ଅଂଶୁଘାତରେ ତିନି ଜଣଙ୍କ ମୃତ୍ୟୁ ଅଭିଯୋଗ

ଭୁବନେଶ୍ୱର: ପ୍ରବଳ ଗ୍ରୀଷ୍ମପ୍ରବାହ ଓ ପ୍ରଚଣ୍ଡ ତାତି ନେଇଛି ଜୀବନ। ଅଂଶୁଘାତରେ ରାଜ୍ୟର ୨ଟି ସ୍ଥାନରେ ୩ ଜଣଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି। ସୁନ୍ଦରଗଡ ବଣାଇ ଉପଖଣ୍ଡରେ ଦୁଇ ଜଣଙ୍କ ଅଂଶୁଘାତରେ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ଗୁରୁଣ୍ଡିଆ ବ୍ଲକର ଯରଡ଼ା ହାଇସ୍କୁଲର ଆସିଷ୍ଟାଣ୍ଟ ଶିକ୍ଷକ ଅନୁରାଗ ଏକ୍କା ଜନଗଣନା ଦାୟିତ୍ବରେ ଥିବା ବେଳେ ଅଚାନକ ତଳେ ପଡିଯାଇଥିଲେ। ତୁରନ୍ତ ତାଙ୍କୁ ସୁନ୍ଦରଗଡ଼ ଡାକ୍ତରଖାନାକୁ ନିଆଯାଇଥିଲେ ମଧ୍ୟ ସେଠାରେ ତାଙ୍କର ମୃତ୍ୟୁ ହୋଇଛି। ଅଂଶୁଘାତରେ ତାଙ୍କର ମୃତ୍ୟୁ ହୋଇଥିବା ଅଭିଯୋଗ କରିଛନ୍ତି ତାଙ୍କ ପତ୍ନୀ। ଅନ୍ୟପଟେ କୋଇଡା ବ୍ଲକ୍ କେବଲାଙ୍ଗ ଥାନା ଅନ୍ତର୍ଗତ ବିମଲାଗଡ଼ ଫକିରମୁଣ୍ଡା ଗ୍ରାମରେ ସରକାରୀ ନଳକୂପ ଖୋଳୁ ଖୋଳୁ ଗ୍ରାମର ୫୭ ବର୍ଷିୟ ଦିନମଜୁରିଆ ହଠାତ୍ ଟଳି ପଡିଥିଲେ। ଗ୍ରାମବାସୀ ତାଙ୍କୁ ନିକଟସ୍ଥ ଲହୁଣୀପଡା ଡାକ୍ତରଖାନା ନେଇଥିଲେ ।

ସେଠାରେ ଡାକ୍ଟର ତାଙ୍କୁ ମୃତ ଘୋଷଣା କରିଛନ୍ତି । ତାଙ୍କର ପରିବାର ମଧ୍ୟ ଅଂଶୁଘାତରେ ମୁତ୍ୟୁ ହୋଇଥିବା ଅଭିଯୋଗ ଆଣିଛନ୍ତି । ପୁଲିସ୍ ତଦନ୍ତ କରିବା ସହ ଶବ ବ୍ୟବଚ୍ଛେଦ ରିପୋର୍ଟକୁ ଅପେକ୍ଷା କରିଛି। ସେହିଭଳି ବାରିପଦାରୁ ମଧ୍ୟ ଆସିଛି ଦୁଃଖଦ ଖବର। ଜନଗଣନାରେ ନିୟୋଜିତ ଶିକ୍ଷକ ଅଂଶୁଘାତର ଶିକାର ଅଭିଯୋଗ। ମୃତ ଶିକ୍ଷକ ଜଣକ ହେଲେ ବେତନଟୀ ବ୍ଲକ ପୁରିନ୍ଦା ସରକାରୀ ହାଇସ୍କୁଲର ୫୨ ବର୍ଷୀୟ ଶିକ୍ଷକ ରାଜକପୁର ହେମ୍ବ୍ରମ। ଶିକ୍ଷକ ଜଣକ ବେତନଟୀ ବ୍ଲକ ଅଧୀନ ଦହିକୋଟି ପଂଚାୟତ ଖମାରୀ ଗ୍ରାମରେ ଜନଗଣନା ସାରି ଘରକୁ ଫେରିଥିଲେ। ଘରେ ଅସୁସ୍ଥ ଅନୁଭବ କରିବାରୁ ପରିବାର ଲୋକେ ତାଙ୍କୁ ତୁରନ୍ତ ବାରିପଦା ସ୍ଥିତ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇ ଭର୍ତି କରାଇଥିଲେ କିନ୍ତୁ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ।