ଓଡ଼ିଶାରେ ଲାଗୁ ହେଉ ରାଷ୍ଟ୍ରପତି ଶାସନ: ପ୍ରମିଳା

ଭୁବନେଶ୍ୱର: ଓଡ଼ିଶାରେ ଆଇନଶୃଙ୍ଖଳା ପରିସ୍ଥିତି ବିପର୍ୟ୍ୟସ୍ତ ହୋଇପଡ଼ିଥିବା ଅଭିଯୋଗ କରି ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ ରାଜ୍ୟରେ ରାଷ୍ଟ୍ରପତି ଶାସନ ଲାଗୁ କରିବାକୁ ଦାବି କରିଛନ୍ତି । ତାଙ୍କ ମତରେ, ରାଜ୍ୟର ପରିସ୍ଥିତି ମଣିପୁରଠାରୁ ମଧ୍ୟ ଅଧିକ ସାଂଘାତିକ ହୋଇଛି ଏବଂ ସରକାର ନିଜ ଦାୟିତ୍ୱ ତୁଲାଇବାରେ ସମ୍ପୂର୍ଣ୍ଣ ବିଫଳ ହୋଇଛନ୍ତି ବୋଲି ସେ କହିଛନ୍ତି ।
ପ୍ରମିଳା ମଲ୍ଲିକ ବିଶେଷ ଭାବରେ ବାଲେଶ୍ୱର କଲେଜ ଛାତ୍ରୀଙ୍କ ମୃତ୍ୟୁ ଘଟଣାକୁ ଉଲ୍ଲେଖ କରି କହିଛନ୍ତି ଯେ, ଛାତ୍ରୀ ଜଣକ ସମସ୍ତଙ୍କୁ ଜଣାଇବା ପରେ ମଧ୍ୟ ତାଙ୍କ ଜୀବନ ବଞ୍ଚାଇ ପାରିଲା ନାହିଁ । ଏହି ଘଟଣାରେ ସେ ସରକାରଙ୍କୁ କଡ଼ା ସମାଲୋଚନା କରି କହିଛନ୍ତି ଯେ କେବଳ ତଦନ୍ତର ଆଳ ଦେଖାଇ ସରକାର ଚୁପ୍ ବସିଛନ୍ତି । ଏହି ଘଟଣା ସମ୍ପର୍କରେ ଏସ୍‌ପି ଏବଂ ସାଂସଦଙ୍କୁ ଅବଗତ କରାଯାଇଥିଲେ ମଧ୍ୟ ଛାତ୍ରୀଙ୍କୁ ସୁରକ୍ଷା ଦିଆଯାଇପାରିଲା ନାହିଁ, ଯାହା ସରକାରଙ୍କ ବିଫଳତାକୁ ପ୍ରମାଣିତ କରୁଛି ।ସେ ଆହୁରି ମଧ୍ୟ କହିଛନ୍ତି , ସେମାନେ ମହାମହିମ ରାଷ୍ଟ୍ରପତିଙ୍କୁ ଏହି ମାମଲାରେ ହସ୍ତକ୍ଷେପ କରିବାକୁ ଅନୁରୋଧ କରିବେ । ତାଙ୍କ ମତରେ, ଭାରତବର୍ଷର ଯେକୌଣସି ରାଜ୍ୟରେ ଶାସନ ବ୍ୟବସ୍ଥାରେ ବିଫଳତା ଦେଖାଦେଲେ ରାଷ୍ଟ୍ରପତି ହସ୍ତକ୍ଷେପ କରି ନିୟନ୍ତ୍ରଣ କରିବାର କ୍ଷମତା ରଖନ୍ତି ଏବଂ ସେହି କ୍ଷମତାକୁ ବ୍ୟବହାର କରିବା ପାଇଁ ସେମାନେ ଦାବି କରିବେ ।