Garvita Odia
ଭୁବନେଶ୍ୱର: ବର୍ତ୍ତମାନ ହିଁ ଉପଯୁକ୍ତ ସମୟ । ଓଡ଼ିଶାରେ ପୁଞ୍ଜିନିବେଶ କରନ୍ତୁ । ସମୃଦ୍ଧ ଓ ବିକଶିତ ଓଡିଶା ଗଠନରେ ଭାଗିଦାରୀ ହୁଅନ୍ତୁ । ଏହା କହିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ମୁମ୍ବାଇରେ ଆୟୋଜିତ ଇଣ୍ଡିଆ ଷ୍ଟିଲ-୨୦୨୫ ସମ୍ମିଳନୀରେ ଯୋଗଦେଇ ଜାତୀୟ ଓ ଅନ୍ତର୍ଜାତୀୟ ଇସ୍ପାତ ଉତ୍ପାଦନକାରୀ କମ୍ପାନୀମାନଙ୍କୁ ଏଭଳି ଆହ୍ବାନ ଦେଇଛନ୍ତି ମୁଖ୍ୟମନ୍ତ୍ରୀ । ମୁଖ୍ୟମନ୍ତ୍ରୀ ପୁଞ୍ଜିନିବେଶକାରୀଙ୍କୁ ଓଡ଼ିଶାରେ ଶିଳ୍ପାୟନ ପାଇଁ ଥିବା ଅନକୂଳ ବାତାବରଣ ସହ ପର୍ୟ୍ୟାପ୍ତ କଞ୍ଚାମାଲ, ଦକ୍ଷ ମାନବ ସମ୍ବଳ ଓ ବଳିଷ୍ଠ ଯୋଗାଯୋଗ ଭିତ୍ତିଭୂମି ସମ୍ପର୍କରେ ଅବଗତ କରିଛନ୍ତି ।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି, “ଭାରତ ବିଶ୍ଵର ଚତୁର୍ଥ ବୃହତ ଲୁହାପଥର ଉତ୍ପାଦନକାରୀ ଦେଶ । ଓଡ଼ିଶା ଦେଶରେ ସର୍ବାଧିକ ଲୁହାପଥର ଉତ୍ପାଦନକାରୀ ରାଜ୍ୟ । ଦେଶର ଲୁହାପଥର ଆବଶ୍ୟକତାର ୫୫ ପ୍ରତିଶତ ଯୋଗାଉଛି ଓଡ଼ିଶା । ଭାରତରେ ଇସ୍ପାତ ଶିଳ୍ପର ଅଭିବୃଦ୍ଧିରେ ଏକ ଗୁରୁତ୍ଵପୂର୍ଣ୍ଣ ଭୂମିକା ଗ୍ରହଣ କରୁଛି ଓଡିଶା । ମୁଖ୍ୟମନ୍ତ୍ରୀଙ୍କ ଜିଲ୍ଲା ଖଣିଜ ସମ୍ପଦ ଭରା କେନ୍ଦୁଝର ରାଜ୍ୟର ୫୦ ପ୍ରତିଶତ କଞ୍ଚାମାଲ ଉତ୍ପାଦନ କରୁଛି । ତେଣୁ ରାଜ୍ୟରେ ଇସ୍ପାତ ଓ ଇସ୍ପାତ ସହ ଜଡ଼ିତ ଶିଳ୍ପ ପାଇଁ ବ୍ୟାପକ ସମ୍ଭାବନା ରହିଛି ।”ମୁଖ୍ୟମନ୍ତ୍ରୀ ଆହୁରି ମଧ୍ୟ କହିଛନ୍ତି, “ରାଜ୍ୟରେ ବିଜେପି ସରକାର କ୍ଷମତାକୁ ଆସିବା ପରେ ଶିଳ୍ପାୟନ ପାଇଁ ଏକ ଅନୁକୂଳ ପରିବେଶ ସୃଷ୍ଟି କରିଛନ୍ତି । ଯାହା ଗତ ଜାନୁଆରୀରେ ଅନୁଷ୍ଠିତ ଉତ୍କର୍ଷ ଓଡ଼ିଶା କନକ୍ଲେଭରୁ ପ୍ରମାଣିତ ହୋଇସାରିଛି । ଶିଳ୍ପାନୁଷ୍ଠାନର ଆବଶ୍ୟକତା ଅନୁଯାୟୀ କଞ୍ଚାମାଲ, ଜମି, ସଡକ ଓ ରେଳ ଯୋଗାଯୋଗ ସହ ବିଦ୍ୟୁତ ଓ ପାଣି ଯୋଗାଇବା ସୁନିଶ୍ଚିତ କରିଛନ୍ତି ସରକାର । ଗତ ୧୦ ମାସ ମଧ୍ୟରେ ରାଜ୍ୟର ୪୪ଟି ବୃହତ ଖଣିକୁ ରାଜ୍ୟ ସରକାର ଅକ୍ସନ କରିଛନ୍ତି । ଖୁବଶୀଘ୍ର ଆଉ ୮ଟି ବୃହତ ଖଣିର ଅକ୍ସନ କରିବାକୁ ପ୍ରସ୍ତୁତି ଆରମ୍ଭ ହୋଇଛି । ଏହି ସବୁ ଖଣି କାର୍ୟ୍ୟକ୍ଷମ ହେଲେ ୩୨୩ ନିୟୁତ ଟନ କଞ୍ଚାମାଲ ଉତ୍ପାଦନ ହେବ । ମାର୍ଚ୍ଚ ୨୦୨୬ ସୁଦ୍ଧା ଆଉ ୨୨ଟି ଖଣିର ନିଲାମ କରାଯିବ ।”
