Garvita Odia
ନୟାଗଡ଼: ନୟାଗଡ଼ ବ୍ଲକ ଭାଟସାହି ପଞ୍ଚାୟତ କାର୍ୟ୍ୟାଳୟ ଭିତରେ ସରପଞ୍ଚ ସାରଦା କୁମାରୀ ସାହୁଙ୍କ ବୋଲେରୋ ଗାଡିଟିକୁ ଗୁରୁବାର ବିଳମ୍ବିତ ରାତିରେ କେହି ପୋଡ଼ି ଦେଇଛନ୍ତି। ଏନେଇ ଥାନାରେ ଏକ ମାମଲା ରୁଜୁ ହୋଇଛି । ପୁଲିସ ଘଟଣାର ତଦନ୍ତ କରୁଛି । ସୂଚନା ମୁତାବକ, ସରପଞ୍ଚ ସାରଦା କୁମାରୀ ସାହୁଙ୍କ ଘର ଭାଟସାହି ଗାଁରେ ହୋଇଥିବାରୁ ସେ ଏକ ବୋଲେରୋ ଗାଡିରେ ପଞ୍ଚାୟତକୁ ଯାତାୟାତ କରନ୍ତି । ଗୁରୁବାର ଦିନ ଡ୍ରାଇଭର ଗାଡି଼ଟିକୁ ପଞ୍ଚାୟତ ପରିସରରେ ରଖି ଘରକୁ ଚାଲି ଯାଇଥିଲା । ବିଳମ୍ବିତ ରାତିରେ କେହି ଦୁର୍ବୃତ୍ତ ଉକ୍ତ ଗାଡିରେ ନିଆଁ ଲଗାଇ ଦେଇଥିଲା । ଯାହା ଫଳରେ ଗାଡିର ଆଗପଟ ପ୍ରାୟ ପୋଡ଼ି ଯାଇଛି । ସରପଞ୍ଚଙ୍କ ସ୍ବାମୀ ନୟାଗଡ଼ ବ୍ଲକ ଅଧ୍ୟକ୍ଷ ଅଛନ୍ତି । ତେବେ କେହି ରାଗରେ ଏପରି କରିଥିବା ଅନୁମାନ କରାଯାଉଥିବାବେଳେ ବ୍ଲକ ଅଧ୍ୟକ୍ଷ କିଶୋର ସାହୁ ଏନେଇ ଥାନାରେ ଅଭିଯୋଗ କରିଛନ୍ତି ।
