ସଙ୍କଟରେ ଆମ୍ ଆଦମୀ ପାର୍ଟି, ପଞ୍ଜାବର ୫୦ ବିଧାୟକ ଛାଡ଼ିବେ କି ଦଳ!

ନୂଆଦିଲ୍ଲୀ: ଆପ୍ ରାଜ୍ୟସଭା ସାଂସଦ ରାଘବ ଚଢା, ଅଶୋକ କୁମାର ମିତ୍ତଲ, ହରଭଜନ ସିଂହ, ସନ୍ଦୀପ କୁମାର ପାଠକ, ଡ ବିକ୍ରମଜିତ ସିଂହ ସାହାନୀ, ସ୍ବାତୀ ମାଲିୱାଲ ଓ ରାଜିନ୍ଦର ଗୁପ୍ତା ଗତ ସପ୍ତାହରେ ଆପ୍ ଛାଡି ବିଜେପିରେ ଯୋଗ ଦେଇଥିଲେ। ରାଜ୍ୟସଭା ସାଂସଦ ବିଜେପିରେ ଯୋଗ ଦେବା ପରେ ଅସ୍ତିତ୍ୱ ସଙ୍କଟର ସମ୍ମୁଖୀନ ଆମ୍ ଆଦମୀ ପାର୍ଟି (ଆପ୍) ଶକ୍ତି ପ୍ରଦର୍ଶନ କରିବାକୁ ପଞ୍ଜାବ ଜଳନ୍ଧରର ଏକ ଘରୋଇ ବିଶ୍ୱବିଦ୍ୟାଳୟରେ ବିଧାୟକମାନଙ୍କର ଏକ ବୈଠକ ଡକାଇଥିଲା। କିନ୍ତୁ ଦଳର ୯୪ ବିଧାୟକଙ୍କ ମଧ୍ୟରୁ ପ୍ରାୟ ୬୫ ଜଣ ଅନୁଷ୍ଠିତ ବୈଠକରେ ଯୋଗ ଦେଇଥିବା ବେଳେ ଅବଶିଷ୍ଟ ବିଧାୟକମାନେ ଦୂରେଇ ରହିଥିଲେ ବୋଲି ଟ୍ରିବ୍ୟୁନ୍ ରିପୋର୍ଟ କରିଛି। ଏହା ୨୦୨୭ ପଞ୍ଜାବ ନିର୍ବାଚନ ପୂର୍ବରୁ ନେତାଙ୍କ ଦଳ ବଦଳାଇବାର ବିଷୟରେ ନୂତନ କଳ୍ପନାଜଳ୍ପନା ସୃଷ୍ଟି କରିଛି। ଏହି ବୈଠକରେ ଆପ୍ ପଞ୍ଜାବ ମୁଖ୍ୟ ଅମନ ଆରୋଡ଼ା, ବାଚସ୍ପତି କୁଲତାର ସିଂହ ସାନ୍ଧୱାନ, ଉପବାଚସ୍ପତି ଜୟକୃଷ୍ଣ ସିଂହ ରୌରୀ, ମନ୍ତ୍ରୀ ଗୁରମିତ ସିଂହ ଖୁଦ୍ଦିଆନ, ମୋହିନ୍ଦର ଭଗତ ପ୍ରମୁଖ ଯୋଗ ଦେଇଥିଲେ। ସଞ୍ଜୀବ ଆରୋଡ଼ା ଓ ହରଜୋତ ସିଂହ ବାଇନ୍ସଙ୍କ ସମେତ ପ୍ରମୁଖ ମନ୍ତ୍ରୀମାନେ ନିଖୋଜ ଥିଲେ। ହୋଶିଆରପୁରର ସାଂସଦ ରାଜ କୁମାର ଚାବେୱାଲ ପଞ୍ଜାବର ଆପ୍ ବିଧାୟକଙ୍କ ବୈଠକରେ ଯୋଗ ଦେଇଥିଲେ।