Garvita Odia
ତେହରାନ : ମଧ୍ୟପ୍ରାଚ୍ୟରୁ ଉତ୍ତେଜନା କେବେ ହ୍ରାସ ପାଇବ ତାହାକୁ ନେଇ ନାନା ଆଶଙ୍କା ଦେଖା ଦେଇଛି। ଆମେରିକା-ଇରାନ ଯୁଦ୍ଧ ଯୋଗୁଁ ବିଶ୍ବରେ ସୃଷ୍ଟି ହୋଇଥିବା ଶକ୍ତି ସଙ୍କଟ ଜଟିଳ ହେବାରେ ଲାଗିଛି। ଆମେରିକାର ନାକାବନ୍ଦୀ ଓ ଇରାନର ଧମକ ମଧ୍ୟରେ ଜାହାଜ ଗୁଡ଼ିକ ହର୍ମୁଜ ପ୍ରଣାଳୀ ପାର କରିବାକୁ ଭୟ କରୁଛନ୍ତି। ହର୍ମୁଜରେ ୟୁଏଇର ଏକ ଜାହାଜ ଉପରେ କ୍ଷେପଣାସ୍ତ୍ର ମାଡ଼, ହୁତି ବିଦ୍ରୋହୀଙ୍କ ଉପରେ ୟେମେନ କାର୍ଯ୍ୟାନୁଷ୍ଠାନ ସ୍ଥିତିକୁ ଅଧିକ ଗମ୍ଭୀର କରିଦେଇଛି। ଏପରି ସମୟରେ ହର୍ମୁଜ ଖୋଲିବା ପାଇଁ ଇରାନ କଠିନ ସର୍ତ୍ତ ରଖିଛି। ଆମେରିକା ନିଜ ବ୍ୟବହାର ନ ସୁଧାରିବା ପର୍ଯ୍ୟନ୍ତ ହର୍ମୁଜ ଖୋଲାଯିବ ନାହିଁ ବୋଲି ଇରାନର ‘ଶୀର୍ଷ ଜାତୀୟ ସୁରକ୍ଷା ପରିଷଦ’ କହିଛି। ଏହି ସର୍ତ୍ତ ରଣନୈତିକ ଦୃଷ୍ଟିରୁ ଗୁରୁତ୍ବପୂର୍ଣ୍ଣ ହର୍ମୁଜର ପରିଚାଳନାକୁ ନେଇ ଚାଲିଥିବା ଆଲୋଚନାକୁ ଅଧିକ କଠୋର କରିଦେବ ବୋଲି କୁହାଯାଉଛି।
ଇରାନ ସୁରକ୍ଷା ପରିଷଦର ସମ୍ପାଦକ ମହମ୍ମଦ ବାଘେର ଜୋଲଘାଦର ସର୍ତ୍ତ ବିଷୟରେ ସୂଚନା ଦେଇ କହିଛନ୍ତି ଯେ ତେହରାନକୁ ଆମେରିକା ଧମକ ଦେବା ବନ୍ଦ କରୁ। ହର୍ମୁଜ ପ୍ରଣାଳୀରୁ ସମ୍ପୂର୍ଣ୍ଣ ଭାବେ ନାକାବନ୍ଦୀ ବନ୍ଦ କରୁ। ଏହି କ୍ଷେତ୍ରରେ ଥିବା ନିଜ
ସଶସ୍ତ୍ର ବାହିନୀକୁ ପ୍ରତ୍ୟାହାର କରି ଇରାନ ବନ୍ଦର ଗୁଡ଼ିକରୁ ଗତିରୋଧ ହଟାଉ। ଅଞ୍ଚଳରେ ଥିବା ନିଜ ବନ୍ଧୁ ରାଷ୍ଟ୍ରରୁ ମଧ୍ୟ ଆମେରିକା ସୈନ୍ୟ ଅପସାରଣ କରୁ। ଇରାନରୁ ସମ୍ପୂର୍ଣ୍ଣ କଟକଣା ହଟାଇ ଯୁଦ୍ଧ ପାଇଁ କ୍ଷତିପୂରଣ ପ୍ରଦାନ କରିବାକୁ ହେବ। ଜବତ କରିଥିବା ଇରାନ ସମ୍ପତ୍ତିକୁ ବିନା ସର୍ତ୍ତରେ ମୁକ୍ତ କରିବାକୁ ପଡ଼ିବ। ତେବେ ଏହି ସର୍ତ୍ତ ଉପରେ ଆମେରିକା ପକ୍ଷରୁ କୌଣସି ପ୍ରତିକ୍ରିୟା ମିଳିପାରି ନାହିଁ। ପୂର୍ବରୁ ଇରାନ ସହ ଚୁକ୍ତି ହେବାକୁ ଯାଉଛି ବୋଲି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଥିଲେ। ମାତ୍ର ଇରାନ ଏହାକୁ ଖଣ୍ଡନ କରି ଦେଇଥିଲା। ସେପଟେ ରଣନୈତିକ ଦୃଷ୍ଟିରୁ ଗୁରୁତ୍ବପୂର୍ଣ୍ଣ ଜଳପଥର ପରିଚାଳନା ଲାଗି ଓମାନ ସହ ଏକ ଚୁକ୍ତି ସ୍ବାକ୍ଷର କରିବାକୁ ଯାଉଛି ବୋଲି ଇରାନ ପକ୍ଷରୁ କୁହାଯାଇଥିଲା। ଏ ଦିଗରେ ଆଲୋଚନା ଜାରି ରହିଥିବା ଓମାନ ପକ୍ଷରୁ ସ୍ପଷ୍ଟ କରାଯାଇଥିଲା।
