର ଜଗମୋହନରେ ମଧ୍ୟ ଏହି ଦିନର ସ୍ୱତନ୍ତ୍ର ନୀତି ରହିଛି ।
ଶୁକ୍ରବାର ରାତିରେ ଶ୍ରୀମନ୍ଦିରରେ ଶ୍ରୀକୃଷ୍ଣ ଜନ୍ମୋତ୍ସବ ନୀତି ଅନୁଷ୍ଠିତ ହୋଇଥିଲା । ମହାପ୍ରଭୁ ଦେବକୀଙ୍କ ରୂପେ ଶ୍ରୀକୃଷ୍ଣଙ୍କୁ ଜନ୍ମ ଦେଇଥିଲେ । ରାତିରେ ଠାକୁରେ ସୁବର୍ଣ୍ଣ ଅଳଙ୍କାର ଲାଗି ହୋଇ ବେଶ ବଢ଼ିଥିଲା । ପରେ ଧୋ ପଖାଳ ନୀତି ହୋଇ ପୂଜା ଠା ହୋଇଥିଲା । ଏକ ରୁପା ପଦ୍ମ ପାଖୁଡ଼ାର ମଣ୍ଡଳ ଉପର ପାଖୁଡ଼ାମାନଙ୍କରେ ଦେବକୀ, ବସୁଦେବ, ନନ୍ଦ, ଯଶୋଦା, ଲକ୍ଷ୍ମୀ, ଉଗ୍ରସେନ, ବଳଭଦ୍ର, ଗାର୍ଗବ ଋଷି ଓ କୃଷ୍ଣଙ୍କ ନାମ ଲେଖାଯାଇଥିଲା । ଦକ୍ଷିଣଘରୁ ମଦନମୋହନଙ୍କୁ ଆଣି ସିଂହାସନ ଉପରେ ବିଜେ କରାଯାଇଥିଲା । ୨ଜଣ ସେବକ ଲୁଗା ଘୋଡ଼ିହୋଇ ଦେବକୀ ଓ ବସୁଦେବଙ୍କ ବେଶ ଧାରଣ କରି ଚକଡ଼ାରେ ଶ୍ରୀକୃଷ୍ଣ ଜନ୍ମ ନୀତି ସମ୍ପନ୍ନ ହୋଇଥିଲା ।

ରାତିରେ ଶ୍ରୀକୃଷ୍ଣ ଜନ୍ମ ନୀତି ଅବସରରେ ପୌରାଣିକ କଥାବସ୍ତୁକୁ ଆଧାର କରି ବଡ଼ଦେଉଳରେ ଉଛୁଳୁଥିଲା ଯମୁନା ନଦୀ । ବସୁଦେବ ପ୍ରଭୁଙ୍କୁ ମୁଣ୍ଡାଇ ନଦୀ ପାର ହେବା ପୂର୍ବରୁ ବାଟ ଓଗାଳିଥିଲେ ଉଗ୍ରସେନ । ସେଠାରେ ଠାକୁରେ ଉଗ୍ରସେନଙ୍କୁ ଦର୍ଶନ ଦେଇଥିଲେ । ବ୍ୟକ୍ତିଗତ ସେବା ଭାବେ ନାରାୟଣ ମହାପାତ୍ର ଉଗ୍ରସେନଙ୍କ ନୀତି କରିଥିଲେ । ପୁତ୍ର ସନ୍ତାନର ବାର୍ତ୍ତା ନନ୍ଦ ରାଜାଙ୍କ ନିକଟରେ ପହଞ୍ଚାଇଥିଲେ ଭରତିଆ ଗଉଡ଼ । ବିମଳାଙ୍କ ମନ୍ଦିରଠାରୁ ଲକ୍ଷ୍ମୀ ମନ୍ଦିର ପର୍ଯ୍ୟନ୍ତ ପାଲଟିଥିଲା ଯମୁନା ନଦୀ । ପାଳିଆ ସେବକମାନେ ପୌରାଣିକ ଚରିତ୍ରରେ ଠାକୁରଙ୍କ ସେବା କରିଥିଲେ । ଏହି ଅବସରରେ ଶ୍ରୀମନ୍ଦିର ଦ୍ୱାର ପୁଷ୍ପବିମଣ୍ଡିତ ହୋଇଥିଲା । ସେଥିରେ ଏକ ବଂଶୀର ସାଜ ସଭିଙ୍କ ଦୃଷ୍ଟି ଆକର୍ଷଣ କରୁଥିଲା । ଏଥିସହ ଆଜି ମହାପ୍ରଭୁଙ୍କ ରୋହିଣୀ ବୃଷ ନକ୍ଷେତ୍ର ନୀତି ହୋଇଥିଲା